ក្រចេះ ៖ នៅព្រឹកថ្ងៃទី០១ ខែមិថុនា ឆ្នាំ២០១៦នេះ កម្លាំងនគរបាលនៃអធិការរដ្ឋានស្រុកសំបូរ បានបញ្ជូនខ្លួនជនសង្ស័យ ២នាក់ ជាប់ពាក់ព័ន្ធនឹងករណី២ផ្សេងៗគ្នា បញ្ជូនមក ការិយាល័យព្រហ្មទណ្ឌកំរិតធ្ងន់ នៃស្នងការដ្ឋាននគរបាលខេត្ត ដើម្បីកសាងសំនុំរឿងបញ្ជូនបន្តទៅតុលាការខេត្តក្រចេះ ចាត់ការតាមនីតិវិធីច្បាប់។
លោកវរ:សេនីយ៍ឯក កង សុវណ្ណី អនុការិយាល័យកណ្ដាលព្រហ្មទណ្ឌ បានឲ្យដឹងថា ជនសង្ស័យទី១ មានឈ្មោះ មាស មន អាយុ៤០ឆ្នាំ ជនជាតិខ្មែរ មានស្រុកកំណើត ភូមិដូនមាស ឃុំសំបូរ ស្រុកសំបូរ ខេត្តក្រចេះ (ដែលពាក់អាវស្រាបៀរកម្ពុជា សម្បុរខ្មៅ) ជាប់ពាក់ព័ន្ធករណីរំលោភសេពសន្ថវះលើកូនស្រីចុងរបស់ខ្លួនអាយុ ១៣ឆ្នាំ រហូតបានសម្រេច ហើយថែមទាំងគំរាមដល់ក្មេងស្រីរងគ្រោះថា បើហ៊ានប្រាប់រឿងនេះដល់ម្តាយ ជនសង្ស័យនឹងសំលាប់ចោលភ្លាម។
លោក បានបន្តថា ការចាប់ខ្លួនឪពុកចុង ចិត្តជាសត្វតិរច្ឆានរូបនោះ គឺសមត្ថកិច្ចបានធ្វើឡើងកាលព្រឹកថ្ងៃទី៣១ ខែឧសភា ឆ្នាំ២០១៦នេះ នៅចំណុចស្រែល្អក់ ក្នុងភូមិស្រែស្បូវ ស្រុកសំបូរ ខេត្តក្រចេះ ក្រោយពេលម្តាយក្មេងស្រីរងគ្រោះប្តឹងរាយការណ៍ទៅសមត្ថកិច្ចនគបាលមូលដ្ឋាន ប៉ុស្តិ៍ក្បាលដំរីរួចមក។
ដែលហេតុការខាងលើនេះ បានកើតឡើងកាលពីវេលាម៉ោង ៤រសៀលថ្ងៃទី២៧ ខែឧសភាកន្លងទៅ នៅក្នុងព្រៃសហគមន៍មួយកន្លែង ឋិតនៅក្នុងស្រុកសំបូរ ខណះដែលក្មេងស្រីរងគ្រោះរូបនោះ ត្រូវបានឪពុកចុងចិត្តជាសត្វតិរច្ឆាន បបួលចូលព្រៃកាប់ឈើ ដើម្បីដាំបាយឲ្យ។
ដោយឡែកករណីមួយផ្សេងទៀត គឺករណីហឹង្សាដោយចេតនា មានស្ថានទម្ងន់ទោស ដោយជនសង្ស័យ មានឈ្មោះ សា កក អាយុ ៤១ឆ្នាំ ជនជាតិខ្មែរឥស្លាម មានទីលំនៅភូមិពង្រ ឃុំពង្រ ស្រុកឆ្លូង ខេត្តក្រចេះ បានវាយតបប្រពន្ធខ្លួនឯងឈ្មោះ មីន ស៊ីម៉ាស់ បណ្ដាលឲ្យគ្រាំគ្រារហូតដល់បាត់បង់ជីវិត។
ដោយហេតុការនេះដែរ បានកើតឡើងកាលពីថ្ងៃទី១៣ ខែឧសភាកន្លងទៅ នៅចំណុចភូមិពង្រ ឃុំពង្រ ស្រុកឆ្លូង ខេត្តក្រចេះ បន្ទាប់ពីវាយទៅលើប្រពន្ធហើយ ជនសង្ស័យ បានឌុបប្រពន្ធយកមកទុកចោលនៅផ្ទះឳពុកម្ដាយក្មេក នៅចំណុចភ្នំខៀវ ភូមិអូរព្រះ ឃុំអូរគ្រៀង ស្រុកសំបូរ។ ក្រោយពេលដែលជនសង្ស័យជាប្ដី ប្រើអំពើហឹង្សាទៅលើប្រពន្ធ ដែលជាស្ដ្រីរងគ្រោះ ត្រូវបានឳពុកម្ដាយរបស់ខ្លួន យកទៅសង្គ្រោះបន្ទាន់នៅប្រទេសវៀតណាម ប៉ុន្តែរយៈពេល៥ថ្ងៃក្រោយមក ដោយសារអាការៈស្ត្រីរងគ្រោះ មានសភាពធ្ងន់ធ្ងរខ្លាំងពេកមិនអាចព្យាបាលបាន ក៏ត្រូវបានក្រុមគ្រួសារយកត្រឡប់មកស្រុកវិញ ហើយបានដាច់ខ្យល់ស្លាប់នៅតាមផ្លូវ ហើយត្រូវបានក្រុមគ្រួសារយកទៅធ្វើបុណ្យតាមប្រពៃណី និងបានដាក់ពាក្យបណ្ដឹងទៅប៉ុស្ដី៍រដ្ឋបាលមូលដ្ឋានឃុំអូរគ្រៀង។
លោកវរៈសេនីយ៍ឯក កង សុវណ្ណី បានបញ្ជាក់ថា ក្រោយពីទទួលបានសេចក្ដីរាយការណ៍ពីមូលដ្ឋានភ្លាម លោកបានបញ្ជារឲ្យកម្លាំងអធិការស្រុកសំបូរ ចាប់ឃាត់ខ្លួនជនសង្ស័យកាលពិថ្ងៃទី៣១ ខែឧសភានេះ ដើម្បីធ្វើការសួរចម្លើយ តែត្រូវបានជនសង្ស័យធ្វើការបដិសេធន៍។
បច្ចុប្បន្នជនសង្ស័យទាំង ២ នាក់ កំពុងឋិតនៅក្នុងការឃុំខ្លួនបណ្ដោះអាសន្ន នៅការិយាល័យព្រហ្មទណ្ឌកម្រិតធ្ងន់ នៃស្នងការរដ្ឋាននគរបាលខេត្ត ដើម្បីកសាងសំនុំរឿងតាមនីតិវិធីបញ្ជូនបន្តទៅសាលាដំបូងខេត្តក្រចេះចាត់ការ ទៅតាមនីតិវិធីច្បាប់៕
ដោយ កិះ ខន
