បែលហ្សិក ៖ សមាជិកសភាអឺរ៉ុបចំនួន១៨ រូប កាលពីថ្ងៃទី ៤ ខែកក្កដា បានផ្ញើ លិខិតរួមមួយទៅកាន់គណៈកម្មការអឺរ៉ុប ដោយសម្តែងក្តីបារម្ភជុំវិញការវិវត្តិចុងក្រោយនៃស្ថានការណ៍នយោបាយនៅកម្ពុជា ការសង្កត់សង្កិនលើប្រព័ន្ធផ្សព្វផ្សាយ និងអង្គការសង្គមស៊ីវិលក្នុងស្រុក។ ទាក់ទងនឹងការបោះឆ្នោតនៅខែកក្កដា ខាងមុខនេះវិញ សមាជិកនៃសភាអឺរ៉ុប ចាត់ទុកជាការបោះឆ្នោតដែលមិនមានភាពស្របច្បាប់ដោយសារគ្មានវត្តមានអតីតគណបក្សសង្គ្រោះជាតិ។
ទន្ទឹមនឹងការសម្តែងនូវក្តីបារម្ភ សមាជិកសភាអឺរ៉ុប ចំនួន ១៨ នាក់ ក៏បានជម្រុញឱ្យសមាជិកសភាអឺរ៉ុប និងស្នងការសហភាពអឺរ៉ុប សើរើ និងត្រួតពិនិត្យមើលឡើងវិញ ចំពោះកាតព្វកិច្ចរបស់កម្ពុជា ក្រោមអនុសញ្ញា នៃបទប្បញ្ញត្តិស្ដីពីការផ្ដល់ប្រព័ន្ធអនុគ្រោះពន្ធ EBA។
ការជម្រុញរបស់សមាជិកសភាអឺរ៉ុបនាពេលនេះ ធ្វើឡើងខណៈគណៈប្រតិភូអឺរ៉ុប នឹងមកបំពេញទស្សនកិច្ច ដើម្បីស្វែងយល់ពីស្ថានការណ៍ជាក់ស្ដែងនៅកម្ពុជា ចាប់ពីថ្ងៃទី ៥ ដល់ថ្ងៃទី ១១ ខែកក្កដា នេះ។ ដំណើរទស្សនកិច្ចរបស់គណៈប្រតិភូអឺរ៉ុប ធ្វើឡើងដើម្បីពិនិត្យមើលឡើងវិញ ចំពោះការផ្តល់ប្រព័ន្ធអនុគ្រោះពន្ធដល់កម្ពុជាលើកលែងតែអាវុធ។
រាជរដ្ឋាភិបាល បានបញ្ជូនបេសកកម្មពិសេសមួយដឹកនាំដោយលោក សុក ស៊ីផាន់ណា ទីប្រឹក្សារាជរដ្ឋាភិបាលទៅកាន់សហភាពអឺរ៉ុប ដើម្បីបញ្ចុះបញ្ចូលនិង ទប់ស្កាត់ វិធានការដកប្រព័ន្ធអនុគ្រោះពន្ធ «គ្រប់មុខទំនិញលើកលែងគ្រឿងសញ្វវុធ» ពីប្រទេសកម្ពុជា (EBA) ។ បេសកកម្មបានចាប់ផ្តើមពីថ្ងៃទី១៨ ខែមិថុនា ដល់ថ្ងៃទី១ ខែកក្កដា ឆ្នាំ២០១៨ដើម្បីបំភ្លឺជូនមន្ត្រីជាន់ខ្ពស់សំខាន់ៗរបស់គណៈកម្មការអឺរ៉ុប ប្រធានគណៈកម្មាធិការកិច្ចការបរទេសរបស់សភាអឺរ៉ុប និងឥស្សរជនសំខាន់ៗផ្សេងទៀត។
តាមរយៈបេសកកម្មនេះ ក្រសួងការបរទេសកម្ពុជាចង់បង្ហាញពីសុឆន្ទៈ ចង់មានការសន្ទនាត្រង់ទៅត្រង់មក ពីព្រោះកម្ពុជាចាត់ទុកសហភាពអឺរ៉ុប ជាដៃគូដ៏សំខាន់ដែលមានកិច្ចសហប្រតិបត្តិការយ៉ាងរឹងមាំជាមួយកម្ពុជា។ប៉ុន្តែមិនមានពតិមានណាមួយបង្ហាញពីជោគជ័យឬបរាជ័យនោះឡើយ។
ឯពលរដ្ឋខ្មែរ ដែលកំពុងរស់នៅប្រទេសស្វីស កាលពីថ្ងៃទី ៣ ខែកក្កដា ក៏បាននាំគ្នាដាក់ញត្តិទៅប្រធានាធិបតីស្វីស ស្នើសុំកុំឲ្យដាក់ទណ្ឌកម្មណាមួយមកលើប្រទេសកម្ពុជា។ លិខិតដដែល បានបង្ហាញក្តីសង្ឃឹមបន្ថែមថា ប្រទេសស្វីសនឹងគាំទ្រដល់កម្ពុជា។ ហើយថា កម្ពុជា នឹងទទួលរងនូវវិបត្តិសេដ្ឋកិច្ចធ្ងន់ធ្ងរ ប្រសិនបើការដាក់ទណ្ឌកម្មត្រូវធ្វើឡើងដោយស្វីស ហើយអ្នករងគ្រោះនឹងធ្លាក់ទៅលើពលរដ្ឋក្រីក្រ ជាពិសេសកម្មករនិងកសិករនៅកម្ពុជា។
កាលពីចុងឆ្នាំ២០១៧ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានផ្តល់យោបល់ដល់លោកនាយករដ្ឋមន្ត្រី ឲ្យបញ្ជូនគណៈប្រតិភូកម្ពុជា ទៅបញ្ចុះបញ្ចូល សហភាពអឺរ៉ុប ម្តងរួចមកហើយ កុំឱ្យលុបចោលការនាំចេញរួចពន្ធដែលផ្តល់ដល់កម្ពុជា។ រដ្ឋមន្ត្រីក្រសួងពាណិជ្ជកម្ម សង្កត់ធ្ងន់ថា ការលុបចោលប្រព័ន្ធអនុគ្រោះពន្ធនេះ នឹងធ្វើឱ្យកម្ពុជា ខាតបង់ជាង ៦រយ លានដុល្លារ។
ឯ លោក កាំង ម៉ូនីកា អគ្គលេខាធិការរងសមាគមរោងចក្រកាត់ដេរនៅកម្ពុជា បានបញ្ជាក់ថា ភាពរីកចម្រើននៃវិស័យការងារនៅកម្ពុជា គឺជារឿងមួយដែលមិនអាចប្រកែកបាន ពិសេសលើលក្ខខណ្ឌការងារ និងការគោរពសិទ្ធការងារ។
លោក អាត់ ធន់ប្រធានសហជីព បានសំដែងការព្រួយបារម្ភ ថា កម្ពុជាអាចនឹងបាត់បង់ទីផ្សារដ៏ធំនៅអឺរ៉ុប ប្រសិនបើពួកគេផ្តាច់កិច្ចព្រមព្រៀងអនុគ្រោះពន្ធពីកម្ពុជា។ ផ្ទុយទៅវិញ ប្រទេសចិនកុម្មុយនិស្តបានប្រកាសគាំទ្រជាថ្មីទៀតម្តងទៀត ចំពោះដំណើរការបោះឆ្នោតជាតិ នៅចុងខែកក្កដានេះ។
សេចក្ដីប្រកាសព័ត៌មានរបស់ក្រសួងការបរទេសប្រទេសកម្ពុជា ចេញផ្សាយនៅថ្ងៃទី៤ កក្កដា នេះ ឱ្យដឹងថា លោក ហ៊ូ ហ្សេងហេ (Hu Zhenghue) អនុប្រធានសមាគមការទូតសាធារណៈ និងជាអតីតអនុរដ្ឋមន្ត្រីការបរទេសចិន បានថ្លែងដែលមកទស្សនៈគិច្ចនៅកម្ពុជាបានថ្លែងកាលពីថ្ងៃទី២កក្កដាថា៖ រដ្ឋាភិបាលចិនគាំទ្រយ៉ាងពេញលេញដល់ដំណើរការបោះឆ្នោតនៅកម្ពុជា និងបានថ្លែងកោតសរសើរដល់ការអភិវឌ្ឍសេដ្ឋកិច្ច និងសង្គម ដែលរបបលោក ហ៊ុន សែន សម្រេចបាន។ ការបញ្ជាក់ជំហររបស់រដ្ឋាភិបាលក្រុងប៉េកាំងក្នុងសេចក្ដីប្រកាសព័ត៌មាននេះ ធ្វើឡើងបន្ទាប់ពីមានជំនួបរវាងរដ្ឋមន្ត្រីក្រសួងការបរទេសកម្ពុជា លោក ប្រាក់ សុខុន និងលោក ហ៊ូ ហ្សេងហេ (Hu Zhenghue) កាលពីរសៀលថ្ងៃទី២ កក្កដា កន្លងទៅ ៕
