ភ្នំពេញៈ បុរសម្នាក់ បានបើករថយន្តពាក់ស្លាកលេខ ខេមរភូមិន្ទ មកឈប់មុខផ្ទះ នៅចំណុចផ្សារឌុយម៉េច តាមបណ្ដោយផ្លូវ១០៩ ស្ថិតក្នុងសង្កាត់មនោរម្យ ខណ្ឌ៧មករា រាជធានីភ្នំពេញរួចស្រែកឡូឡា និងដកកាំភ្លើងខ្លី១ដើម បាញ់ឡើងលើចំនួន៣គ្រាប់ផ្ទួនៗគ្នា បង្កឲ្យមានការភិតភ័យ និងភ្ញាក់ផ្អើលដល់ប្រជាពលរដ្ឋរស់នៅជិតខាងយ៉ាងខ្លាំង ហើយបើករថយន្តគេចចេញបាត់ស្រមោលកាលពីវេលាម៉ោងជាង១០យប់ ថ្ងៃអង្គារ ១១រោច ខែទុតិយាសាឍ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី៧ ខែសីហា ឆ្នាំ២០១៨ ត្រូវសមត្ថកិច្ចកំណត់អត្តសញ្ញាណបានហើយ។
នៅថ្ងៃទី៨សីហានេះសមត្តកិច្ចបានឲ្យដឹងថា ជនបង្ក គឺជាមន្ត្រីយោធា ពាក់ស័ក្តិ៤ ដែលបច្ចុប្បន្នកំពុងលាក់ខ្លួនពីការតាមប្រមាញ់របស់សមត្ថកិច្ច។
ជនបង្ករូបនេះ មានឈ្មោះ រដ្ឋ ប៉ុណ្ណាមីន ជាមន្ត្រីយោធា មានឋានន្តរស័ក្តិថ្នាក់វរសេនីយ៍ត្រី (ស័ក្តិ៤) អត្តលេខ១៨៨០២០។សមត្ថកិច្ចមិនអាចប្រាប់បានឡើយ នូវរឿងរ៉ាវលម្អិតជុំវិញជម្លោះក្នុងគ្រួសាររបស់មន្ត្រីយោធា ឈានទៅកើតជាការបាញ់បោះសេរី បង្កអសន្តិសុខ និងភាពភ័យខ្លាចដល់ប្រជាពលរដ្ឋ ដោយសមត្ថកិច្ចបានត្រឹមអះអាងយ៉ាងខ្លីថា បច្ចុប្បន្នកំពុងតាមប្រមាញ់ជនបង្ក។
ករណីបាញ់បោះសេរីខាងកាលពីវេលាម៉ោងជាង១០យប់ ថ្ងៃអង្គារ ១១រោច នៅចំណុចផ្សារឌុយម៉េច តាមបណ្ដោយផ្លូវ១០៩ ស្ថិតក្នុងសង្កាត់មនោរម្យ ខណ្ឌ៧មករា រាជធានីភ្នំពេញ។
ប្រភពព័ត៌មានពីអ្នករស់នៅជិតខាង បានឲ្យដឹងថា នៅមុនពេលកើតហេតុ គាត់បានឃើញបុរសម្នាក់ បើករថយន្តពាក់ស្លាកលេខ ខេមរភូមិន្ទ 2-6565 មកឈប់មុខផ្ទះ រួចគេឃើញមានទំនាស់ពាក្យសម្ដីជាមួយក្រុមគ្រួសារ ដោយបានស្រែកឡូឡាយ៉ាងខ្លាំង។ លុះមួយសន្ទុះក្រោយមក គេក៏បានដកកាំភ្លើងបាញ់ឡើងលើចំនួន៣គ្រាប់ផ្ទួនៗគ្នា បង្កឲ្យមានការភិតភ័យ និងភ្ញាក់ផ្អើលដល់ប្រជាពលរដ្ឋរស់នៅជិតខាងយ៉ាងខ្លាំង រួចបើករថយន្តចេញទៅបាត់។
ក្រុមអ្នកសារព័ត៌មានបានចុះទៅដល់ឃើញមានសម្បកគ្រាប់កាំភ្លើងមិនស្គាល់ម៉ាកចំនួន៣គ្រាប់ នៅនឹងមុខផ្ទះកើតហេតុ ប៉ុន្តែស្ត្រីម្នាក់ បានរត់មកប្រមូលសម្បកគ្រាប់ទាំងអស់ ហើយយកទៅទុកក្នុងផ្ទះបាត់ ដើម្បីគេចពីអ្នកកាសែត ៕
