ខេត្តក្រចេះ ៖ រថយន្តសាំងយ៉ុងដឹកបទល្មើសជាច្រើនគ្រឿង ត្រូវបានកម្លាំងសមត្ថកិច្ចចម្រុះ បង្ក្រាបបាន និងយកទៅរក្សាទុកនៅស្ថានីយ៍បណ្ដុះកូនឈើខ្សារ ដើម្បីកសាង សំនុំរឿងបន្ត បញ្ជូនទៅតុលាការខេត្ត ។
សមត្ថកិច្ច បានឲ្យដឹងថា នាព្រឹកថ្ងៃទី៣០ ខែមិថុនា ឆ្នាំ២០១៦នេះ មន្ត្រីជំនាញរដ្ឋបាលព្រៃឈើ ដឹកនាំដោយលោក ប៊ុយ រតនា នាយផ្នែករដ្ឋបាលព្រៃឈើក្រចេះ សហការជាមួយ កម្លាំងនគរបាលចរាចរនៃស្នងការនគរបាលខេត្តក្រចេះ និងកម្លាំងកងរាជអាវុធហត្ថក្រុងក្រចេះ ដោយមានការសម្របសម្រួលពីលោក ហាក់ ហ៊ន់ ព្រះរាជអាជ្ញាអមសាលាដំបូរខេត្តក្រចេះ បើកយុទ្ធនាការចុះបង្ក្រាបរថយន្តដឹកបទល្មើសជាលក្ខណៈទ្រងទ្រាយធំជាច្រើនចំនុច នៅតាមដងផ្លូវស្ថិននៅក្នុងក្រុងក្រចេះ ខេត្តក្រចេះ ដែលរថយន្តដឹកបទល្មើសទាំងនោះ សុទ្ធសឹងជាប្រភេទរថយន្តសាំងយ៉ុង ដឹកឈើក្រហមលេខ ២ ប្រភេទ ក្ដា សសរ ដឹកចេញពីចំណុចព្រំប្រទល់ខេត្តស្ទឹងត្រែង និងចំនុចអូរគ្រៀង ឆ្ពោះយកទៅលក់បន្តនៅខេត្តត្បូងឃ្មុំ ដោយឆ្លងកាត់ទីរួមខេត្តក្រចេះ ។
នាយផ្នែករដ្ឋបាលព្រៃឈើក្រចេះ លោក ប៊ុយ រតនា បានប្រាប់ឲ្យដឹងថា នៅក្នុងយុន្ធនាការចុះបង្ក្រាបរថយន្តដឹកបទល្មើសនេះ គិតត្រឹមវេលាម៉ោង ១២និង៤៥នាទីថ្ងៃដដែល កម្លាំងសមត្ថកិច្ចចម្រុះ បានចាប់ឃាត់រថយន្តសាំងយ៉ុងដឹកបទល្មើសចំនួន ១១គ្រឿង និងយកទៅរក្សាទុកបណ្ដោះអាសន្ននៅស្ថានីយ៍បណ្ដុះកូនឈើខ្សារ ឋិតនៅភូមិខ្សារ ឃុំដារ ស្រុកចិត្របុរី ។
លោក ប៊ុយ រតនា នាយកផ្នែក បានបញ្ជាក់ថា រហូតមកដល់ពេលនេះ កម្លាំងសមត្ថកិច្ចចម្រុះ មិនទាន់ដកកម្លាំងរបស់ខ្លួននៅឡើយនោះទេ គឺនៅតែកំពុងបន្តសកម្មភាពចុះបង្ក្រាបជាបន្តបន្ទាប់ទៀត ដើម្បីទប់ស្កាត់ និងបង្ក្រាបរថយន្តល្មើសទាំងនោះ ដែលកំពុងតែធ្វើចរាចរណ៍ ដឹកជញ្ជូនបទល្មើសយ៉ាងគក្រឹកគគ្រេងបែបអនាធិបតេយ្យ គ្មានសណ្ដាប់ធ្នាប់ និងមិនគោរពច្បាប់ចរាចរណ៍ ដោយឆ្លងកាត់ទឹកដីនៃខេត្តក្រចេះ ឆ្ពោះទៅខេត្តត្បូងឃ្មុំ ។
នៅក្រោយពេលដែលកម្លាំងមន្ត្រីជំនាញរដ្ឋមេព្រៃ នាំយករថយន្តបទល្មើសទាំងនោះទៅរក្សាទុកនៅស្ថានីយ៍បណ្ដុះកូនឈើខ្សារ លោក ប៊ុយ រតនា នាយផ្នែករដ្ឋបាលព្រៃឈើក្រចេះ បានបញ្ជាក់បន្តថា មន្ត្រីជំនាញ និងកសាងសំនុំរឿងតាមនីតិវិធីច្បាប់ បញ្ជូនទៅកាន់ស្ថាប័នអយ្យការ អមសាលាដំបូងខេត្តក្រចេះ ដើម្បីចាក់ការបន្តតាមនីតិវិធីច្បាប់ ស្ដីពីព្រៃឈើ ៕
