ភ្នំពេញ ៖ ដីនិងកំពង់ផែស្វយ័តភ្នំពេញដែលជប៉ុនជួយសាងសង់អស់រាបលានដុល្លារអាមេរិកចាប់ ពីគល់ស្ពានជ្រោយចង្វារមកដល់ផ្សាររាត្រីចាប់ពីថ្ងៃទីចុងខែមិនាឆ្នាំ២០១៨ត្រុវបានប្រគល់ក្រុមហ៊ុន ចៀន ឈឹង ថៃ គ្រុបគ្រប់គ្រងហើយ ដើម្បីអភិវឌ្ឍជា «មជ្ឈមណ្ឌលពាណិជ្ជកម្មចំរុះ The City Gate» ដោយមានមានតម្លៃជាង១៦លានដុល្លារសហរដ្ឋអាមេរិកសម្រាប់រយៈពេល៥០ឆ្នាំ។
បើតាមសេចក្ដីប្រកាសព័ត៌មានចុះថ្ងៃទី១៩កក្កដា របស់កំពង់ផែស្វយ័តភ្នំពេញ ដែលបណ្ដាញពតិមាន ទទួលបាន ឲ្យដឹងថា កិច្ចសន្យានេះ ត្រូវបានចុះហត្ថលេខា តាំងពីថ្ងៃទី២៩ ខែមិថុនា ឆ្នាំ២០១៨ ហើយមានកំណត់ក្នុង អនុក្រឹត្យលេខ ៣២ អនក្រ.បក ចុះថ្ងៃទី៩ ខែមីនា ឆ្នាំ២០១៨ ស្ដីពី ការធ្វើអនុបយោគទីតាំងដីបណ្ដោយទន្លេសាប ពីស្ពានជ្រោយចង្វារ មកដល់ផ្សាររាត្រី។
បើតាមកំពង់ផែស្វយ័តភ្នំពេញ បានឲ្យដឹងថា គម្រោងអភិវឌ្ឍន៍ជា «មជ្ឈមណ្ឌលពាណិជ្ជកម្មចំរុះ The City Gate»នេះ រួមមាន៖
* អគារបណ្ដុំការិយាល័យពាណិជ្ជកម្ម, * មជ្ឈមណ្ឌលសិល្បៈ* ទីធ្លាសម្ដែងវប្បធម៌សិល្បៈ* ទីធ្លាបាញ់ទឹក* របាំទឹក និងផ្សារអណ្ដែតទឹក* សួនកំពង់ផែ* ទីធ្លាកម្សាន្ដ និងសួនច្បារសាធារណៈ* មជ្ឈមណ្ឌលទេសចរណ៍* រាជធានីភ្នំពេញដ៏ឆ្លាតវៃ* ការិយាល័យបច្ចេកវិទ្យា * អគារស្នាក់នៅរួមបែបវប្បធម៌ * អាគារស្នាក់នៅរួមបែបច្នៃប្រឌិតទំនើប និងសណ្ឋាគារលំដាប់ផ្កាយប្រាំ
* សាលតាំងពិព័រណ៍ មជ្ឈមណ្ឌល បេតិកភណ្ឌអរូបី និងសិប្បកម្ម និងវិចិត្រសាល បែបវប្បធម៌ព្រះពុទ្ធសាសនា និងសកម្មភាពផ្សេងៗទៀត។
ក្នុងសេចក្ដីប្រកាសព័ត៌មាន បានបន្ថែមថា កិច្ចសន្យាជួលនេះ មានរយៈពេល៥០ឆ្នាំ ដោយគិតចាប់ពីថ្ងៃទី២៩ ខែមិថុនា ឆ្នាំ២០១៨ រហូតដល់ថ្ងៃទី២៨ ខែមិថុនា ឆ្នាំ២០៦៨។ ប្រាក់ឈ្នូលលើការជួសដីនេះ គឺជាការបង់ប្រាក់ឈ្នួលផ្ដាច់តែម្ដង ចំនួន១៦,៥០០,០០០ (ដប់ប្រាំមួយលាន ប្រាំរយពាន់) ដុល្លារអាមេរិក សម្រាប់រយៈពេល៥០ឆ្នាំ រួមបញ្ចូលទាំងអាករលើតម្លៃបន្ថែម (VAT) ចំនួន១០%។បានន័យថាក្នុង១ឆ្នាំបានជាង៣០ម៉ឺនដុល្លារអាមេរិកដែរ!៕