ខេត្តព្រះសីហនុ៖ ភ្ញៀវទេសចរ និងអាជីវករ រស់នៅក្រុងព្រះសីហនុ មានការព្រួយបារម្ភចំពោះ សកម្មភាព របស់ក្រុមបងតូចបងធំ ជនជាតិចិន ដែលដើរបង្កការអុកឡុកវ៉ៃកាប់ចាក់គ្នា នៅតាមហាងមួយចំនួន ក្នុងពេលរាត្រី នាទីប្រជុំជនក្រុងព្រះសីហនុ។
ជាក់ស្តែង កាលពីម៉ោងជាង១២ ពាក់កណ្តាលអធ្រាត្រ ឈានចូលថ្ងៃទី១៣ ខែកក្កដា ឆ្នាំ២០១៨ នៅក្រុមទី១៥ ភូមិ៤ សង្កាត់៤ ក្រុង-ខេត្តព្រះសីហនុ សមត្ថកិច្ចឃាត់ខ្លួនចិនជើងខ្លាំង បាន៥នាក់ពីបទបង្កហិង្សាដោយចេតនាកើតឡើង រវាងជនជាតិចិននិងជនជាតិចិនគ្នាឯង។
សមត្ថកិច្ចបានឲ្យដឹងថា នៅម៉ោងកើតហេតុខាងលើ មានជនជាតិចិនមួយក្រុម ខ្លះជិះរថយន្ត និងខ្លះទៀតជិះម៉ូតូកង់បី បាននាំគ្នាចូលទៅអុកឡុក និងវាយជនជាតិចិនដូចគ្នា នៅក្នុងកាស៊ីណូ វិមានខ្សាច់ស ។ កម្លាំងសមត្ថកិច្ចជំនាញពាក់ព័ន្ធ បានចុះទៅដល់កន្លែងកើតហេតុ និង ឃាត់ខ្លួនបានជនជាតិចិន ៥នាក់ ក្នុងនោះមានម្នាក់រងរបួសមធ្យមត្រូវបានបញ្ជូនទៅព្យាបាលនៅមន្ទីពេទ្យបង្អែកខេត្តព្រះ សីហនុ រីឯបក្ខពួករបស់គេផ្សេងទៀតបានរត់គេចខ្លួនអស់។
ដោយឡែក កាលពីវេលាម៉ោងប្រមាណ៣ជិតភ្លឺចូល ថ្ងៃទី១២ ខែកក្កដា ឆ្នាំ២០១៨ក៏ មានជនជាតិចិនមួយក្រុម បានមកអុកឡុកវ៉ៃកាប់ចាក់ នៅក្នុងហាង ៨៩៨ មានទីតាំងនៅទល់ មុខវិមានលំហែ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ឆ្នេរអូរឈើទាល ក្រុង-ខេត្តព្រះសីហនុ បង្កឲ្យមានការភ្ញាក់ផ្អើលដល់ភ្ញៀវទេចរដែលចូលមកទស្សនាមូលដ្ឋាននេះ..។តាមសកម្មភាពនេះថ្ងៃមុខក្រុងព្រះសីហនុដែលជាម្បុកកាស៊ីណូចិនមានហាងចិនអូតែលចិនព្រមទាំងផ្ទះបនចិននឹងក្លាយជាទីក្រុងម៉ាហ្វៀរបស់ជនជាតិចិនដូចនៅក្រុងម៉ាកាវជាមិនខាន៕
