ក្រចេះ៖ នៅព្រឹកថ្ងៃទី២៨ ខែមិថុនា ឆ្នាំ២០១៦ វេលាម៉ោង ៨និង១៥នាទី ប្រធានពន្ធនាគារខេត្តក្រចេះ បានបង្ក្រាបករណីរក្សាទុក ដើម្បីជួញដូរដោយខុសច្បាប់នូវសារធាតុញៀន និងឃាត់ខ្លួនជនសង្ស័យចំនួន ២នាក់ នៅក្នុងពន្ធនាគារខេត្ត ស្ថិតក្នុងភូមិ/សង្កាត់/ក្រុងក្រចេះ ខេត្តក្រចេះ ។
ជនសង្ស័យទាំង ២នាក់ ទី១-ឈ្មោះ តែ លីទី ភេទប្រុស ជនជាតិខ្មែរ អាយុ ២៨ឆ្នាំ និងទី២- ឈ្មោះ សៀង សុភា ភេទប្រុស ជនជាតិខ្មែរ អាយុ ៣១ឆ្នាំ ជាអ្នកទោសជាប់ពន្ធនាគារស្រាប់ទៅហើយ ពីបទជួញដូរគ្រឿងញៀន ដល់ពេលឥឡូវត្រូវបន្ថែមទោសពីលើមួយកំរឹតបន្ថែមទៀត ពីលើទោសដែលមានស្រាប់ ខណៈដែលពួកគេទាំងពីរនាក់ ព្យាយាមប្រព្រឹត្តធ្វើសកម្មភាពរក្សាទុក និងចែកចាយគ្រឿងញៀន នៅក្នុងពន្ធនាគារខេត្ត ។
ក្រោយពេលដែលមន្ត្រីពន្ធនាគារ ឃាត់ខ្លួនជនសង្ស័យទាំងពីរ បានឆេកឆេររកឃើញវត្ថុតាង និងដកហូត បានថ្នាំញៀនប្រភេទ មេតំហ្វេតាមីន (Ice) ចំនួន ៤កញ្ចប់ធំ ១៣កញ្ចប់មធ្យម និង ២២កញ្ចប់តូច សរុបមានចំនួន ៣៩កញ្ចប់ ស្មើនឹងទម្ងន់ ១៨,៦៤ក្រាម ។
លោក គង់ ស៊ីដន់ ប្រធានការិយាល័យប្រឆាំបទល្មើសគ្រឿងញៀននៃស្នងការនគរបាលខេត្ត បានឲ្យដឹងថា តាមរយះព័ត៌មានដែលទទួលបានពីភ្នាក់ងារផ្តល់ព័ត៌មាន រាយការណ៍ថាមានការប្រើប្រាស់គ្រឿងញៀនក្នុងពន្ធនាគារខេត្តក្រចេះ មន្ត្រីជំនាញពន្ធនាគារ សហការជាមួយមន្ត្រីជំនាញការិយាល័យប្រឆាំងគ្រឿងញៀន ធ្វើការស្រាវជ្រាវស៊ើបអង្កេតឈានទៅចាប់បង្ក្រាបជាក់ស្តែង ដូចមានបញ្ជាក់ខាងលើ ។
បច្ចុប្បន្ន ការិយាល័យប្រឆាំងគ្រឿងញៀន កំពុងកសាងសំណុំរឿងតាមនីតិវិធី ដើម្បីបញ្ជូនទៅសាលាដំបូងខេត្តក្រចេះ ៕
