ភ្នំពេញ ៖ បុរសម្នាក់ដែលគេស្គាល់ថាជាគ្រូពេទ្យបានបើកបររថយន្តបង្កគ្រោះថ្នាក់ចរា ចរណ៍២លើកទាំងកណ្តាលអធ្រាត្រកាលពីម៉ោងប្រមាណ១២យប់ ថ្ងៃទី៥ ខែកក្កដា ឆ្នាំ២០១៨ នៅត្រង់ចំណុចមុខផ្ទះសំណាក់មហាលាភ ខណ្ឌទួលគោក និងមួយចំណុចទៀតនៅមុខសណ្ឋាគារវ៉ាស៊ីនតោន ខណ្ឌជ្រោយចង្វា រាជធានីភ្នំពេញហើយប្រុងគេចខ្លួនតែមិនរួច ។
តាមអ្នកឃើញហេតុការណ៍និយាយថាគ្រូពេទ្យរូបនោះបានបើកបរ រថយន្តម៉ាកតូយ៉ូតាហាយឡែនឌ័រ ពណ៌ស ពាក់ស្លាកលេខភ្នំពេញ2AR-6163 បុកម៉ូតូ១គ្រឿង បណ្ដាលឲ្យមានអ្នករងរបួស ម្នាក់ នៅចំណុចមុខផ្ទះសំណាក់មហាលាភ ស្ថិតនៅក្នុងខណ្ឌទួលគោក តែមិនឈប់ ហើយព្យាយាមបើករត់គេច រហូតទៅបុកម៉ូតូ១គ្រឿងទៀត ម៉ាកស៊ុយហ្ស៊ុយគី ស្មាសរីវ៉ូ ពាក់ស្លាកលេខភ្នំពេញ1Y-9478 នៅផ្លូវជាតិលេខ៦ មុខសណ្ឋាគារវ៉ាស៊ីនតោន ក្នុងខណ្ឌជ្រោយចង្វា បណ្តាលឲ្យរងរបួសមនុស្សម្នាក់ទៀត ។
សាក្សីបន្តថា នៅពេលបើកបុកម៉ូតូ២គ្រឿងឲ្យខូចខាត និងមនុស្ស២នាក់ឲ្យរងរបួស មិន ព្រមឈប់ដោះស្រាយទេគាត់ បានព្យាយាមបើកគេចចូលទៅក្នុងភោជនីយដ្ឋានបឹងមាស ស្ថិតនៅតាមផ្លូវជាតិលេខ៦ សង្កាត់ព្រែកលៀប ខណ្ឌជ្រោយចង្វា ហើយបានទូរស័ព្ទ ហៅរថយន្តសង្គ្រោះមន្ទីរពេទ្យលោកសសង្ឃឲ្យមកទទួល ក្នុងគោលបំណងគេចពីការ ទទួលខុសត្រូវ តែត្រូវបានសមត្ថកិច្ច និងប្រជាពលរដ្ឋចាប់ឃាត់ទុកប្រគល់ឲ្យ សមត្ថកិច្ច ដោះស្រាយតាមច្បាប់ ៕
