ខេត្តក្រចេះ ៖ ករណីហិង្សាដោយចេតនាមួយកើតឡើងដោយសារទាមទាម៉ាស៊ីនត្រង់ស៊ីន័រឈានដល់ទាស់សម្តីគ្នាបណ្តាលឲ្យមនុស្សម្នាក់របួសធ្ងន់នៅចំណុចភូមិជ្រោះជ្រៅពោធិសាល ឃុំគ្រញូងសែនជ័យ ស្រុកស្នួលខេត្តក្រចេះ កាលពីរសៀលថ្ងៃទី៣១ខែកក្កដាឆ្នាំ២០១៨នេះ ។
មន្ត្រីនរគបាលស្រុកស្នួលបានឲ្យដឹងថា ជនរងគ្រោះឈ្មោះ សយ ចិន្តា ភេទប្រុស អាយុ៣៣ឆ្នាំ ជនជាតិខ្មែរ រស់នៅភូមិជ្រោះជ្រៅពោធិសាល ឃុំគ្រញូងសែនជ័យ ស្រុកស្នួល ខេត្តក្រចេះ, រងរបួសត្រង់ចង្កេះខាងឆ្វេង និង ប្រអប់ដៃខាងឆ្វេង បណ្ដាលអោយដាច់ហូរចេញឈាម ។ ឯជនសង្ស័យឈ្មោះ យ៉ាន់ ជា ភេទប្រុស អាយុ២៨ឆ្នាំ ជនជាតិខ្មែរ រស់នៅចំណុចត្រពាំងឈូក ភូមិស្រែថ្មី ឃុំឃ្សឹម ស្រុកស្នួល ខេត្តក្រចេះ (បានរត់គេចខ្លួនបាត់) ។
មន្ត្រីនគរបាលស្រុកបានបន្តទៀតថាមុនពេលកើតហេតុ ជនសង្ស័យឈ្មោះ យ៉ាន់ ជា បានមកទារ ម៉ាស៊ីនត្រង់ស៊ីណឺសម្រាប់អារឈើពីជនរងគ្រោះឈ្មោះ សយ ចិន្តា (ត្រូវជាបងថ្លៃរបស់ជនសង្ស័យ) វិញ ប៉ុន្តែពេលនោះជនរងគ្រោះមិនព្រមអោយទៅជនសង្ស័យវិញ បន្ទាប់មកពួកគេទាំងពីរនាក់ បានឈ្លោះប្រកែក ពាក្យសម្ដីគ្នាយ៉ាងខ្លាំង ពេលនោះជនរងគ្រោះបានវាយទៅជនសង្ស័យមួយដៃ ភ្លាមនោះដោយជនសង្ស័យបានខឹងខ្លាំងពេក ក៏បានស្ទុះទៅទាញកាំបិទផ្គាក់ ដែលខ្លួនដាក់តាមម៉ូតូ យកទៅកាប់លើជនរងគ្រោះ ចំនួនពីរកាំបិត ត្រូវត្រង់ចង្កេះខាងឆ្វេងមួយកាំបិត និង ត្រូវត្រង់ប្រអប់ដៃខាងឆ្វេងមួយកាំបិត បណ្ដាលអោយដាច់ហូរចេញឈាមយ៉ាងខ្លាំង បន្ទាប់មកជនរងគ្រោះបានស្រែកអោយគេជួយ ភ្លាមនោះក៏មាន ប្រជាពលរដ្ឋក្បែរនោះ បានរត់មកជួយ ប៉ុន្តែជនសង្ស័យបានជិះម៉ូតូរត់គេចខ្លួនបាត់ ដោយបោះកាំបិតផ្គាក់ចោលនៅលេីចិញ្ចេីមផ្លូវ ឆ្ងាយពីផ្ទះជនរងគ្រោះចម្ងាយប្រវែង ៥០ ម៉ែត្រ បន្ទាប់មកបងប្អូនសាច់ញាតិជនរងគ្រោះបានបញ្ជូនជនរងគ្រោះ ទៅព្យាបាលនៅមន្ទីរពេទ្យនៅឯប្រទេសវៀតណាម។
បច្ចុប្បន្ន សមត្ថកិច្ចជំនាញ បានចុះមកដល់កន្លែងកើតហេតុ ពិនិត្យ និង ស្រាវជ្រាវតាមចាប់ខ្លួនជនសង្ស័យ កសាងសំណុំរឿងបញ្ជូនទៅការិយាល័យជំនាញខេត្តបន្តតាមនីតិវិធី៕
ដោយ កិះ ខន ក្រចេះ
