ខេត្តក្រចេះ ៖ កម្លាំងនគរបាលការិយាល័យប្រឆាំងគ្រឿងញៀនឃាត់ខ្លួនជនសង្ស័យ០៦នាក់ពាក់ព័ន្ធជាមួយគ្រឿងញៀនជាច្រើនកញ្ចប់ហើយរក្សាទុកដោយខុសច្បាប់នូវសារធាតុញៀននឹងវត្ថុតាងមួយចំនួននៅចំណុចផ្ទះជួលក្រោយវត្តប៉ាឆាស្ថិតក្នុងភូមិត្រពាំងព្រីង សង្កាត់ក្រចេះក្រុងក្រចេះខេត្តក្រចេះកាលពីយប់ថ្ងៃទី១៣ខែកក្កដាឆ្នាំ២០១៨នេះ។
លោក គង់ ស៊ីដន ប្រធានការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តបានប្រាប់ឲដឹងថា ដោយអនុវត្តតាមការចង្អុលណែនាំរបស់ លោក លន់ សុផាត ស្នងការនគរបាលខេត្ត និងលោក កែវ សុជាតិ ព្រះរាជអាជ្ញា អមសាលាដំបូងខេត្តនឹង លោក ជា សុភក្ត្រ័ ព្រះរាជអាជ្ញារង បានដឹកនាំសម្របសម្រួលនីតិវិធីដល់កម្លាំងការិ.ប្រឆាំងគ្រឿងញៀនធ្វើការបង្ក្រាបករណីជួញដូរដោយខុសច្បាប់នូវសារធាតុញៀននឹងឃាត់ខ្លួនជនសង្ស័យប្រុសស្រីចំនួន០៦នាក់ជាមួយគ្រឿងញៀន០៤កញ្ចប់។
លោកបានទៀតបន្តថាការឃាត់ខ្លួនជនសង្ស័យចំនួន ០៦នាក់ (ស្រី៣នាក់) រួមមានឈ្មោះ ៖
១. ឈ្មោះ ទិន មិនា (ហៅពេជ្រ) ភេទប្រុស អាយុ៣៣ឆ្នាំ ជនជាតិខ្មែរ មុខរបររត់ម៉ូតូឌុប មានទីលំនៅជួលផ្ទះនៅចំណុចកើតហេតុខាងលើ
២. ឈ្មោះ តេង ស្រីណា (ហៅខ្នា) ភេទស្រី អាយុ ២៦ឆ្នាំ ជនជាតិខ្មែរ មុខរបរមេផ្ទះ (ប្រពន្ធរបស់ឈ្មោះ ទិន មិនា) មានទីលំនៅជួលផ្ទះនៅចំណុចកើតហេតុខាងលើ
៣. ឈ្មោះ តេង ញ៉ ភេទស្រី អាយុ ៣៨ឆ្នាំ ជនជាតិខ្មែរ មុខរបរមេផ្ទះ មានទីលំនៅភូមិត្រពាំងព្រីង សង្កាត់ក្រចេះ ក្រុងក្រចេះ
៤. ឈ្មោះ ថេង គឹមឈុន ភេទប្រុស អាយុ ៣៥ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅភូមិមានជ័យ ឃុំទឹកថ្លា ស្រុកស្វាយអន្ទរ ខេត្តព្រៃវែង ។
៥. ឈ្មោះ ទិន កញ្ញា ភេទស្រីអាយុ៣០ឆ្នាំ ជនជាតិខ្មែរ មុខរបរមេផ្ទះ មានទីលំនៅភូមិរវៀង ឃុំអន្លង់រាជ ស្រុកវាលវែង ខេត្តពោធិសាត់
៦. ឈ្មោះ ឈ្មោះ រស់ សាលី ភេទប្រុស អាយុ ៣៣ឆ្នាំ ជនជាតិខ្មែរ មុខរបរជាងឈើ (ប្តីរបស់ឈ្មោះ ទិន កញ្ញា) មានទីលំនៅភូមិរវៀង ឃុំអន្លង់រាជ ស្រុកវាលវែង ខេត្តពោធិសាត់ ។
ដោយដកហូតបានវត្ថុតាងរួមមាន ៖ ម្ស៉ៅក្រាមពណ៌សចំនួន០៤កញ្ចប់ (តូច០២&ធំ០២), ជញ្ជីងសំរាប់ថ្លឹងគ្រឿងញៀន ចំនួន០១,ថង់សំរាប់ច្រករំលែកគ្រឿងញៀនមួយចំនួនធំ,សំភារសំរាប់ជក់គ្រឿងញៀនមួយចំនួន, ទូរសព្ទ័ចំនួន 4គ្រឿង, ប្រាក់រៀលចំនួន ៥០ម៉ឺនរៀល, ម៉ូតូចំនួន ០២គ្រឿង (ម៉ាកស៊ីរូស០១គ្រឿង និងម៉ាកWave Rsx ចំនួន០១គ្រឿង) និង រថយន្តម៉ាក Camery បាឡែនពណ៌ទឹកមាស ពាក់ស្លាកលេខ ភ្នំពេញ 2J 3352 ចំនួន ០១គ្រឿង ។
ហើយបច្ចុប្បន្នជនសង្ស័យទាំង០៦នាក់ រួមនិងវត្ថុតាងទាំងអស់ កំពុងឃាត់ខ្លួន និងរក្សាទុកបណ្តោះអាសន្ននៅការិ.ប្រឆាំងគ្រឿងញៀន ដើម្បីធ្វើការសាកសួរ និងកសាងសំណុំរឿងតាមនីតិវិធីច្បាប់ ៕
ដោយ ម៉ែន បូរិទ្ធ