ខេត្តមណ្ឌលគិរី៖ ក្បួន ត្រាក់ទ័រ ឡានបាកុង កាឡេថង របស់ ឧកញ៉ា សឹង សំអុល, តុប វីដា ,ឧកញ៉ាប៉ោ សំអឿនត្រូវបានគេឃើញសម្រុក ចូលទៅអូសឈើនៅព្រៃក្នុងដែនជម្រកសត្វភ្នំព្រេចនៅស្រុកកោះញ៉ែក ខេត្តមណ្ឌលគិរី នារសៀលថ្ងៃទី១៣ ខែសីហា ឆ្នាំ២០១៨ ក្នុងពេលដែល លោកប្រធានមន្ទីរបរិស្ថានខេត្ត លោកស្នងការនគរបាលខេត្ត និយាយបែបការទូតលំៗថាដឹងហើយចាំបញ្ជូនកម្លាំងទៅមើល? ។
បើតាមសេចក្តីរាយការណ៍របស់ប្រជាពលរដ្ឋឲ្យដឹងថា៖មានទីតាំង២កន្លែងដែលឧកញ៉ា សឹង សំអុលដែលជាមន្ត្រីប៉េអឹម, តុប វីដាជាមន្ត្រីយោធា ,ឧកញ៉ាប៉ោ សំអឿន ដាក់គ្រឿងចក្រប្រមូលឈើ ដោយទ្រង់ទ្រាយធំ។ គឺទី១-នៅព្រៃកុងៗ ដែនជម្រកសត្វភ្នំព្រេច ស្រុកកោះញ៉ែក ដោយប្រើឡានបាកុងជាង ២០០គ្រឿង ត្រាក់ទ័រសម្រាប់អូសឈើជាង៤០គ្រឿង កាឡេថងជា៥០០គ្រឿង និងរថយន្តយីឌុប រថយន្តកាម៉ាសជាច្រើនគ្រឿងសម្រាប់ដឹកជញ្ជូនឈើចេញ។
ទី២-នៅចំណុចកែងចំការចេក ក្នុងភូមិរណែង ឃុំស្រែឈូក ស្រុកកែវសីមា ដែលមានឈ្មួញ៣រូប ជាអ្នកប្រមូលឈើយកមកផ្គត់ផ្គង់អោយ ឧកញ៉ា ទាំងបីគ្រឿងខាងលើគឺមានឈ្មោះ ម៉ុក ឈ្មោះ ចេង សាក់ ជាទាហាន ឈ្មោះ ចាប កុសល ជាទាហាន ។ ពេលនេះនៅស្រុកកែវសីមា មានឈើនិងឡានបាកុងដឹកឈើច្រើនណាស់ លើករួចក៏មាន មិនទាន់លើកក៏មាន ដើម្បីដឹកជញ្ជូនចេញទៅ ស្រុកស្នួលខេត្តក្រចេះ ជាប់ព្រំដែនវៀតណាម។
សូមបញ្ជាក់ថាឈ្មួញឈ្មោះ ម៉ុក ,ចេង ស័ក្តិ ជាទាហាន និងឈ្មោះ ចាប កុសល ជា ទាហាន ហើយឈ្មោះនេះផងដែរ ក៏ជាក្រុមដៃជើងរកស៊ីឈើជាមួយនិងលោកស័ក្តិ៥ឈ្មោះ កែវ ចិន្តា ហៅធូ ។ ឧកញ៉ាល្បីឈ្មោះទាំង៣គ្រឿង ក៏ដូចជាឈ្មួញ៣រូបនៅក្នុង ស្រុកកែវសីមាត្រូវបានគេរាយការណ៍ថា កំពុងតែរត់ការប្រសេចប្រសាចចាយលុយ បិទបាំង សកម្មភាពបង្កឧក្រឹដ្ឋកម្មព្រៃឈើ ដែលពួកគេ មានផែនការកាប់បំផ្លាញទ្រង់ទ្រាយធំ ហើយសម្រុកដឹកឲ្យបានច្រើន ប្រើពេលវេលាខ្លី ដើម្បីបំពេញតម្រូវការ ក្រុមហ៊ុនវៀតណាម ចាំទទួលទិញ ។
សង្ឃឹមថាពិតមាននេះថ្នាក់លើនឹងចាត់វិធានការស៊ើបអង្កេតតាមដាន ដើម្បីស្វែងរក ការណ៍ពិតឈានដល់ការបង្ក្រាប ក្នុងបទល្មើសជាក់ស្តែង សម្រាប់រាត្រីនេះ ឬថ្ងៃស្អែកជាមិនខាន ៕