កាលពីព្រឹកថ្ងៃទី17 ខែកក្កដា ឆ្នាំ2018 កន្លងទៅឯកឧត្តម គួច ចំរើន អភិបាលនៃគណអភិបាលខេត្តកំពង់ចាម បានដឹកនាំមន្ត្រីក្រោមឱវាទចុះទៅពិនិត្យស្ថាបនាសាងសង់ផ្លូវបេតុងមួយខ្សែប្រវែង16គីឡូម៉ែត្រ ស្ថិតនៅឃុំព្រែករំដេង ស្រុកស្រីសន្ធរ ខេត្តកំពង់ចាម ដែលជាអំណោយរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ។
នៅក្នុងឱកាសផងដែរ ឯកឧត្តម គួច ចំរើន បានមានប្រសាសន៍ទៅកាន់ប្រជាពលរដ្ឋនៅតំបន់នោះថា នេះជាចំណងដៃថ្មីមួយទៀត សម្រាប់បងប្អូនប្រជាពលរដ្ឋ ដែលរស់នៅក្នុងស្រុកស្រីសន្ធរ ក៏ដូចជាប្រជាពលរដ្ឋនៅទូទាំងព្រះរាជាណាចក្រកម្ពុជា ដែលឧស្សាធ្វើដំណើរឆ្លងកាត់ផ្លូវមួយខ្សែរនេះ ។ ពីដើមឡើយផ្លូវនេះ គឺជាប្រភេទផ្លូវដី ហើយលំបាកធ្វើដំណើរជាទីបំផុត ។
ឯកឧត្តម គួច ចំរើន បន្តថា ដោយយល់ឃើញនូវភាពលំបាករបស់បងប្អូនប្រជាពលរដ្ឋ និងដោយការអាណិតស្រឡាញ់ផងនោះ សម្តេចអគ្គមហាសេនាបតីតេជោ នាយករដ្ឋមន្ត្រីតាមរយៈឧកញ៉ា ថៃ ជាហួត ប្រធានក្រុមបូរីប៉េងហួត បានចំណាយថវិកាចំនួន ៦ លានដុល្លា សាងសង់ផ្លូវមួយខ្សែនេះឡើង ធ្វើពីបេតុងកម្រាស់ក្រាស់ ដើម្បីធានានូវគុណភាពប្រើប្រាស់ឲ្យបានយូអង្វែង សម្រាប់ជាចំណងដៃថ្មី មុនពេលបោះឆ្នោតសកល ២០១៨ ចូលមកដល់ ។
ដោយឡែក លោក អួរ គឹមអេង ហៅដើក ប្រធានអាចារ្យគណកម្មការវត្តស្វាយសាច់ភ្នំបានរៀបរាប់ប្រាប់អ្នកយកព័ត៌មានយើងថា សម្រាប់រូបលោក ក៏ដូចជាប្រជាពលរដ្ឋដែលរស់នៅដំបន់នេះផ្ទាល់ ក៏ដូចជាឯកឧត្តមអស់លោកដែលឧស្សាហ៍ធ្វើដំណើរតាមផ្លូវនេះ ពិតជាត្រេកអរសប្បាយចិត្តគ្រប់ៗគ្នា ដែលសម្តេចតេជោ ហ៊ុន សែន បានកសាងផ្លូវនេះឲ្យ ។ ព្រោះស្រុកនេះ តាំងពីដើមមក មិនដែលបានផ្លូវល្អបែបនេះឡើយ ។ ដូច្នេះហើយ ដើម្បីជាការតបស្នងសងគុណចំពោះសម្តេចតេជោ ហ៊ុន សែន ពួកយើងខ្ញុំទាំងអស់គ្នា និងទៅបោះឆ្នោតជូនគណបក្សប្រជាជន នៅថ្ងៃទី២៩ ខែកក្កដាខាងមុខនេះ គ្រប់ៗគ្នាជាក់ជាមិនខានឡើយ ។ និងសូមគោរពជូនពរ សម្តេច និងសម្តេចកិត្តិព្រឹទ្ធបណ្ឌឹត ព្រមទាំងក្រុមគ្រួសារ សូមឲ្យមានសុខភាពល្អ អាយុយឺនយូរ ដើម្បីដឹកនាំប្រទេសកម្ពុជាឲ្យបានយូរអង្វែងតទៅទៀត ៕