ខេត្តក្រចេះ ៖ កុមារី 3នាក់ក្នុងចំណោម 5នាក់ 2 នាក់ត្រូវបានលង់ទឹកបឹងស្លាប់ និងម្នាក់ទៀត ត្រូវបានជួយសង្គ្រោះទាន់ពេលវេលា។ ហេតុការណ៍នេះបានកើតឡើងនៅវេលាម៉ោង11.00នាទីថ្ងៃទី27 កក្កដា 2018 នៅចំនុចក្រោយភូមិថ្មីទី1 ឃុំ ខ្សាច់អណ្ដែត ស្រុកឆ្លូង ខេត្ដក្រចេះ។
លោក ឆុង តូរ៉ាន់ អធិការស្រុកឆ្លូង បានអោយដឹងថា នៅមុនពេលកើតហេតុ មាន ក្មេងស្រីមួយក្រុមមានគ្នា 5 នាក់ បាននាំគ្នាទៅលេងទឹកបឹង នៅចំណុចកើតហេតុខាងលើ បណ្ដាលអោយក្មេងស្រី 2 នាក់បានលង់ទឹកស្លាប់ និងម្នាក់ទៀតត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យបង្អែកស្រុកឆ្លូង បានទាន់ពេលវេលា។
លោកអធិការស្រុកឆ្លូង បានដឹងថា កុមារីរងគ្រោះទាំង 3នាក់ ទី1 មានឈ្មោះ សុឹង ស៊ុនណារី ភេទ ស្រី អាយុ10ឆ្នាំ មានទីលំនៅភូមិថ្មីទី1 ឃុំខ្សាច់អណ្ដែត ស្រុកឆ្លូង ខេត្ថក្រចេះ ( ស្លាប់ ) ទី2 ឈ្មោះ អៀម ម៉េងហួយ ភេទ ស្រី អាយុ 12ឆ្នាំ មានទីលំនៅ ជាមួយគ្នា ( ស្លាប់ ) និងទី3 ឈ្មោះ សិត នីត ភេទ ស្រី អាយុ 11ឆ្នាំ មានទីលំនៅ ជាមួយគ្នា ត្រូវបានបងប្អូនដឹកមកមន្ទីរពេទ្យបង្អែកស្រុកឆ្លូងជួយសង្គ្រោះរួចផុតជីវិត ។
លោកអធិការស្រុកឆ្លូង បានបញ្ជាក់ពីមូលហេតុដែលបណ្ដាលឱ្យកុមារីលង់ទឹកស្លាប់ នឹងរងគ្រោះថ្នាក់ គឺបណ្ដាលមកពី ក្មេងទាំងនោះនាំគ្នាទៅលេងទឹកបឹង។ ក្រោយពីកម្លាំងជំនាញពិនិត្យរួចក្មេងទាំងពីរនាក់ស្លាកមប់ដោយការលង់ទឹកពិតប្រាកដមែន សាកសពបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី៕ ដោយ កិះខនក្រចេះ