ក្រចេះ ៖ ទីតាំងផលិតស្រាសមួយកន្លែងត្រូវបានកម្លាំងនគរបាលប្រឆាំងបទល្មើសសេដ្ឋកិច្ច ខេត្តក្រចេះនិងនគរបាលស្រុកស្រុកសំបូរដឹកនាំដោយលោកជា សុភក្រ័ ព្រះរាជ្ញារងអមសាលាដំបូងខេត្តក្រចេះសហការជាមួយមន្ទីរជំនាញចុះបិទផ្អាកការផលិតនៅរសៀលថ្ងៃសៅរ៍២កើតខែទុតិយាសាធឆ្នាំចព.ស ២៥៦២ត្រូវនឹងថ្ងៃទី១៤ ខែកក្កដាឆ្នាំ២០១៨ ។
ការចុះបិទទីតាំងផលិតស្រាសនៅចំណុចភូមិថ្មី ឃុំសណ្ដាន់ ស្រុកសំបូរ ខេត្តក្រចេះនោះបន្ទាប់ពីមានករណីស្លាប់ស្ត្រី៣នាក់នឹងជាង៤០នាក់ផ្សេងទៀតរងគ្រោះចូលពេទ្យដោយសង្ស័យថាមានសាធាតុពុលបន្ទាប់ពីហូបចុក នៅក្នុងពិអីបុណ្យសពអ្នកភូមិមួយ នៅភូមិស្នួលវត្តកើត ឃុំស្នួល ស្រុកស្នួល ខេត្តក្រចេះនៅវេលាល្ងាចថ្ងៃទី១៣ ខែកក្កដា ឆ្នាំ២០១៨ ។
មុននឹងឈានដល់បិទទីតាំងផលិតស្រាសនោះគឺកម្លាំងនគរបាលសេដ្ឋកិច្ចបានចុះទៅដល់កន្លែងកើតហេតុដែលមនុស្សពុលស្រាសស្លាប់ចំនួន២នាក់នៅស្រុកស្នួលសួរនាំរកមូលហេតុក៏រកឃើញទីតាំងផលិតស្រាសនោះ ហើយបានហៅម្ចាស់ផ្ទះធ្វើកិច្ចសន្យាបញ្ឈប់បិទស្រាស នោះបណ្ដោះអាសន្នសិន។ សមត្តកិច្ចឲ្យដឹងថាម្ចាស់ទីតាំងផលិតស្រាសនោះមានឈ្មោះស្រស់ ធា ភេទប្រុសអាយុ៤៩ឆ្នាំមានទីលំនៅភូមិថ្មីឃុំសណ្ដាន់ស្រុកសំបូរខេត្តក្រចេះ ។
ក្នុងពិធីសំណេះសំណាលជាមួយបងប្អូនប្រជាពលរដ្ឋសមាជិកគណបក្ស ប្រជាជនកម្ពុជានៅក្នុងឃុំជ្រោយបន្ទាយស្រុកព្រែកប្រសព្វខេត្តក្រចេះ កាលពីព្រឹកថ្ងៃទី ១៥ ខែកក្កដាឆ្នាំ២០១៨ នេះលោកវ៉ាវ៉ានថនចៅហ្វាយខេត្តក្រចេះបានអំពាវនាវឲ្យប្រជាពលរដ្ឋប្រុងប្រយ័ត្នក្នុងការទទួលទានស្រាសរបងផ្ដាំដល់អ្នកបិតស្រាទាំងអស់កុំឲ្យយកមេមកលាយដែលខុសធ្វើឲ្យប៉ះពាល់ដល់សុខភាពប្រជាពលរដ្ឋ ។
លោកអភិបាលខេត្តក៏ស្នើឲ្យសមត្ថកិច្ចដែលមានការពាក់ព័ន្ធត្រូវត្រួតពិនិត្យនៅក្នុងការនាំចូលមេដំបែរ និងទីតាំងការផលិតស្រាសគ្រប់ ទីកន្លែង ហើយត្រូវតែអប់រំណែរនាំដល់អ្នកនោះក្នុងការផលិត ទប់ស្កាត់ជៀសវាងផលប៉ះពាល់ដល់សុវត្ថិភាពសុខភាពរបស់ប្រជាពលរដ្ឋ ។ព្រោះនេះជាលើកទី៦ ហើយករណីពុលស្រាសនៅតាមបណ្ដាស្រុកមួយចំនួននៅក្នុងខេត្តក្រចេះដែលបង្កឲ្យមានមនុស្សស្លាប់ជាបន្តរបន្ទាប់អ្នកនឹងប៉ះពាល់ដល់សុខភាពរបស់ប្រជាពលរដ្ឋរាប់រយនាក់ផងដែរ។
ទោះជាយ៉ាងណាទង្វើរបស់សមត្តិកិច្ចខេត្តក្រចេះត្រូវបានប្រជាពលរដ្ឋនិយាយថាគោបាត់ហើយបាននាំគ្នាធ្វើរបងព្រោះករណីយ៍ពុលស្លាប់ប្រជាពលរដ្ឋបណ្តាល់មកពីចំណីអាហារមិនមែនទើបកើតម្តងហ្នឹងណាតែគេមិនដែលឃើញមានលោក នី ឆុន ប្រធានមន្ទីរឧស្សាហកម្មនិង សិប្បកម្មមានវិធានការណ៍ទៅលើម្ចាស់អាជីវកម្ម សិប្បកម្មទាំង នោះសោះ ។ នេះមិននិយាយពីករណីយ៍ពុលទឹកដែលមន្ត្រីសុខាភិបាលថាពុលស្រាស្លាប់មនុស្ស១៣នាក់កាលពីខែឧសភាកន្លងទៅនោះផងទេ។ករណិយ៍នេះគេសង្ស័យថាខាងជំនាញនៃមន្ទីរឧស្សាហកម្មនិង សិប្បកម្មអាចមានប្រយោជន៍ពីពួកនោះក៏ថាបាន។ជាក់ស្តែង កាលពីថ្ងៃទី២៥ ខែឧសភា ឆ្នាំ2018ក៏មានករណីពុលនំប័ងមានប្រជាពលរដ្ឋរងគ្រោះជាង៧០នាក់ នៅភូមិកសាងឃុំចង្ក្រង់ស្រុកចិត្របុរី ខេត្តក្រចេះដែរ តែពុំមានអាជ្ញាធរពាក់ព័ន្ធ និងលោក នី ឆុន ប្រធានមន្ទីរឧស្សាហកម្មនិង សិប្បកម្ម មានចំណាត់ឡើយ ៕
