ស្វាយរៀង ៖ ក្រុមកម្មករកម្មការិនី រោងចក្រ ផលិតអំពូលភ្លើង “សេងយ៉ាវ”ស្ថិតក្នុងឃុំកណ្តៀងរាយ ស្រុកស្វាយទាប ខេត្ត ស្វាយរៀង ប្រមាណ១៤០០ នាក់ធ្វើកូដកម្ម អស់រយៈពេលពីរថ្ងៃមកហើយ ដោយចាប់ ពីថ្ងៃទី៧ ដល់ថ្ងៃទី៨ ខែសីហា ឆ្នាំ២០១៨ ដោយសារថៅកែរោងចក្រ កាត់ប្រាក់ខែ ក្នុងថ្ងៃបោះឆ្នោត២ថ្ងៃ និងទាមទារ នូវលក្ខខណ្ឌមួយចំនួនផងដែរ។
តំណាងកម្មករ បានឲ្យដឹងថា ការធ្វើកូដកម្មនេះ គឺពួកគាត់ ទាមទារឲ្យខាងថៅកែរោងចក្រខាងលើ នូវលក្ខខណ្ឌ ១៣ចំណុច តែករណីសំខាន់ មានតែ ៤ចំណុចទេ ដែលក្រុមកម្មករចង់បាន ៖ ទី១.សុំឲ្យជ្រើសរើសសហជីពដោយខ្លួន ឯងក្នុង រោងចក្រ ទី២. សុំដោះស្រាយរឿងកាត់លុយរយៈពេល២ថ្ងៃ គឺថ្ងៃបោះឆ្នោត ទី៣. សូមកុំឲ្យ ក្រុមហ៊ុនធ្វើខុសនឹងគោលការណ៍ច្បាប់កំណត់ ដូចជាថ្ងៃចូលពិធីសំណេះសំណាស ជាមួយលោកជំទាវ មែន សំអន ក្រុមហ៊ុនឲ្យតែកម្មករពេញសិទ្ធិទៅចូលរួម ចំណែកកម្មករ មិនពេញសិទ្ធិមិនអនុញ្ញាតឲ្យទៅចូលរួម ហើយកាត់ប្រាក់ឈ្នួលថែមទៀត។
ដោយឡែកលក្ខខណ្ឌចំនួន១០ទៀតរួមមាន ៖១ កុំកៀបសង្កត់កម្មករ ពេលថែម ម៉ោង ២សូមកុំបញ្ឈប់កម្មករ ដោយគ្មានមូលហេតុ, ៣ សូមឲ្យក្រុមហ៊ុនដោះស្រាយបញ្ហាដូចជា បញ្ហាសុខភាព ថ្នាំពេទ្យ បន្ទប់ទឹក បង្គន់មិនស្អាត, ៤ សូមឲ្យក្រុមហ៊ុនបន្ថយចំនួន សម្ភាៈ ផលិត,៥ សូមលុយជំនាញបន្ថែម,៦ សូមឲ្យក្រុមហ៊ុនផ្ដល់លុយសុខភាព,៧ ស្នើសុំកម្មករជំនាញ ធ្វើការបាន២ខែ សុំចូលជាកម្មករពេញសិទ្ធិ, ៨ សូមក្រុមហ៊ុនអនុញ្ញាត ឲ្យកម្មករប្រើប្រាស់ ការឈប់សម្រាកប្រចាំឆ្នាំនៅមានធុរៈផ្សេងៗ,៩ សូមឲ្យក្រុមហ៊ុនអនុញ្ញាតច្បាប់កម្មការិនី មានផ្ទៃពោះទៅពិនិត្យសុខភាព១ម្ដង ដោយរក្សាប្រាក់ឈ្នួល និងអត្ថប្រយោជន៍ផ្សេងៗ នៅដដែល, ១០ ពេលបញ្ឈប់កម្មករចេញពីការងារ សូមឲ្យបើកប្រាក់ឈ្នួល មិនឲ្យលើសពី ៤៨ម៉ោង និងក្រុមហ៊ុនធ្វើការបន្ថែមម៉ោងនៅថ្ងៃសៅរ៍ និងថ្ងៃចុងខែ។មិនទាន់ដឹងថាតើមន្ទីរការងារខេត្តស្វាយរៀងមានដំណោះស្រាយបែបម៉េចជាមួយថៅកែរោងចក្រឡើយព្រោះបញ្ហាខ្លះពាក់ពន្ធ័ការសម្រេចរបស់រដ្ឋាភិបាលឲ្យឈប់ទៅបោះឆ្នោត៕
