ក្រចេះ ៖ អាវុធហត្តខេត្តក្រចេះ សហការជាមួយអាវុធហត្ថស្រុកសំបូរ ដឹកនាំដោយលោក ឡុង យឹង ប្រធានមន្ទីរយុត្តិធម៌ដឹកនាំកម្លាំងចុះបង្រ្គាបឈើល្មើសច្បាប់ចំនួន ៣ ទូកជាច្រើនមែត្រគូប កាលពីសៀលថ្ងៃទី១៩ ខែឧសភា ឆ្នាំ២០១៦ នៅតាមច្រាំងទន្លេចំនុចភូមិអន្លង់ព្រះគោ ឃុំវឌ្ឍនៈ ស្រុកសំបូរ ខេត្តក្រចេះ ។
លោក ឡុង យឹង ប្រធានមន្ទីរយុត្តិធម៌បានដឹងថា ក្នុងចុះបង្រ្គាបនេះ ដោយមានការចង្អុលបង្ហាញ និងបទបញ្ជាដ៏តឹងរឹង របស់លោកឧត្តមសេនីយ៍ សាន្ដ ប៊ុនថាន មេបញ្ជាការអាវុធហត្តខេត្តក្រចេះ ទើបលោកឈានដល់ការឃាត់ទូកផ្ទុកឈើចំនួន ៣ គ្រឿង ជាប្រភេទក្ដារប្រមាណជិត៤០មែត្រគូប ប្រគល់ឲ្យជំនាញរដ្ឋបាលព្រៃឈើជាអ្នកចាត់ចែង ។ ហើយម្ចាស់ទូកមានគ្នាចំនួនបីនាក់ ទី១.ឈ្មោះ ស៊ុល ហះ ភេទប្រុសជនជាតិខ្មែរឥស្លាមអាយុ៤៣ឆ្នាំ ទី២.ឈ្មោះ សុះ ព្រែក ភេទប្រុសអាយុ៤៤ឆ្នាំ ជនជាតិខ្មែរឥស្លាម ទី៣.ឈ្មោះ សាន់ ម៉ូត ភេទប្រុសអាយុ៤៥ឆ្នាំ ជនជាតិខ្មែរឥស្លាម អ្នកទាំងបីនាក់រស់នៅភូមិជីនិក ឃុំជីនិក ស្រុកក្រូចឆ្មារ ខេត្តត្បូងឃ្មុំ ។
លោក ឃ្លាំង រត័ នាយសង្កាត់រដ្ឋបាលព្រៃឈើវឌ្ឍនៈបានឲ្យដឹងថា ឈើនិងទូកទាំងនេះ ត្រូវលោកនាយផ្នែករដ្ឋបាលព្រៃឈើព្រែកប្រសព្វបញ្ជាឲ្យនាំយកទៅរក្សាទុក នៅសង្កាត់រដ្ឋបាលព្រៃឈើជ្រូយបន្ទាយ ព្រោះសង្កាត់រដ្ឋបាលព្រៃឈើវឌ្ឍនៈទីតាំងតូចចង្អៀតពិបាកនិងលើកឈើយកទៅរក្សាទុក ចំណែកសង្កាត់រដ្ឋបាលព្រៃឈើជ្រួយបន្ទាយច្រាំងទន្លេរាងចំរាលងាយស្រួល និងលើកឈើដើម្បីធ្វើការវាស់វែង ៕