ភ្នំពេញ៖ នៅថ្ងៃទី១៥ ខែកក្កដា ឆ្នាំ២០១៨ខាងមុខនេះ ពលករខ្មែរនៅកូរ៉េ នឹងទទួលបានសេវាបន្តសុពភាព លិខិតឆ្លងដែន ដោយឥតគិតថ្លៃ និងការប្រឹក្សាផ្នែកច្បាប់ការងារ។ សេចក្តីជូនដំណឹងរបស់ស្ថានទូតកម្ពុជា ប្រចាំសាធារណរដ្ឋកូរ៉េ នៅព្រឹកថ្ងៃទី២ ខែកក្កដាបានឲ្យដឹងថា “ស្ថានឯកអគ្គរាជទូតកម្ពុជា ប្រចាំសាធារណរដ្ឋកូរ៉េ មានកិត្តិយសសូមជម្រាបជូនដំណឹង ដល់ប្រជាពលរដ្ឋខ្មែរទាំងអស់ ដែលកំពុងសិក្សា ធ្វើការ និង រស់នៅសាធារណរដ្ឋកូរ៉េជ្រាបថា ក្នុងគោលបំណងចូលរួមកាត់បន្ថយចំណាយ និងពេលវេលារបស់បងប្អូន ព្រមទាំងដើម្បីអនុវត្តយន្ដការ បង្ខិតសេវាឱ្យជិតដល់ប្រជាពលរដ្ឋខ្មែរ ស្ថានឯកអគ្គរាជទូតកម្ពុជាបានសហការជាមួយ អង្គភាពអភិវឌ្ឍន៍ ធនធានមនុស្សកូរ៉េប្រចាំទីក្រុងថេហ្គូ នឹងចុះផ្ដល់សេវាបន្ដសុពលភាព លិខិតឆ្លងដែនដោយឥតគិតថ្លៃ ប្រឹក្សាយោបល់ផ្នែកច្បាប់ការងារ និងផ្សព្វផ្សាយកម្មវិធីវិលត្រឡប់វិញ ក្រោយចប់អាណត្តិការងារ នៅថ្ងៃអាទិត្យទី១៥ ខែកក្កដា ឆ្នាំ២០១៨ នៅអង្គភាពអភិវឌ្ឍន៍ ធនធានមនុស្សកូរ៉េ ប្រចាំទីក្រុងថេហ្គូ ដែលមានអាសយដ្ឋាន 대구시 달서구 성서공단로 213 (갈산동971-6) ចាប់ពីម៉ោង ១៣:០០ ដល់ម៉ោង ១៦:០០ រសៀល”។
