ប្រព័ន្ធឌីជីថលផ្សារភ្ជាប់នឹងសាលារៀននៅក្នុងព្រះរាជាណាចក្រកម្ពុជាត្រូវបានអភិវឌ្ឍក្នុងរយៈពេលជាង២០ឆ្នាំមកហើយ ជាមួយនឹងកំណើនផលទុនជាតិសរុបនៅប្រទេសកម្ពុជា (GDP) សរុបជាមធ្យមប្រហែល៧% ក្នុងមួយឆ្នាំ ហើយត្រូវបានគេព្យាករណ៍ថានឹងបន្តកំណើនរបស់ខ្លួននាពេលអនាគត។
ការរួមចំណែកសំខាន់ចំពោះកំណើនរហូតមកដល់ពេលនេះគឺដោយសារមានសុខសន្តិភាពនិងស្ថេរភាពនៅក្នុងប្រទេស ជាមួយនឹងការបើកទូលាយនៅក្នុងគោលនយោបាយចំពោះការវិនិយោគពីបរទេស។ ក្នុងជំហានបន្ទាប់នៃការអភិវឌ្ឍប្រទេសកម្ពុជា គឺការផ្តោតទៅលើគុណភាពនៃកំណើន។ ដែលមានន័យថាប្រទេសកម្ពុជាត្រូវមានយុទ្ធសាស្ត្របន្ថែមទៀតទៅលើផែនការអភិវឌ្ឍន៍របស់ខ្លួនក៏ដូចជាទាក់ទាញការវិនិយោគដែលមានគុណភាពបន្ថែមទៀតទៅលើវិស័យយុទ្ធសាស្ត្រសំខាន់ៗរបស់ខ្លួន។
ជាក់ច្បាស់ណាស់ថាការអភិវឌ្ឍនាពេលអនាគតនឹងត្រូវពឹងផ្អែកយ៉ាងខ្លាំងលើបច្ចេកវិទ្យាគមនាគមន៍និងព៍ត៌មាន(ICT)និងការរួមបញ្ចូលគ្នានៃវិស័យបច្ចេកវិទ្យា ដើម្បីជួយកែលម្អការសម្រេចចិត្ត ការរៀបចំផែនការការប្រកួតប្រជែង និងគុណភាពដ៏ល្អនៃជីវិតសម្រាប់មនុស្សគ្រប់គ្នា។វាច្បាស់ណាស់ថាបច្ចេកវិទ្យាគឺជាអ្នកកំណត់និន្នាការនានានៅទូទាំងពិភពលោក។ សំខាន់ជាងនេះទៀតបណ្ដារអង្គការអន្តរជាតិដូចជា អង្គការសហប្រជាជាតិ សហភាពអឺរ៉ុប សមាគមន៍អាស៊ាន សហភាពទូរគមនាគមន៍អន្តរជាតិ (ITU) និង WEF ជាដើមកំពុងលើកទឹកចិត្តដល់ប្រទេសទាំងអស់ឱ្យទទួលយកនូវបច្ចេកវិទ្យាដែលនឹងជះឥទ្ធិពលដល់ការអភិវឌ្ឍន៍របស់ប្រទេស ក៏ដូចជាដើម្បីចូលរួមបដិវត្តន៍ឧស្សាហកម្មលើកទី៤។
ប្រទេសកម្ពុជាត្រូវមានគំនិតផ្តួចផ្តើមខ្លាំងជាងមុនដើម្បីចូលរួមសហគមន៍សកលលោកដើម្បីនាំយកគំនិតនិងការគាំទ្រដ៏ល្អបំផុតពីសហគមន៍អន្តរជាតិដើម្បីជួយដល់ប្រទេសកម្ពុជាក្នុងការជំរុញការអភិវឌ្ឍន៍របស់ខ្លួន និងសម្រេចបាននូវសក្ដានុពលភាពរបស់ប្រទេស។
ក្រសួងប្រៃសណីយ៍និងទូរគមនាគមន៍កំពុងជួយគាំទ្រដល់ការអភិវឌ្ឍប្រទេសដោយផ្តោតលើគម្រោងនិងកម្មវិធីដែលកំពុងជួយកម្ពុជាក្នុងការធ្វើទំនើបកម្ម និងរៀបចំសម្រាប់វិស័យសេដ្ឋកិច្ចឌីជីថលនិងបដិវត្តន៍ឧស្សាហកម្មលើកទី៤។
ផ្អែកលើយុទ្ធសាស្ត្រចតុកោណ ដំណាក់កាលទី៣ របស់រាជរដ្ឋាភិបាល នីតិកាលទី៥ នៃរដ្ឋសភាការអភិវឌ្ឍវិស័យទូរគមនាគមន៍នឹងក្លាយជាកត្តាគន្លឹះក្នុងការគាំទ្រដល់រាជរដ្ឋាភិបាលវិស័យឯកជនសង្គមនិងវប្បធម៌តាមរយៈការធ្វើឱ្យប្រសើរឡើងនូវការអភិវឌ្ឍន៍និងគុណភាពនៃការអភិវឌ្ឍន៍សម្រាប់វិស័យទាំងអស់នោះ។
ប្រទេសកម្ពុជាបានអភិវឌ្ឍយ៉ាងឆាប់រហ័សក្នុងវិស័យទូរគមនាគមន៍ហើយមានតម្លៃប្រើប្រាស់អ៊ីនធើណិតក្នុងតម្លៃទាបបំផុតហើយក៏ជាប្រទេសមួយលឿនបំផុតក្នុងការទទួលយកបច្ចេកវិទ្យាថ្មីៗប្រៀបធៀបទៅនឹងប្រទេសមួយចំនួននៅក្នុងតំបន់។ទាំងនេះបង្ហាញពីការគាំទ្រ និងភាពប៉ិនប្រសព្វរបស់រាជរដ្ឋាភិបាលកម្ពុជានិងប្រជាជនវ័យក្មេងដែលបច្ចុប្បន្នគឺជាកំលាំងចលករដ៏សំខាន់របស់ប្រទេសជាតិ។យោងតាមការសិក្សារបស់អង្គការសហប្រជាជាតិយើងអាចមើលឃើញពីការកើនឡើងចំនួន១០%នៃការតភ្ជាប់ឌីជីថលនៅក្នុងចំណោមប្រជាជននៅតាមបណ្តាប្រទេសទូទាំងពិភពលោក ដោយផ្តល់នូវការកើនឡើងដោយផ្ទាល់ដល់ផលិតភាពរបស់ប្រទេសជាតិពី ១,២% -១,៣% នៃផលិតផលក្នុងស្រុកសរុប។
នេះគឺជាសូចនាករដ៏រឹងមាំមួយសម្រាប់ក្រសួងប្រៃសនីយ៍ និងទូរគមនាគមន៍ ដើម្បីជំរុញឱ្យមានគម្រោងតភ្ជាប់បន្ថែមដូចជាគម្រោងWi-Fiសាធារណៈនិងប្រព័ន្ធឌីជីថលផ្សារភ្ជាប់នឹងសាលារៀនជាគម្រោងមួយដែលក្រសួងប្រៃសនីយ៍ និងទូរគមនាគមន៍បានផ្តួចផ្តើមឡើងហើយនឹងបន្តគាំទ្រយ៉ាងពេញទំហឹងលើគម្រោងនេះនៅទូទាំងប្រទេស។ នៅថ្ងៃទី ៩ខែឧសភាឆ្នាំ ២០១៨ក្រសួងប្រៃសនីយ៍ និងទូរគមនាគមន៍ បានផ្តល់ការគាំទ្រដល់ក្រុមហ៊ុនទូរគមនាគមន៍កម្ពុជា (TC) ដើម្បីដាក់ឱ្យដំណើរការគម្រោងWi-Fiសាធារណៈនៅក្នុងរាជធានីភ្នំពេញដោយមានការសហការពីសាជីវកម្មទូរគមនាគមន៍កូរ៉េ(KT) ។
សាជីវកម្ម KT គឺជាសាជីវកម្មទូរគមនាគមន៍ឈានមុខគេមួយរបស់ពិភពលោកដែលបានជួយសាធារណៈរដ្ឋកូរ៉េឱ្យអភិវឌ្ឍខ្លួនក្លាយជាប្រទេសឈានមុខគេនៅក្នុងការអភិវឌ្ឍ ICT ។ យោងតាមចំណាត់ថ្នាក់ពិភពលោកសម្រាប់សន្ទស្សន៍អភិវឌ្ឍន៍ ICT ដោយITU បានឱ្យដឹងថាប្រទេសកូរ៉េជាប់ចំណាត់ថ្នាក់លេខ ១ឬទី ២នៅលើពិភពលោកក្នុងរយៈ ៨ឆ្នាំចុងក្រោយនេះ។ យើងមានសេចក្តីសោមនស្សរីករាយដែលមាន KTធ្វើជាដៃគូដើម្បីជួយគាំទ្រដល់ការអភិវឌ្ឍវិស័យឧស្សាហកម្មបច្ចេកវិទ្យាគមនាគមន៍និងព័ត៌មានកម្ពុជា។ គម្រោងWi-Fiសាធារណៈកំពុងប្រើបច្ចេកវិទ្យាWi-Fiចុងក្រោយបំផុតពីសាជីវកម្ម KT ។
គម្រោងទាំងនេះ នឹងអនុញ្ញាតឱ្យប្រជាជនកម្ពុជានិងភ្ញៀវទេសចរកាន់តែច្រើនដែលជាសសរស្តម្ភសេដ្ឋកិច្ចរបស់ប្រទេសកម្ពុជាអាចភ្ជាប់អ៊ិនធឺណិតដោយល្បឿនលឿនបំផុតរហូតដល់ ១ជីហ្គាបៃក្នុងមួយវិនាទីនៅក្នុងតំបន់សាធារណៈធំៗ ដូចជាសួនច្បារសម្តេចហ៊ុនសែន, សួនច្បារមុខព្រះបរមរាជវាំងនិងកន្លែងជាច្រើនទៀតដែលបានតភ្ជាប់ទាំងនៅរាជធានីភ្នំពេញនិងបណ្តាខេត្ត។ សព្វថ្ងៃនេះក្រសួងប្រៃសណីយ៍និងទូរគមនាគមន៍មានក្តីសោមនស្សរីករាយយ៉ាងខ្លាំងក្នុងការគាំទ្រដល់ការបើកដំណើរការប្រព័ន្ធឌីជីថលផ្សារភ្ជាប់នឹងសាលារៀននៅវិទ្យាល័យហ៊ុនសែនទួលខ្ពស់ដោយមានការគាំទ្រពី TC និង KT ។
គោលបំណងនៃគម្រោងនេះគឺដើម្បីនាំមកនូវការតភ្ជាប់ទៅសាលារៀននៅទូទាំងប្រទេសតាមរយៈការបង្កើនការតភ្ជាប់អ៊ីនធឺណិតដែលនឹងអនុញ្ញាតឱ្យសាលារៀនភ្ជាប់ទៅការអប់រំឌីជីថលបន្ថែមទៀតសម្រាប់សាលាទាំងមូល។ យើងសង្ឃឹមថានឹងទទួលបានការគាំទ្រនិងសហការបន្ថែមទៀតជាមួយអ្នកពាក់ព័ន្ធសំខាន់ៗដូចជាក្រសួងអប់រំ យុវជន និងកីឡា សហភាពសហព័ន្ធយុវជនកម្ពុជានិងអង្គការអប់រំអន្តរជាតិ។
លើសពីនេះទៀត យើងសង្ឃឹមថានឹងបង្កើតកម្មវិធីអប់រំសាធារណៈបន្ថែមទៀតដើម្បីជួយលើកកម្ពស់ទីក្រុងស្អាត គ្មានគ្រឿងញៀន និងកម្មវិធីអប់រំស្ទែម(STEM)។
យើងសង្ឃឹមថា កម្មវិធីសាធារណៈទាំងនេះនឹងជួយកែលម្អអាកប្បកិរិយានិងការយល់ដឹងរបស់សាធារណៈជនដើម្បីជួយលើកកម្ពស់សកម្មភាពរួមគ្នានិងផលប្រយោជន៍របស់យើងទាំងអស់គ្នា។
យើងមានគម្រោងគាំទ្រកម្មវិធីទាំងនេះតាមរយៈការប្រើមូលនិធិសកល (USO)និងមូលនិធិR&D ដែលត្រូវបានគាំទ្រដោយប្រតិបត្តករទូរគមនាគមន៍ក្រុមហ៊ុនផ្តល់សេវាអ៊ិនធឺណេតនិង ICT ទាំងអស់។
យើងខ្ញុំក៏សង្ឃឹមផងដែរដើម្បីលើកកម្ពស់គំនិតបន្ថែមទៀតដែលនឹងជួយផ្តល់ឱ្យប្រជាជនកម្ពុជានូវចក្ខុវិស័យច្បាស់លាស់អំពីការអភិវឌ្ឍន៍របស់ប្រទេសកម្ពុជានិងត្រៀមខ្លួនចូលរួមក្នុងវិស័យសេដ្ឋកិច្ចឌីជីថលយ៉ាងឆាប់រហ័សនិងបដិវត្តន៍ឧស្សាហកម្មលើកទី៤ដែលនឹងផ្តោតលើបញ្ញាសិប្បនិម្មិតអ៊ីនធឺណិតនៅក្នុងការរស់នៅប្រចាំថ្ងៃ និងការទាញយកទិន្នន័យធំៗ (Big-Data)។
នៅពេលអនាគតយើងក៏សង្ឃឹមផងដែរក្នុងកិច្ចសហប្រត្តិបត្តការជាមួយកម្មវិធីអន្តរជាតិជាច្រើនទៀតដូចជាកម្មវិធីទប់ស្កាត់ជំងឺឆ្លងទូទាំងពិភពលោកដែលនឹងសហការជាមួយប្រទេសជាច្រើនក្នុងការជួយប្រយុទ្ធប្រឆាំងនឹងគ្រោះថ្នាក់នៃជំងឺឆ្លងទូទាំងពិភពលោកដូចជា H1N1, Zika, Ebola …ដែលមានផលប៉ះពាល់ដល់សេដ្ឋកិច្ចនិងការអភិវឌ្ឍសង្គម។
ក្រសួងប្រៃសនីយ៍ និងទូរគមនាគមន៍ប្តេជ្ញាធ្វើការជាមួយអ្នកពាក់ព័ន្ធសំខាន់ៗទាំងអស់ក្នុងតំបន់និងអន្តរជាតិដើម្បីធានាថារាជរដ្ឋាភិបាលកម្ពុជានឹងធ្វើឱ្យកម្មវិធីទាំងនេះជាអាទិភាពក្នុងការជួយធ្វើទំនើបកម្មប្រទេសនៅក្នុងគ្រប់វិស័យទាំងអស់និងដើម្បីបន្តការអភិវឌ្ឍន៍ប្រកបដោយចីរភាពជាមួយនឹងការប្តេជ្ញាចិត្តជំរុញការដាក់ឲ្យប្រប្រព័ន្ធឌីជីថលនិង ICTដើម្បីកំណើនសេដ្ឋកិច្ច។
អ្វីដែលសំខាន់បំផុតនោះគឺកម្ពុជាក្លាយទៅជាប្រទេសដ៏ល្អបន្តលើកកម្ពស់ជីវភាពនិងគុណភាពជីវិតសម្រាប់ប្រជាជនកម្ពុជាគ្រប់ៗជំនាន់ ៕