ភ្នំពេញ៖ អភិបាលរាជធានីភ្នំពេញ លោក ឃួង ស្រេង នៅព្រឹកថ្ងៃទី២៦ កក្កដា ឆ្នាំ២០១៨នេះបានសន្យាជាមួយប្រជាពលរដ្ឋ រស់នៅ សហគមន៍អន្លង់គង ក្នុងភូមិអន្លង់គងថ្មី សង្កាត់ព្រៃស ខណ្ឌដង្កោថានឹងស្ថាបនាផ្លូវបេតុងជូនក្រោយការបោះឆ្នោត។
ក្នុងឱកាសចុះត្រួតពិនិត្យសួរសុខទុក្ខ ប្រជាពលរដ្ឋរស់នៅ សហគមន៍អន្លង់គង លោកអភិបាលរាជធានី បានលើកឡើងថា នឹងស្ថាបនាផ្លូវបេតុង ចំនួន៣ខ្សែ រួមនិងការដាក់លូ ជូនប្រជាពលរដ្ឋ ខណៈដែលផ្លូវ៣ខ្សែនេះ កំពុងឈូសឆាយនៅឡើយ ។លោក ឃួង ស្រេង បានបញ្ជាក់ថា ក្នុងនាមជាអាជ្ញាធរដែនដី មានភារកិច្ចមួយដែរ នោះគឺចលនាប្រជាពលរដ្ឋ ឲ្យទៅបោះឆ្នោតនៅ ថ្ងៃទៅ២៩ កក្កដា ខាងមុខនេះ ហើយបើក្រោយបោះឆ្នោត ប្រជាពលរដ្ឋ ក្នុងសហគមន៍នេះ មានប្រឡាក់ថ្នាំជ្រលក់ដៃ ដែលបញ្ជាក់ពីការ ទៅចូលរួមបោះឆ្នោតហើយនោះ រដ្ឋបាលរាជធានី នឹងស្ថាបនាផ្លូវបេតុងជូនតែម្តង ។
លោក ឃួង ស្រេង ក៏បានអញ្ជើញបន្ត ទៅសួរសុខទុក្ខ ប្រជាពលរដ្ឋ ដែលទទួលរងការលិចលង់ ដោយទឹកជំនន់ទឹកភ្លៀង នៅសង្កាត់សាក់សំពៅ ខណ្ឌដង្កោបន្តទៀតផងដែរ៕
