រាជធានីភ្នំពេញ៖ តាមការគ្រោងទុកការប្រឡងសញ្ញាបត្រមធ្យមសិក្សាទុតិយភូមិចំណេះទូទៅ និងបំពេញវិជ្ជា(បាក់ឌុប) ឆ្នាំនេះនៅទូទាំងប្រទេស នឺងប្រព្រឹត្តទៅរយៈពេល២ថ្ងៃ ចាប់ពីថ្ងៃទី២០ដល់ថ្ងៃទី២១ ខែសីហា ឆ្នាំ២០១៨មានបេក្ខជនមានបេក្ខជនសរុបចំនួន ១១៧,០៦១នាក់ មណ្ឌលប្រឡងចំនួន១៩៥ និងមានបន្ទប់ប្រឡងចំនួន៤៧១៧។
នៅក្នុងកិច្ចប្រជុំពិភាក្សាស្តីពីការអង្កេតការប្រលងបាក់ឌុប សម្រាប់ឆ្នាំសិក្សា២០១៧-២០១៨ នៅសាលារាជធានីភ្នំពេញ កាលពីរសៀលថ្ងៃទី០៩សីហា រវាងលោក កើត ឆែ អភិបាលរងរាជនីភ្នំពេញ និងលោក ឃាង សេង អនុប្រធានអង្គភាពប្រឆាំងអំពើពុករលួយ(ACU) និងមន្ទីរជំនាញពាក់ព័ន្ធមួយចំនួនទៀតនោះ លោក ឃាង សេង អនុប្រធានអង្គភាពប្រឆាំងអំពើពុករលួយ បាន ឲ្យដឹងថា គ្រប់បេក្ខជនប្រលងទាំងអស់ និងអ្នកពាក់ព័ន្ធនានា បើធ្វើឲ្យបែកធ្លាយវិញ្ញាសារជាសាធារណៈនោះ គឺជាប់ទោសព្រហ្មទណ្ឌ ហើយបើមានការបែកធ្លាយវិញ្ញាសារមែននោះ អង្គភាពប្រឆាំងអំពើពុករលួយនឹងបើកការស្រាវជ្រាវស៊ើបអង្កេតឃាត់ខ្លួនជនល្មើសឲ្យខានតែបាន។
ភាពសំងាត់ នៃវិញ្ញាសារប្រលង ជារឿយៗ ACU និងក្រសួងអប់រំ តែងតែដាស់តឿនឲ្យបេក្ខជនប្រលង អ្នកសង្កេតការណ៍ មេប្រយោគ គ្រួអនុរក្ស និងអ្នកពាក់ព័ន្ធនានា ហាមដាច់ការថតវិញ្ញាសារ និងការរក្សាភាពសំងាត់នៃវិញ្ញាសា រ ដែលសូម្បីតែការថតរក្សាទុកផ្ទាល់ខ្លួន ក៏មិនអនុញ្ញាតឲ្យថតដែរ ហើយអ្នកថតនោះ បើចាប់បាន ក៏ត្រូវមានទោសដូចគ្នាដែរ។
លោកឃាំងសេងបញ្ជាក់ថា ការប្រលងនេះត្រូវប្រកាន់ពាក្យស្លោកមួយថា “អ្នកចេះគឺប្រលងជាប់” យើងបានរិតបណ្តឹងលើការងារប្រលងនេះ៦ឆ្នាំហើយបើគិតទាំងឆ្នាំនេះ ដោយអនុវត្តស្របតាមកម្មវិធីកំណែទម្រង់ស៊ីជម្រៅរបស់រាជរដ្ឋាភិបាល ។
លោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា ធ្លាប់បានបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំសិក្សា២០១៧-២០១៨នេះ ក្រសួងនៅតែរឹតបន្តឹងឲ្យខ្លាំងជាងឆ្នាំកន្លងទៅថែមទៀត ជាមួយនឹងអ្នកសង្កេតការណ៍របស់អង្គភាពប្រឆាំងអំពើពុករលួចជាង៦ពាន់នាក់ និងមេប្រយោគជាង៣ម៉ឺននាក់។ សិស្សដែលអាចប្រឡងជាប់បាក់ឌុបបាន ត្រូវមានពិន្ទុចំនួន ២៣៧ពិន្ទុ ៥០%នៃពិន្ទុសរុបគឺជាប់មធ្យមភាគនិទ្ទេស E ។
គួរបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិ(បាក់ឌុប) សម្រាប់នៅរាជធានីភ្នំពេញ មានបណ្ឌលប្រលងចំនួន២៥មណ្ឌល មានចំនួន៩១៣បន្ទប់និងមានបេក្ខជនប្រលងចំនួន២២៧៧៨នាក់។ ហើយការប្រកាសលទ្ធផលនឹងធ្វើឡើងនៅថ្ងៃទី១១ ខែកញ្ញា ឆ្នាំ២០១៨ សម្រាប់សិស្សប្រឡងនៅរាជធានីភ្នំពេញ និងថ្ងៃទី១២កញ្ញា សម្រាប់សិស្សដែលប្រឡងនៅតាមបណ្តាខេត្ត៕
