ក្រចេះ៖ សេចក្ដីរាយការ បានឲ្យដឹងថា យ៉ាងហោចណាស់មានមនុស្សប្រុសស្រីចំនួន ៣នាក់ បានរងរបួសធ្ងន់ធ្ងរ ក្នុងហេតុការគ្រោះថ្នាក់ចរាចដ៏គួឲ្យរន្ធត់មួយ រវាងរថយន្តយីឌុប និងរថយន្តតាកូម៉ា ហើយជនរងគ្រោះត្រូវបានសមត្ថកិច្ចបញ្ជូនយកទៅសង្គ្រោះបន្ទាន់នៅឯមន្ទីរពេទ្យបង្អែកខេត្តក្រចេះ ចំណែកឯអ្នកបើកបររថយន្តហ៊ីយាន់ដាយ បានរត់គេចខ្លួនបាត់។
លោក សូ សេរីវុទ្ធថុល នាយផ្នែកសណ្ដាប់ធ្នាប់នៃអធិការរដ្ឋាននគរបាលស្រុកព្រែកប្រសព្វ បានឲ្យដឹងថា ហេតុការណ៍គ្រោះថ្នាក់ចរាចនេះ បានកើតឡើងកាលពីវេលាម៉ោង ៧និង៤៥នាទីថ្ងៃទី២៦ ខែឧសភា ឆ្នាំ២០១៦ ឋិតនៅចំនុចអូរអង្គុញ ភូមិខ្សាច់ទុប ឃុំជ្រោយបន្ទាយ ស្រុកព្រែកប្រសព្វ ខេត្តក្រចេះ រវាងរថយន្តម៉ាកហ៊ីយាន់ដាយ ៣ផ្លូវ ពាក់ស្លាក់លេខ 3A-3419 បើកបរក្នុងទិសដៅបញ្ច្រាសទិសគ្នា ដោយបើកបរពីលិចទៅកើត និងរថយន្តតាកូម៉ា ពណ៌ទឹកប្រាក់ ពាក់ស្លាក់លេខភ្នំពេញ 2Y-3196 ជិះគ្នា ៣នាក់ រងរបួសធ្ងន់ទាំង ២នាក់ និងរបួសស្រាលម្នាក់ ។
លោក នាយផ្នែកសណ្ដាប់ធ្នាប់ បានបន្តឲ្យដឹងថា ជនរងគ្រោះទី១,ឈ្មោះ ឡុច រត្ន័ ភេទប្រុស អាយុ ២៧ឆ្នាំ របួសធ្ងន់ ទី២,ឈ្មោះ ស៊ីម លីដា ភេទស្រី អាយុ ២៧ឆ្នាំ របួសធ្ងន់ និងជនរងគ្រោះទី៣,ឈ្មោះ ហៃ ណែត ភេទប្រុស អាយុ ២៧ឆ្នាំ របួសស្រាល ជនរងគ្រោះទាំងបីនាក់ មានទីលំនៅភូមិស្វាយតាឡុក ឃអំពិលតាពក ស្រុកអូររាំងឳ ខេត្តត្បូងឃ្មុំ ត្រូវបានសមត្ថកិច្ចបញ្ជូនទៅព្យាបាលរបួសនៅឯមន្ទីរពេទ្យបង្អែកខេត្តក្រចេះ ។
លោក នាយផ្នែកសណ្ដាប់ធ្នាប់ បន្តឲ្យដឹងទៀតថា បច្ចុប្បន្ន សមត្ថកិច្ច កំពុងធ្វើការវាស់វែងកន្លែងកើតហេតុ និងនាំយករថយន្តទាំងពីរគ្រឿងនោះមករក្សាទុកនៅអធិការដ្ឋាននគរបាលស្រុកព្រែកប្រសព្វ ហើយសមត្ថកិច្ចកំពុងធ្វើការតាមដានស្រាវជ្រាវរកម្ចាស់រថយន្តភាគីម្ខាងទៀត ខាងម្ចាស់រថយន្តហ៊ីយាន់ដាយ ដើម្បីឲ្យចូលខ្លួនធ្វើការដោះស្រាយនិងសម្របសម្រួលតាមនីតិវិធីច្បាប់ ៕
ដោយ កិះ ខន
