ខេត្តក្រចេះ៖ ស្នងការនគរបាលខេត្តក្រចេះ ប្រគល់រថយន្ត ស៊ីរ៉ែន ចំនួន 6គ្រឿង ដល់អធិការរដ្ឋានស្រុកក្រុងទាំង6 ក្រោមអធិបតីភាព ឯកឧត្តមនាយឧត្តមសេនីយ៍ គៀត ច័ន្ទថារិទ្ធ អគ្គស្នងការរង តំណាងដ៏ខ្ពង់ខ្ពស់របស់ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងឯកឧត្តម វ៉ា ថន អភិបាលនៃគណៈខេត្តក្រចេះ នាព្រឹកថ្ងៃទី 26 ខែកក្កដា ឆ្នាំ 2018។
លោកឧត្តមសេនីយ៍ទោ លន់ សុផាត ស្នងការនគរបាលខេត្តក្រចេះ បានមានមតិស្វាគមន៍ លើកឡើងថា ដោយមានការយកចិត្តទុកដាក់ខ្ពស់ពីឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន កន្លងមក ឯកឧត្តមបានផ្ដល់ជូននូវសម្ភារៈសម្រាប់ការពារដល់កងកម្លាំងអន្តរាគមន៍យ៉ាងច្រើនសន្ធឹកសន្ធាប់ ជាពិសេសនៅថ្ងៃទី 26នេះ ស្នងការដ្ឋាននគរបាលខេត្តក្រចេះទទួលបានរថយន្តស៊ីរ៉ែន ចំនួន 6 គ្រឿងសម្រាប់ដល់កិច្ចប្រតិបត្តិការការពារ សន្តិសុខសុវត្តិភាព និងសន្តិសុខសណ្តាប់ធ្នាប់សង្គម និង សន្តិសុខនយោបាយ និងសន្តិសុខសណ្តាប់ធ្នាប់់សាធារណៈ ក្នុងការបង្ក្រាបរាល់បទល្មើសផ្សេងៗនិង កិច្ចប្រតិបត្តិការជួយសង្គ្រោះ នៅឧបទ្ទវហេតុដែលកើតឡើងជាយថាហេតុ ក្នុងភូមិសាស្ត្ររបស់ខ្លួនដែលទទួលខុសត្រូវ។
លោកឧត្តមសេនីយ៍ទោ ស្នងការ បានបន្តថា នៅសល់តែរយៈពេល 3ថ្ងៃទៀតតែប៉ុណ្ណោះ។ ការបោះឆ្នោតជ្រើសតាំងតំណាងរាស្ត្រនិតិកាលទី 6 នឹងឈានចូលមកដល់ ហើយស្នងការដ្ឋាននគរបាលខេត្តក្រចេះ បានត្រៀមកម្លាំងអន្តរាគមន៍ចំនួន 200នាក់ និងកម្លាំងសម្រាប់ការពារ ការិយាល័យបោះឆ្នោត ទាំង 555 ការិយាល័យមានចំនួន1,284នាក់។ ដោយឡែកសម្រាប់កម្លាំងប្រជាការពារ ដែលត្រៀម អន្តរាគមន៍នៅតាមបណ្ដាស្រុកក្រុង និងប៉ុស្តិ៍នគរបាលរដ្ឋបាលមានចំនួន 744នាក់ នឹងបានសិក្សាអំពី ច្បាប់ក្រមសីលធម៌ និងនីតិវិធីនៃការបោះឆ្នោតផងដែរ។
ឯកឧត្តម នាយឧត្តមសេនីយ៍ គៀត ច័ន្ទថារិទ្ធ អគ្គស្នងការរង បានមានប្រសាសន៍សំណេះសំណាលនិងណែនាំដល់កងកម្លាំងទាំងអស់ ត្រូវលើកកំពស់ស្មារតីប្រុងប្រយ័ត្នជាប់ជានិច្ចក្នុងការត្រៀមអន្តរាគមន៍ទប់ស្កាត់បង្ក្រាបបានទាន់ពេល និងប្រកបដោយប្រសិទ្ធភាពចំពោះសកម្មភាពក្រុមប្រឆាំងខុសច្បាប់ និងពួកអមិត្តដែលប៉ុនប៉ង ឬបង្កភាពចលាចលតាមគ្រប់រូបភាព ពិសេសការកៀងគរប្រមូលកម្លាំងធ្វើបាតុកម្មខុសច្បាប់ អំពើហិង្សាក្នុងឧបាយកលបំផ្លិចបំផ្លាញការបោះឆ្នោត ។ ឯកឧត្តមនាយឧត្តមសេនីយ៍ បានបន្តថា កងកម្លាំងទាំងអស់ត្រូវមានវត្តមានប្រចាំការនៅក្នុងអង្គភាព ២៤ម៉ោងលើ២៤ម៉ោង ដោយផ្លាស់ប្ដូរគ្នាទៅបោះឆ្នោត និងត្រូវគ្រប់គ្រងថែរក្សា ត្រួតពិនិត្យមធ្យោបាយយានយន្ត អាវុធ គ្រាប់រំសេវ គ្រឿងសម្ភារបរិក្ខារ គ្រឿងបំពាក់ធានាបានគុណភាពក្នុងកិច្ចប្រតិបត្តិការ ។ ក្រោយចប់ការបោះឆ្នោត កម្លាំងដែលការពារការិយាល័យបោះឆ្នោតត្រូវប្រញាប់ប្រញាល់វិលត្រឡប់មកកាន់អង្គភាពវិញ ដើម្បីត្រៀមអន្តរាគមន៍ទ្រោលសភាពការណ៍រហូតដល់ការប្រកាសលទ្ធផលបោះឆ្នោតជាផ្លូវការបានចប់សព្វគ្រប់៕
