កំពង់ស្ពឺ៖ កំពស់ទឹកនៅសល់តែកន្លះម៉ែត្រទៀត នៅទ្វារទឹករលាំងជ្រៃ នឹងប្រកាសអាសន្នហើយ នេះបើតាមការអោយដឹងពី លោក ញ្ញ៉ាប់ ជាបហ៊ង ប្រធានមន្ទីរធនធានទឹក និងឧតុនិយម កាលពីវេលាម៉ោង២:៥៦ នាទី ថ្ងៃទី១៨ ខែកក្កដា ឆ្នាំ២០១៨ ។
លោក ញ្ញ៉ាប់ ជាបហ៊ង បានអោយដឹងថា បច្ចុប្បន្នផ្នែកខាងលើទ្វារទឹករលាំងជ្រៃ បានជន់លេចហើយ ជាហេតុតម្រូវអោយបើកទ្វារទឹកទាំងអស់ ដើម្បីកុំអោយជន់លេចខ្លាំង អញ្ជឹងទេបើទឹកនៅតែឡើងលើសពី៧ម៉ែត្រជាងទៅនៅទ្វារទឹករលាំងជ្រៃគឺនឹងត្រូវប្រកាសអាសន្ន ខណៈវេលានេះកំពស់ទឹកនៅកំរិតជាង៦ម៉ែត្រ ។
គួររំលឹកថា ទឹកលើសពី៧ម៉ែត្រជាងទៅគឺនឹងលិចផ្សារកំពង់ស្ពឺ ក៏ដូចជាតំបន់ជាច្រើនទៀត មានក្រុងច្បារមន ស្រុកសំរោងទង ស្រុកបសេដ្ឋ ស្រុកគងពិសី រហូតមកដល់ស្រុកអង្គស្នួល នៃខេត្តកណ្តាល ខណៈដែលបច្ចុប្បន្ននៅផ្នែកខ្លះនៃស្រុកភ្នំស្រួច កំពុងជនលេចទៅហើយ រហូតដល់កំណាត់ផ្លូវជាតិលេខ៤ត្រូវបានបិទចរាចរណ៍ទៀតផង ។
លោក វ៉ី សំណាង អភិបាលខេត្តកំពង់ស្ពឹកាលពីរសៀលថ្ងៃទី១៧ ខែកក្កដា ឆ្នាំ២០១៨នេះ បាន អំពាវនាវដល់ប្រជាពលរដ្ឋទាំងអស់ រួមទាំងភ្ញៀវជាតិ និងអន្តរជាតិ ដែលមានបំណងចង់ធ្វើដំណើរទៅខេត្តព្រះសីហនុ សូមវាងតាមផ្លូវជាតិលេខ៤១ និងឆ្ពោះទៅផ្លូវជាតិលេខ៣ ដោយសារតែកំណាត់ផ្លូវជាតិលេខ៤ នៅបន្តបិទចរាចរណ៍ជាបណ្តោះអាសន្ននៅឡើយ ដោយសារតែទឹកនៅបន្តជន់លិច។
អភិបាលខេត្តកំពង់ស្ពឺ រួមជាមួយមន្ត្រី និងកងកម្លាំង បានចុះទៅពិនិត្យមើលជាក់ស្តែងនូវស្ថានភាពទឹកលិចផ្លូវជាតិលេខ៤ ជាប់ព្រំប្រទល់រវាងខេត្តកំពង់ស្ពឺ និងស្រុកកំពង់សីលា ខេត្តកោះកុង ដែលទឹកនៅបន្តហូរកាត់មានកម្ពស់រហូតដល់ជាង១ម៉ែត្រ។បើតាមប្រសាសន៍ ឯកឧត្ដមអភិបាលខេត្ត សម្រាប់ខេត្តកំពង់ស្ពឺ នៅមិនទាន់មានការគំរាមកំហែងដោយសារតែជំនន់ទឹកភ្លៀងនេះទេ ប៉ុន្តែអាជ្ញាធរ និងសមត្ថកិច្ច បាននិងកំពុងត្រៀមវិធានការដោះស្រាយ ចំពោះគ្រោះធម្មជាតិមួយនេះហើយ។
ប្រជាពលរដ្ឋឲ្យដឹងថា ៖ មកដល់ថ្ងៃទី១៨ កក្កដា ឆ្នាំ ២០១៨ នៅភូមិបាក់អង្រុតឃុំដងពែងក្នុងខេត្តកោះកុង ទឹកជំនន់កំពុងឡើងយ៉ាងលឿន ដែលតាមមើលប្រហែលដោយសារការស្ទះនៅម្ដុំស្ពានមាឡ៉េ ភូមិព្រះអង្គកែវ ឃុំដងពែង៕
