ភ្នំពេញ៖ សម្តេចក្រុមព្រះនរោត្តម រណរទ្ធិ ព្រះប្រធានគណបក្សហ្វ៊ុនស៊ិនប៉ិច ដែលរងគ្រោះថ្នាក់ចរាចរបាក់ជើងហើយកំពុងសម្រាកព្យាបាលសុខភាព នៅក្រៅប្រទេស បាន សម្រេចប្រគល់គណបក្សហ្វុនស៊ិនប៉ិចឲ្យបុត្រាព្រះអង្គ១រូបព្រះនាមនរោត្តម ចក្រាវុឌ្ឍ គ្រប់គ្រងចាប់ពីថ្ងៃទី៨សីហាឆ្នាំ២០១៨ ។
ព្រះអង្គម្ចាស់ នរោត្តម ចក្រាវុឌ្ឍ គឺជាព្រះរាជបុត្រច្បងរបស់ សម្តេចក្រុមព្រះនរោត្តម រណឫទ្ធិ ជាមួយម្ចាស់ក្សត្រិយ៍ម៉ារី រណឫទ្ធិ ដែលត្រូវបានសម្តេចក្រុមព្រះ ។ ក្រៅពីការតែងតាំងព្រះអង្គម្ចាស់ នរោត្តម ចក្រាវុឌ្ឍ ជាប្រធានស្តីទី សម្តេចក្រុមព្រះក៏តែងតាំង អគ្គលេខាធិការរងម្នាក់ ដែលកាន់កាប់ហិរញ្ញវត្ថុបក្ស គឺលោក ពេជ្រ សូដេថ្ថា ឱ្យធ្វើជាអគ្គលេខាធិការគណបក្សហ្វ៊ុនស៊ិនប៉ិចផងដែរ។
បើតាមលោក ញ៉េប ប៊ុនជិន អនុប្រធាន និងជាអ្នកនាំពាក្យគណបក្សហ្វ៊ុនស៊ិនប៉ិច បាន ឱ្យដឹងនៅថ្ងៃទី១១ ខែសីហានេះថា គណបក្សហ្វ៊ុនស៊ិនប៉ិច បានទទួលសេចក្តីសម្រេចនេះហើយ ហើយថ្នាក់ដឹកនាំទាំងអស់នឹងដង្ហែតាមព្រះរាជតម្រិះរបស់សម្តេចប្រធានគណបក្ស។
សូមបញ្ជាក់ថា សម្តេចក្រុមព្រះ នរោត្តម រណឫទ្ធិ បានរងរបួសយ៉ាងដំណំក្នុងករណីគ្រោះថ្នាក់ចរាចរណ៍ដ៏រន្ធត់មួយ ដែលបណ្តាលមកពីរថយន្តតាក់ស៊ី ជែងរថយន្តផ្សេងទៀត ហើយជ្រុលមកបុកក្បួនព្រះទីនាំងរបស់ព្រះអង្គ នៅស្រុកព្រៃនប់ ខេត្តព្រះសីហនុ កាលពីថ្ងៃទី១៧ ខែមិថុនា ឆ្នាំ២០១៨ បណ្តាលឱ្យអ្នកម្នាង អ៊ុក ផល្លា រណឫទ្ធិ ទទួលមរណភាព ចោលបុត្រាតូច២អង្គ។ ចំណែកសម្តេចក្រុមព្រះដែលមានព្រះជន្ម៧៤ព្រះវស្សា ត្រូវបានបញ្ជូនទៅព្យាបាល នៅក្រៅប្រទេសរហូតមកដោយមិនមានវត្តមានចូលរួមឃោសានាបោះឆ្នោតឡើយ។
មកដល់ពេលនេះ ព្រះសុខភាពពិតប្រាកដរបស់សម្តេចក្រុមព្រះ នៅមិនទាន់ដឹងច្បាស់នៅឡើយទេបើទោះបីជាមន្ត្រីគណបក្សហ្វ៊ុនស៊ិនប៉ិច បាននិយាយថា ព្រះសុខភាពរបស់ព្រះអង្គ មានភាពប្រសើរជាងមុនបន្តិចហើយក៏ដោយ។ជាលទ្ធផលបោះឆ្នោតគណបក្សហ្វុុនស៊ិនប៉ិចបានកើនសម្លេងដល់ជាង៣០ម៉ឺនសម្លេងដែរតែប់ចែកតាមមណ្ឌលអត់បានមួយជើងម៉ាក្នុងសភាទេ៕