ក្រចេះ៖ អាវុធហត្ថខេត្តក្រចេះ ចំនួន ៣៨រូប ត្រូវបានប្រកាលតែងតាំងផ្លាស់ប្តូរមុខងារ និងបំពាក់ឋានន្តរសក្តិ ក្រោមអធិបតីភាពលោកឧត្តមសេនីយ៍ត្រី សាន ប៊ុនថាន មេបញ្ជាការកងរាជអាវុធហត្ថខេត្តក្រចេះ កាលពីព្រឹកថ្ងៃទី១៨ ខែឧសភា ឆ្នាំ២០១៦ នៅបញ្ជាការដ្ឋានកងរាជអាវុធហត្ថខេត្តក្រចេះ។
ក្នុងនោះ ឋានន្តរសក្តិ ថ្នាក់អនុសេនីយ៍ឯក មានចំនួន ១៣នាក់ ឋានន្តរសក្តិ ថ្នាក់អនុសេនីយ៍ទោ មានចំនួន ៦នាក់ អនុសេនីយ៍ត្រី ៤នាក់ នាយចំណង់ ១១នាក់ និងឋានន្តរសក្តិ ថ្នាក់ពលបាលឯក មានចំនួន ៥នាក់។
មានប្រសាសន៍ថ្លែងទៅកាន់មន្ត្រីអាវុធហត្ថដែលទើបតែងតាំងប្ដូរមុខងារ និងឋានន្តរសក្តិនាឱកាសនោះ លោកឧត្តមសេនីយ៍ត្រី សាន ប៊ុនថាន បានថ្លែងឲ្យដឹងថា ក្នុងនាមជាកងកម្លាំងនៃកងរាជអាវុធហត្ថ ត្រូវគោរពតួនាទី បទបញ្ជាផ្ទៃក្នុង មានសាមគ្គីភាព ឯកភាពផ្ទៃក្នុង មានទំនួលខុសត្រូវខ្ពស់ និងអនុវត្តនូវតួនាទីភារកិច្ចរបស់ខ្លួនឲ្យបានម៉ឺងម៉ាត់ ក្នុងការបម្រើ ការពារប្រជាពលរដ្ឋ ការពារជាតិ និងបូរណភាពទឹកដី។
លោកឧត្តមសេនីយ៍ត្រី សាន ប៊ុនថាន បានបន្តថា ការធ្វើពិធីផ្លាស់ប្ដូរមុខងារ និងបំពាក់ឋានន្តរសក្ដិនាពេលនោះ គឺមិនមែនឲ្យមន្ត្រីអាវុធហត្ថណាម្នាក់ធ្វើការផ្លាស់ប្ដូរឥរិយាបថនោះទេ តែផ្ទុយទៅវិញ វា គឺជាបន្ទុក់ការងារ តួនាទី ភារកិច្ចថ្មីមួយបន្ថែមទៀត ពីលើអ្វីដែលកំពុងមានស្រាប់។ ដូចច្នេះ មន្ត្រីអាវុធហត្ថគ្រប់រូប ត្រូវខិតខំធ្វើយ៉ាងណាពង្រឹង ហាត់ពត់ លត់ដំសមត្ថភាពរបស់ខ្លួនឡើងវិញ ដើម្បីការពារសន្តិសុខ សណ្ដាប់ធ្នាប់សង្គម ឲ្យមានស្ថេរភាព សន្តិភាព សុវត្ថិភាព ជូនប្រជាជន និងសង្គមជាតិទាំងមូល ហើយក៏ដើម្បីមុខមាត់របស់កងរាជអាវុធត្ថផងដែរ។
ជាមួយគ្នានោះ លោកឧត្តមសេនីយ៍ មេបញ្ជាការ ក៏បានមានប្រសាសន៍សង្កត់ធ្ងន់ថា មន្ត្រីអាវុធហត្ថគ្រប់រូប ត្រូវស្លៀកពាក់ឯកសណ្ឋានឲ្យបានត្រឹមត្រូវ មានក្រមសីលធម៌ខ្ពស់ សេចក្ដីថ្លៃថ្នូរ គោរពនិងអនុវត្តឲ្យម៉ឺងម៉ាត់នូវរាល់បទបញ្ជាដែលថ្នាក់លើដាក់ឲ្យ ដើម្បីឲ្យសាកសមជាអាវុធហត្ថ។
លោកឧត្តមសេនីយ៍ សាន ប៊ុនថាន មេបញ្ជាការកងរាជអាវុធហត្ថខេត្ត ក៏បានជំរុញដល់អាវុធហត្ថទាំងអស់ត្រូវអនុវត្តតាមគោការណ៍សំខាន់ៗ ៥ចំណុច ទី១ អាវុធហត្ថគ្រប់រូប ត្រូវលើកកម្ពស់ស្មារតីស្នេហាជាតិ និងស្មោះត្រង់ចំពោះជាតិ សាសនា ព្រះមហាក្សត្រ ជាពិសេសចំពោះរាជរដ្ឋាភិបាលនៃព្រះរាជាណាចក្រកម្ពុជា, ទី២ ត្រូវបន្តកសាងកងរាជអាវុធហត្ថឲ្យល្អស្អាតស្អំ គោរពវិន័យ ក្រមសីលធម៌ និងអនុវត្តន៍ច្បាប់, ទី៣ បន្តរៀបចំអត្តចរិក និងសេចក្ដីថ្លៃថ្នូរឲ្យមានការទំនាក់ទំនងល្អជាមួយបណ្ដាស្ថាប័ន និងប្រជាពលរដ្ឋ ដើម្បីទទួលការឆ្លើយតប និងមានការគាំទ្រ, ទី៤ ត្រូវបន្តលើកកម្ពស់ចំណេះ សមត្ថភាព ជំនាញ វិជ្ជាជីវគ្រប់ផ្នែកតាមរយៈការហ្វឹកហ្វឺននិងការសិក្សារៀនសូត្រ, ទី៥ ត្រូវបន្តកសាងមនៈសិកាឆន្ទៈអង់អាចក្លាហាន ហ៊ានទទួលខុសត្រូវចំពោះភារកិច្ចបែងចែកច្បាស់លាស់ ចំពោះទង្វើល្អ និងទង្វើមិនល្អ ជាពិសេសចំពោះទង្វើដែលមិនល្អគម្បីត្រូវជៀសវៀង ដូចជា ការស្រែគំរាមកំហែងប្រជាពលរដ្ឋ ការប្រើប្រាស់និងជួញដូរគ្រឿងញៀន ការដឹកជញ្ជូន និងប្រើប្រាស់អាវុធខុសច្បាប់ ការកាប់ទនទ្រានយកដីព្រៃជាដើម។
លោកឧត្តមសេនីយ៍ត្រី សាន្ដ ប៊ុនថាន បានបញ្ជាក់ថា តាមរយៈគោលការណ៍សំខាន់ទាំង៥ខាងលើនេះ លោកសង្ឃឹមជឿជាក់យ៉ាងម៉ុតម៉ាំថាអាវុធហត្ថគ្រប់រូប និងខិតខំអនុវត្តន៍ឲ្យបានគ្រប់ៗគ្នា ដើម្បីជាកិត្តិយសសម្រាប់កងរាជអាវុធហត្ថជាតិយើងទាំងមូល ក្នុងការការពារសន្តិសុខ សណ្ដាប់ធ្នាប់សង្គម និងការការពារបូរណៈភាពទឹកដីជូនមាតុភូមិកម្ពុជា ៕
ដោយ កិះ ខន