ភ្នំពេញ៖ រថយន្តស៊េរីទំនើបម៉ាកហ្វដរ៉ែងជឺ(FordRanger) ត្រូវបានគែឃើញបើកក្នុងល្បឿនយ៉ាងលឿនហើយក៏ជ្រុលចង្កូតទៅបុករបាំងថ្មពុះចែកទ្រូងផ្លូវយ៉ាងពេញទំហឹង បណ្តាលឲ្យរថយន្តក្រឡាប់ផ្ងារជើងម្ខាង រងការខូចខាតយ៉ាងដំណំ កាលពីវេលាម៉ោង ១០និង៣០នាទីយប់ ថ្ងៃសុក្រ ១៤រោច ខែទុតិយាសាឍ ឆ្នាំច សំរឹទ្ធិស័ក ព.ស២៥៦២ ត្រូវនឹងទី១០ ខែ សីហា ឆ្នាំ ២០១៨ ស្ថិតនៅតាមបណ្តោយផ្លូវម៉ៅសេទុងកែងនិងផ្លូវ១៩៩ ក្នុងសង្កាត់ទំនប់ទឹក ខណ្ឌចំការមន រាជធានីភ្នំពេញ ។
សេចក្តីរាយការណ៍បានឲ្យដឹងថា មុនពេលកើតហេតុ គេឃើញបុរសម្នាក់ដែលគេគិតថាជាមន្ត្រីថា្នក់ខ្ពស់ដែរបានបើករថយន្តស៊េរីទំនើប១គ្រឿងម៉ាកហ្វដរ៉ែងជឺ( Ford-Ranger) ពណ៌ទឹកប្រាក់ ពាក់ស្លាកលេខ រដ្ឋ13 2-5566 បានធ្វើដំណើរតាមបណ្តោយផ្លូវម៉ៅសេទុង ក្នុងទិសដៅពីជើងទៅត្បូង ក្នុងល្បឿនយ៉ាងលឿន លុះមកដល់ចំណុចកើតហេតុ ក៏ទៅបុករបាំងថ្មចែកទ្រូងផ្លូវយ៉ាងពេញទំហឹង បណ្តាលឲ្យរថយន្តក្រឡាប់ផ្ងារជើងម្ខាង និងខូចខាតរបាំងចែកផ្លូវបាក់អស់១កង់។
ចំណែកឯបុរសអ្នកបើករថយន្តនោះ បានជាប់ក្នុងរថយន្តត្រូវបានសមត្ថកិច្ចនឹងប្រជាពលរដ្ឋយកដែកគាស់ទាញចេញមកវិញ តែសំណាងល្អគ្រាន់តែរងរបួសស្រាល ។
ក្រោយពេលកើតហេតុ ម្ចាស់រថយន្តបង្ក ត្រូវបានសាច់ញត្តិរបស់គាត់ មកទទួលយកទៅលាងរបួស ។ រីឯសមត្ថកិច្ចក៏បានចុះមកវាល់វែងយករថយន្តទៅរក្សាទុក នៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីរងចាំដោះស្រាយទៅតាមផ្លូវច្បាប់ ៕
