ត្បូងឃ្មុំ ៖ បច្ចប្បន្នក្រៅពីមានបទល្មើសព្រៃឈើ ក្នុងទឹកដីខេត្តត្បូងឃ្មុំគឺងំទៅដោយបនល្បែងសុីសង គ្រប់ប្រភេទ ពិសេសសង្វៀនជល់មាន់ មានទាំងធំ ទាំងតូច តាំងពីជនបទ រហូតទីប្រជុំជន ស្ទើរគ្រប់មូលដ្ឋាន ។ ជាក់ស្តែង ថ្មីៗនេះ ប្រជាពលរដ្ឋបានរាយការណ៍ប្រាប់អ្នកសារព័ត៌មានយើងអោយដឹងថា នៅក្នុងទីតាំងដីឡូត៍ដ៏ធំមួយកន្លែងរបស់ លោកឧកញ៉ា ឈន ថារី ស្ថិតក្នុងតំបន់ពាណិជ្ជកម្ម ពិសស ថារីកំពង់ចាម ច្រកទ្វារទ្វេរភាគីដារ ក្នុងឃុំដារ ស្រុកមេមត់ ខេត្តត្បូងឃ្មុំ ចម្ងាយប្រមាណ១៥០ ម៉ែត្រ ពីច្រកទ្វារព្រំដែនទ្វេរភាគីដារ កម្ពុជា-វៀតណាមប៉ុណ្ណោះ គឺគេឃើញមានសង្វៀន ប្រជល់មាន់យ៉ាងធំបើកលេងរៀងរាល់ថ្ងៃយ៉ាងគគ្រឹក គគ្រេង ដោយគ្មានការរំខានពីអាជ្ញាធរ ឬសមត្ថកិច្ចថ្នាក់ណាឡើយ។
ប្រជាពលរដ្ឋបន្តថាៈ ក្នុង១ថ្ងៃៗគេឃើញពួកអ្នកញៀននឹងល្បែងស៊ីសងជល់មាន់នាំគ្នាពពាក់ពូនទាំងម៉ូតូ ទាំងឡាន គ្រប់ប្រភេទរាប់សិបគ្រឿង ក្នុងចំណោមពួកអ្នកញៀនល្បែងសុីសងនោះក៏ មានមន្ត្រីរាជការ និងអ្នកមានអំណាច លុយកាក់គ្រាក់ៗសំរុក ចូលទៅលេងល្បែងសុីសងនៅទីនោះ ព្រោះល្បីថា មានច្បាប់ អនុញ្ញាតិពីរាជរដ្ឋាភិបាលកម្ពុជា ដូច្នេះគឹមានសុវត្ថិភាពសំរាប់ ក្រុមអ្នកលេងល្បែង។ នៅក្នុងទីតាំងដីឡូតិ៍ដ៏ធំរបស់លោក ឧកញ៉ា ឈន ថារី ដែលមានរបងថ្មខ្ពស់បាំងជិត និងមាន កងសន្តិសុខវ័យក្មេងជាច្រើននាក់ចាំមើលផ្លូវបើកទ្វាររបងយាម កាមយ៉ាងតឹងរុឹង ប្រយ័ត្នប្រយែងបំផុត ហើយបើដឹងថាជាអ្នក កាសែតគឺមិនអនុញ្ញាតិអោយចូលក្នុងបរិវេណនោះជាដាច់ខាត ។
បើតាមអ្នកធ្លាប់យកមាន់ទៅជល់នៅទីនោះ បាននិយាយ ប្រាប់អ្នកកាសែតអោយដឹងថា ក្នុងទីតាំងនោះគេធ្វើសង្វៀន ជល់មាន់ ដោយមានកៅអីដែករៀបថ្នាក់ៗដំកង់រង្វង់មូលដូច សង្វៀនអ្នកប្រដាល់ចឹងដែរ សំរាប់អង្គុយមើលនិងភ្នាល់ជល់ មាន់ ដែល១គូរៗចាក់ភ្នាល់រាប់រយ រាប់ពាន់ដុល្លារក៏មានដែរ ក្រៅពីជល់មាន់ក៏មាន ល្បែងបៀរ អាប៉ោងលេងផងដែរ … ។ ប្រភពបានបន្ត ទៀតថា ពួកអ្នកញៀនល្បែងមាន់ជល់គឺទៅពីគ្រប់ទិសទីហើយភាគ ច្រើនសុទ្ធតែអ្នកមានៗឡានទំនើបៗ សំរុកចូលទៅលេងល្បែងនៅទីនោះស្រែកហ៊ោរកញ្ជ្រាវឡើងកងរំពង ព្រោះពួកគេ សំអាងថាទីតាំងនោះជាកាសុីណូស្របច្បាប់ គ្មានសមត្ថកិច្ចណាហ៊ានឆាឆៅទេ ព្រោះមាន លោក ហេង ជាតំណាងក្រុមហ៊ុន ជាអ្នកចាត់ចែងមើលការខុសត្រូវ និងដោះ ស្រាយ ថ្លៃបាយទឹកជូន ។ ជុំវិញសេចក្តីរាយការណ៍ខាងលើនេះ ការិយាល័យនិពន្ធនាយក គេហទំព័រ សារព័ត៌មាន មាតុភូមិ www.meatophoum.com បានទទួលការឆ្លើយតប បកស្រាយពន្យល់តាមតេឡេក្រាម ពីឯកឧត្តម ឧត្តមសេនីយ៍ ទោ បែន រ័ត្ន ស្នងការនគរបាលខេត្តត្បូងឃ្មុំថា ខ្ញុំសូមអរគុណ ចំពោះការជូនព័ត៌មាននេះ ប្អូនគួរអញ្ជើញទៅផ្ទាល់ជួបម្ចាស់ គេ ថាតើគេមានច្បាប់ ឬ អត់ ? ។
បើមានខាងណាអ្នកចេញ អោយ ? សមត្ថកិច្ចខាងណាជាអ្នកគ្រប់គ្រង ? បើខ្ញុំប្រាប់ការ ពិតក៏មិនជឿ ហើយអាចច្រឡំថាខ្ញុំការពារគេទៀតផង វាមិន ខុសអី នឹងកាសុីណូនៅអន្លង់ជ្រៃឡើយ ។ តែបើប្អូនលំបាក ទាក់ទងទៅម្ចាស់គេ ខ្ញុំសូមណែនាំផ្លូវផ្សេងទៀត គឺនាយកដ្ឋាន គ្រប់គ្រងកាសុីណូនៅមហាផ្ទៃ ឬ ទីស្តីការគណៈរដ្ឋមន្ត្រីតែម្តង កាន់តែច្បាស់ និងប្រសើរបំផុត ។ ឯស្នងការដ្ឋានខេត្តមាន សមត្ថកិច្ចត្រឹមតែទទួល ស.ជ.ណ ប៉ុណ្ណោះ ។ ដោយឡែក លោកឧកញ៉ា ឈន ថារី បានប្រាប់តាមទូរស័ព្ទកាលពីថ្ងៃទី ២១ មិថុនា ថា លោកគ្រាន់តែជាម្ចាស់ដីជួលទីតាំងនោះអោយ គេតែប៉ុណ្ណោះ មិនមែនថៅកែកាសុីណូទេ លោកឧកញ៉ាបន្តថា តាមលោកដឹងខ្លះៗគឺថាគេមានច្បាប់ពីក្រសួងសេដ្ឋកិច្ខ ហិរញ្ញ វត្ថុ និងក្រសួងមហាផ្ទៃ ហើយឃើញខាងក្រសួងគេចុះពិនិត្យ មើលផងដែរ ។
តែបើអ្នកកាសែតចង់ដឹងចុះទៅដល់ផ្ទាល់ទាក់ ទងគេទៅ គេអោយថ្លៃបាយថ្លៃទឹកហើយ ។ ចំពោះលោក អភិបាលខេត្តត្បូងឃ្មុំ ពេលទូរស័ព្ទសុំការបំភ្លឺ លោកឆ្លើយថា ជាប់ប្រជុំ ។ រីឯលោក ហេង ដែលគេប្រាប់ថាជាអ្នកមើលការខុសត្រូវនៅសង្វៀនមាន់នោះ នៅពេលសំភាសន៍សួនាំតាមទូរស័ព្ទ លោកប្រាប់ថាទីតាំងកាស៊ីណូរបស់លោកមាន ច្បាប់អនុញ្ញាតិត្រឹមត្រូវពីរាជរដ្ឋាភិបាល? ។ តែបើមានការអី អាចមកទាក់ទងដល់ទីតាំងមក។ ទោះជាមានការបញ្ជាក់ ខ្លះៗថាទីតាំងនោះមានច្បាប់ត្រឹមត្រូវក៏ដោយ តែបើពិនិត្យមើល ជាក់ស្តែងគឺវាមិនមែនជាអគារ មានបំពាក់ឧបករណ៍បំរើអោយ សេវាកម្ម ល្បែងស៊ីសងគ្រប់ប្រភេទដូចនៅតាមអគារកាស៊ីណូ នានាតាមច្រកព្រំដែននោះទេ ហើយម្យ៉ាងទៀតបើមានច្បាប់ ហេតុអីត្រូវខ្លាចអ្នកកាសែតថតផ្សាយ ? ។
ប្រភពពីមន្ត្រីម្នាក់ នៅទីស្តីការគណៈរដ្ឋមន្ត្រីបានប្រាប់តាមទូរ័ព្ទថា ជាទូទៅ ច្បាប់ កាសុីណូ គឺមិនអនុញ្ញាតិអោយជនជាតិខ្មែរចូលលេងល្បែងសុីសងជាដាច់ខាត ។ ប៉ុន្តែជាក់ស្តែងនៅទីតាំងសង្វៀនជល់មាន់ នៅក្នុងដីឡូតុ៍លោកឧកញ៉ា ឈន ថារី គឺភាគច្រើនអ្នកចូលទៅ លេងល្បែងស៊ីសងសុទ្ធតែខ្មែរ ឯភាគីវៀតណាមមានចំនួនតិច ណាស់ ។ឬមួយគេបើកយកលុយជួយបក្សព្រោះជិតដល់ថ្ងាំបោះឆ្នោតផង!។
សូមបញ្ជាក់ផងដែរថា នៅក្នុងទឹកដីនៃអាណាចក្រ ខេត្តត្បូងឃ្មុំនេះ ក្រៅពីទីតាំខាងលើនេះ ក៏នៅមានសង្វៀនជល់មាន់តាមភូមិនានា ដូចជាសង្វៀនមាន់នៅក្នុងភូមិស្រឡប់ ឃុំជប់ ស្រុកមេមត់ និងសង្វៀនមាន់ នៅក្នុងភូមិទួលទ្រា ឃុំ ដារ បើកលេងយ៉ាងគឃ្លើនប្រឆាំងនឹងបទបញ្ជា គោលនយោ បាយភូមិ ឃុំ មានសុវត្ថិភាពរបស់រាជរដ្ឋាភិបាលដោយគ្មានការ រំខានពីសមត្ថកិច្ចថ្នាក់ណាទេ ។ បើដូច្នេះសូមអញ្ជើញបងប្អូន ដែលពេញនិយមលេងមាន់ជល់ទៅកាន់ទីតាំងខាងលើដោយ រីករាយ ព្រោះមានច្បាប់អនុញ្ញាតិពីរាជរដ្ឋាភិបាល ហើយមាន សុវត្ថិភាពទៀតផង ៕ ដោយ: ស៊ុន សុផល
