រាជធានីភ្នំពេញ៖ លោក ធន សារ៉ាយ ប្រធានសមាគមអាដហុក (ADHOC) និងលោកស្រី ឆាយ សុវណ្ណត្រូវបានលោកគង់វិបុលអគ្គនាយកដ្ឋានពន្ធដារ ដាក់ពាក្យប្ដឹង ទៅអង្គភាពប្រឆាំងអំពើពុករលួយ(ACU) ដោយចោទថាបានគេចវេសមិនព្រមបង់ពន្ធថ្លៃឈ្នួលផ្ទះជូនរដ្ឋ កាលពីឆ្នាំ២០១៥ និងឆ្នាំ២០១៦។ តែខាងអង្គភាពប្រឆាំងអំពើរពុករលួយប្រកែកថាមិនមែនសមត្តកិច្ចខ្លួនទេ។
លោកទេសរដ្ឋមន្ត្រី ឱម យ៉ិនទៀង បានលើកឡើងប្រាប់កាសែតថា ពីរនាក់ប្តីប្រពន្ធ គឺលោក ធន សារ៉ាយ និងភរិយាលោកស្រី ឆាយ សុវណ្ណ ពិតជាបានជួលផ្ទះរបស់ខ្លួន ឲ្យទៅអង្គការរបស់ខ្លួនមែន ហើយបានបង់ពន្ធកាត់ទុកគ្រប់ចំនួន។ តែប្រសិនបើអ្នកទាំងពីរ មិនបានបង់ពន្ធទេ នោះវាជាបទល្មើស ស្ថិតក្នុងសមត្ថកិច្ចរបស់អគ្គនាយកដ្ឋានពន្ធដារ មិនស្ថិតក្នុងសមត្ថកិច្ចរបស់ អង្គភាពប្រឆាំងអំពើពុករលួយទេ។
បើតាមលិខិតរបស់អង្គភាពប្រឆាំងអំពើពុករលួយ ចុះថ្ងៃទី០២សីហា បានឲ្យដឹងថា អង្គភាពបានទទួលពាក្យ បណ្តឹងកាលពីថ្ងៃ១៩ ខែមិថុនា ឆ្នាំ២០១៨ ដោយចោទប្រកាន់លោកស្រី ឆាយ សុវណ្ណ និងលោក ធន សារាយ គេសវេសមិនព្រមទៅបង់ពន្ធកាត់ទុកជូនរដ្ឋ លើថ្លៃឈ្នួលផ្ទះរបស់ខ្លួន ដែលបានជួលឲ្យសមាគម អាដហុក កាលពីឆ្នាំ២០០៥-២០០៦។
អង្គភាពប្រឆាំងអំពើពុករលួយបញ្ជាក់ថា តាមការប្រមូលព័ត៌មាន នៃការគ្រប់គ្រងអចលនទ្រព្យ និងការបំពេញកាតព្វកិច្ចសារពើពន្ធលើឈ្នួលផ្ទះ និងដីស្ថិតនៅក្នុងភូមិសាស្ត្រ នៃការគ្រប់គ្រងប្រមូលពន្ធ របស់សាលាពន្ធដារខណ្ឌដូនពេញ បានបង្ហាញថា អាសយដ្ឋានផ្ទះលេខ៣ ផ្លូវលេខ១៥៨ សង្កាត់បឹងរាំង ខណ្ឌដូនពេញ បានចុះបញ្ជីពន្ធដារនៅថ្ងៃទី២៤ ខែវិច្ឆិកា ឆ្នាំ២០១១ បានជួលទៅឲ្យសមាគមអាដហុក តំណាងដោយ លោក គា អ៊ិន ចុះនៅថ្ងៃ១ ខែមករា ឆ្នាំ២០១៦ ក្នុងមួយខែតម្លៃឈ្នួល ៩.២០០.០០០រៀល ។
ផ្អែកតាមប្រព័ន្ធគ្រប់គ្រង ទិន្នន័យរបស់អគ្គនាយកដ្ឋាន ពន្ធដារបានចាប់ផ្តើមដាក់ដំណើរការ ពីខែមករា ឆ្នាំ២០១៦ មកបង្ហាញថា ម្ចាស់ផ្ទះជាកម្មសិទ្ធិករខាងលើ ក៏បានបំពេញកាតព្វកិច្ចសារពើពន្ធ ដោយបានបង់ប្រាក់ពន្ធ កាត់ទុកលើឈ្នួលផ្ទះ និងដីចំនួន១០ភាគរយ ៩២០.០០០រៀល ស្មើនឹង២៣០ដុល្លារអាមេរិក ក្នុងមួយខែសម្រាប់ឆ្នាំ២០១៦ បានត្រឹមត្រូវ ។ ចំពោះទិន្នន័យក្នុងឆ្នាំ២០១៥វិញ អគ្គនាយកដ្ឋានពន្ធដារមិនមានទេ ព្រោះមិនទាន់បានដាក់ ឲ្យប្រើប្រាស់ប្រព័ន្ធ Single Invoices នៅឡើយ ។
គេនៅមិនទាន់អាចស្វែងរកឬមានការបកស្រាយណាមួយពីលោក ធន សារ៉ាយ ប្រធានសមាគមអាដហុកនិងលោកស្រី ឆាយ សុវណ្ណជាភរិយា នៅឡើយទេ ។ ផ្ទុយទៅវិញ លោក គង់ វិបុល ក្រោយពីបែកធ្លាយរឿងនេះក៏បានចេញសេចក្តីថ្លែងការណ៍មួយបដិសែធនិងចោទវិទ្យុធាស៊ីសេរីថាមិនយល់ពីការងារពន្ធដារ?៕
