ក្រចេះ៖ មេព្រៃសង្កាត់រដ្ឋបាលព្រៃឈើសណ្ដាន់ សហការជាមួយ កម្លាំងកងរាជអាវុធហត្ថស្នាក់ការសន្តិសុខ៧០៨ និងកម្លាំងប៉ុស្ដិ៍នគរបាលរដ្ឋបាលក្បាលដំរី បានចុះចាប់ឃាត ឈើអារប្រភេទលេខ២ មួយកន្លែង នៅក្នុងទឹកដីនៃស្រុកសំបូរ ។
សមត្ថកិច្ច បានឲ្យដឹងថា កិច្ចប្រតិបត្តិការ ចុះចាប់ឃាតឈើអារខុសច្បាប់ខាងលើនេះ គឺកម្លាំងចម្រុះបានធ្វើឡើងកាលពីថ្ងៃទី១០ ខែឧសភា ឆ្នាំ២០១៦ម្សិលមិញនេះ នៅចំនុចភូមិស្រែស្បូវ ឃុំក្បាលដំរី ស្រុកសំបូរ ខេត្តក្រចេះ ដោយកម្លាំងសមត្ថកិច្ចរឹមអូសបានឈើអារខុសច្បាប់ប្រមាណជាង ៤ម៉ែត្រគូប ដែលគ្មានលិខិតអនុញ្ញាតពីរដ្ឋបាលព្រៃឈើ និងពុំមានម្ចាស់ចេញមុខទទួលខុសត្រូវ ។
ប្រភពរាយការណ៍ពីប្រជាពលរដ្ឋ បានឲ្យដឹងថា សព្វថ្ងៃនេះ គេសង្កេតឃើញថា សកម្មភាពបទល្មើសព្រៃឈើកំពុងតែដំណើរការទៅដោយយ៉ាងរលូនឡើងវិញហើយ ជាពិសេសនៅតំបន់ឃុំរលួសមានជ័យ ក្នុងទឹកដីនៃស្រុកសំបូរ ពីសំណាក់ជនខិលខូចដែលមានអំណាច និងមានទឹកប្រាក់ មិនខ្លាចញញើត និងក្រែងរអាសមត្ថកិច្ចណាម្នាក់ឡើយ ។
ដែលទង្វើនេះ គឺផ្កើនទៅនឹងអនុសាសន៍របស់សម្ដេចតេជោ ហ៊ុន សែន កាលពីពេលថ្មីៗនេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអំពាវនាវនឹងជំរុញឲ្យបងប្អូនប្រជាពលរដ្ឋទាំងអស់ ចូលរួមសហការជាមួយអាជ្ញាធរ មានកម្លាំងសមត្ថកិច្ច ក្នុងការផ្ដល់ប្រភពពត៌មាន ដើម្បីទប់ស្កាត់ និងបង្ក្រាបបទល្មើសព្រៃឈើឲ្យកាន់តែមានប្រសិទ្ធភាព។
ប្រភពដដែល បន្តបង្ហើបឲ្យដឹងថា ឈើទាំងនោះ គឺមានឈ្មោះលោក ហែន ណាត ជាអ្នកការសែត បញ្ញាវ័ន្តខ្មែរ និងលោក ហុ រស្មី ដែលជាអ្នករត់ការឈើ តាំងពីយូរណាស់មកហើយ មិនដែលកើតមានបញ្ហាម្ដងណាឡើយ ទើបតែពេលនេះសមត្ថកិច្ចចម្រុះ ចុះចាចឃាតនឹងរឹមអូសយកតែម្ដង។
ប្រជាពលរដ្ឋ ក៏បានបន្តទៀតថា សកម្មភាពរថយន្តដឹកជញ្ជូនឈើអារតាមរថយន្តគ្រប់ប្រភេទ ឲ្យតែមកដល់ត្រង់ចំណុចមុខប៉ារ៉ាស់ក្រុមហ៊ុនចិន គឺគេចមិនរួចជាដាច់ខាត ដោយត្រូវបង់សមត្ថកិច្ចនៅទីនោះ ចំនួន ៤ម៉ឺនរៀល ក្នុង១គោយន្តកន្ត្រៃ ដែលមានប៉ូលីសខេត្ត និងអាវុធហត្ថស្នាក់ការសន្តិសុខ៧០៨។
ចំណែកឯ ផ្លូវទឹកវិញ សកម្មភាពបទល្មើសដឹកជញ្ជូនឈើតាមទូក ក៏មិនចាញ់ដៃគ្នានឹងផ្លូវគោកនោះដែរ ទាំងរដូវប្រាំង និងរដូវវស្សា។ ជាពិសេសនៅរដូវវស្សា គឺមានទូកដឹកជញ្ជូនឈើឆ្លងកាត់ទឹកដីនៃខេត្តក្រចេះ ជារៀងរាល់យប់ ដោយក្នុង១យប់ៗទូកឆ្លងកាត់មិនក្រោយពី ៤ទូកឡើយ ដែលមានផ្ទុកឈើចាប់ពី ៧ម៉ែត្រគូប ទៅដល់១០ម៉ែត្រគូប នេះបើយោងតាមប្រភពរាយការណ៍បានឲ្យដឹងយ៉ាងដូច្នេះ។
ប៉ុន្តែ គេសង្កេតឃើញថា កម្លាំងសមត្ថកិច្ច និងមន្ត្រីជំនាញ ដែលមានទីស្នាក់ការនៅតាមដងទន្លេមេគង្គ ហាក់បីដូចជាគ្មានចំណាត់ការ និងវិធានការក្នុងការ ចុះបង្ក្រាបចាបឃាតទួកដឹកឈើទាំងនោះ បានម្ដងណាទេ។ បែរជាបណ្ដែតបណ្ដោយទុកអោយក្រុមឈ្មួញទាំងនោះ ធ្វើសកម្មភាពចរាចទូកឈើ ចាប់ពីព្រំប្រទល់ទឹកដីនៃខេត្តស្ទឹងត្រែងនិងខេត្តក្រចេះ ឆ្លងកាត់ស្រុកចំនួន៣ ក្រុង១ ក្នុងនោះ មានស្រុកសំបូរ ចិត្របុរី ក្រុងក្រចេះ និងស្រុកឆ្លូង ឆ្ពោះទៅខេត្តត្បូងឃ្មុំបានដោយរលូន និងមានសុវត្ថិភាពល្អណាស់។
ប្រភពដដែល បានបន្តឲ្យដឹងទៀតថា ស្ដ្រីម្នាក់ដែលត្រូវបានគេដឹងថា ជាកូនស្រីរបស់ឈ្នួញជួញដូរឈើម្នាក់ ដែលគេហៅថា តាមាណ រស់នៅភូមិជំនិច ឃុំជំនិច ស្រុកក្រូចឆ្មារ ខេត្តត្បូងឃ្មុំ ។ នៅពេលដែល ក្រុមអ្នកសារពត៌មានចុះទៅផ្ដិតយករូបភាពម្ដងៗ តែងតែអះអាងប្រាប់ថា រូបគេបានបង់ប្រាក់ទៅឲ្យសមត្ថកិច្ច គ្រប់ស្ថាប័នអស់ហើយ ដោយយនៅលើទូកឈើទាំងនោះ មានមនុស្សយ៉ាងតិចបំផុត ក៏មិនក្រោមពី២០នាក់ដែរ ។
នៅពេលដែលទូកឈើធ្វើចរាចម្ដងៗ ភ្នាក់ងារសារពត៌មានរបស់យើង គឺមិនអាចចុះទៅចាប់ឃាតទូកឈើ ដូចជាមន្ត្រីជំនាញមេព្រៃ និងកម្លាំងសមត្ថកិច្ចនោះឡើយ គឺបានត្រឹមតែតាមថតផ្តិតយករូបភាពមកផ្សាយជូនទស្សនាតែប៉ុណ្ណោះ ហើយក្រុមការងាររបស់យើង នឹងខិតខំបន្តតាមផ្តិតយករូបភាពបទល្មើសទូកឈើនេះបន្តទៀតដើម្បីផ្សាយអោយបងប្អូនបានទស្សនា៕
ដោយ កិៈ ខន
