ត្បូងឃ្មុំ ៖ ផ្អែកតាម facebook ស្នងការដ្ឋាននគរបាលខេត្ត ត្បូងឃ្មុំបានឲ្យដឹងថា៖ នៅរសៀលថ្ងៃទី ០៣ កក្កដា ២០១៨ នេះកម្លាំងសមត្ថកិច្ចនគរបាលព្រហ្មទណ្ឌដឹកនាំដោយលោកឧត្តមសេនីយ៍ត្រី ប្រាក់ ប៊ុនណុន ស្នងការរង នៃស្នងការដ្ឋាននគរបាលខេត្ត ត្បូងឃ្មុំ និងអធិការដ្ឋាននគរបាលស្រុកមេមត់ ចំនួន២០នាក់ និងកម្លាំងកងរាជអាវុធហត្ថចំនួន៥នាក់ សំរបសំរួលពីតំណាងអយ្យការខេត្តត្បូងឃ្មុំដឹកនាំបញ្ជាផ្ទាល់ ដោយលោក ប៉ុក តារា ព្រះរាជអាជ្ញារងបានបើកប្រតិបត្តិការបង្ក្រាបជាក់ស្តែង និងស្រាវជ្រាវត្រួតពិនិត្យនូវឯកសារបែបបទដ្ឋានគតិយុត្តិផ្សេងៗ ដែលពាក់ព័ន្ធទៅនឹងការបើកកាស៊ីណូ ដែឥមានយីហា ” កាស៊ីណូឃ្លោប៊ល៦៩ ” មានទីតាំងនៅភូមិដារ កណ្តាល ស្រុកមេមត់ ខេត្តត្បូងឃ្មុំ ។
មន្ត្រីនគរបាលក្នុងប្រតិបត្តិការបង្ក្រាបករណីនេះបានអោយដឹងថា សមត្ថកិច្ចនឹងធ្វើការបង្ក្រាប នូវរាល់អំពើទាំងឡាយណា ដែលម្ចាស់ទីតាំង និងម្ចាស់អាជីវកម្មមិនបានបំពេញតាមបែបបទ លក្ខណ្ឌច្បាប់កំណត់ ។
ក្នុងប្រតិបត្តិការនេះ សមត្ថកិច្ចបានឃាត់មនុស្សកំពុងលេងល្បែងស៊ីសងប្រជល់មាន់ចំនួន៥០០ នាក់ រថយន្ត ចំនួន២០ គ្រឿង ម៉ូតូចំនួន២០០ គ្រឿង ធ្វើកំណត់ហេតុនិង កិច្ចសន្យាបញ្ឈប់បិទផ្អាកអាជីវកម្មតែម្តង ។ តែនេះគ្រាន់តែជាព័ត៌មានបឋម ប៉ុណ្ណោះដែលស្នងការដ្ឋាននគរបាលខេត្តត្បូងឃ្មុំ ផ្សព្វផ្សាយ ជំហានដំបូង ។ ក្រោយពេលបញ្ចប់ការស្រាវជ្រាវនិងមាន ចំណាត់ការបែបម៉េចជាបន្តទៀតនឹងជូនព័ត៌មានតាមក្រោយ។ ព្រោះទោះជា ប្រតិបត្តិការបង្ក្រាបនេះមានលក្ខណៈទ្រង់ទ្រាយធំ ក្រោមការបញ្ជាពីព្រះរាជអាជ្ញានៃសាលាដំបូងខេត្តត្បូងឃ្មុំក៏ដោយ ក៏ពុំមានប្រភពឬមន្ត្រីណាម្នាក់បញ្ចេញឈ្មោះថៅកែកាស៊ីណូ ឃ្លោប៊ល៦៩ នៅឃុំដារក្នុងដីឡូត៍របស់លោកឧកញ៉ា ឈន ថារី នេះដែរ គឺហាក់មានការលាក់លៀមនិងខ្លាចរអារថៅកែផងដែរ។
ជាងនេះ គឺបើតាមប្រភពព័ត៌មានពីអ្នកកាសែតនៅត្បូងឃ្មុំបាន អោយ សារព័ត៌មាន យើងដឹង ថា មនុស្សស្រីប្រុសទាំង៥០០នាក់ និងរថយន្ត២០គ្រឿង មានស្លាកលេខរដ្ឋ រាជការ ន.ប និង ខ.ម ផងដែរ និង ម៉ូតូ ២០០ គ្រឿង ត្រូវបានដោះលែងវិញអស់ហើយ ក្រោយការ ធ្វើកំណត់ហេតុ កិច្ចសន្យារួច ដែលជាការព្រមានរបស់សមត្ថកិច្ច ទៅលើក្រុមអ្នកលេងល្បែងគឺមិនបានអនុវត្តច្បាប់អ្វីឡើយ ៕
