ភ្នំពេញ ៖ គេថាតុលាការជាដុល្លារការ ប្រហែលជាមិនខុសទេមើលទៅ ព្រោះតាមការកត់សម្គាល់អ្នកមានលុយកំរឹតឧកញ៉ាមានទោសជាប់គុកក៏ជាប់មិនយូដែរ ។ ជាក់ស្តែងដូចករណីយ៍លោកឧត្តមសេនីយ៍ត្រី ប៉ិច តុងហេង ជាថៅកែខុនដូ ភី ធី អេស រ៉េស៊ីដេន ដែលយកកាំភ្លើងវាយកម្មករឃ្លាំងអេដចាយបែកក្បាលកាលពីព្រឹកថ្ងៃទី២៤ ខែមេសា ឆ្នាំ២០១៨ នៅក្បែរអគារ ខុនដូ របស់ជនបង្ក នៅខណ្ឌចំការមនចឹង បានចេញពីគុកវិញបាត់ទៅហើ កាលពីថ្ងៃទី១៤ ខែមិថុនា ឆ្នាំ២០១៨ តាមដីកាបង្គាប់ឲ្យដោះលែងរបស់លោក ពេជ្រ វិជ្ជាធរ ចៅក្រមស៊ើបសួរ នៃសាលាដំបូងរាជធានីភ្នំពេញ។លោកឧត្តមសេនីយ៍ត្រី ប៉ិច តុងហេងថៅកែខុនដូ ភី ធី អេស រ៉េស៊ីដេន ទីលំនៅផ្ទះ២២ដេ ផ្លូវ៣៦៨ សង្កាត់បឹងកេងកង៣ ខណ្ឌចំការមន រាជធានីភ្នំពេញ ត្រូវបានលោក សៀង សុខ ជាតំណាងអយ្យការអមសាលាដំបូងរាជធានីភ្នំពេញ ចោទប្រកាន់ ពីបទ ហិង្សាដោយចេតនា មានស្ថានទម្ងន់ទោស យោងតាមមាត្រា ២១៧ និងមាត្រា ២១៨ នៃក្រមព្រហ្មទណ្ឌ និងបានបញ្ជូនសំណុំរឿងនេះទៅចៅក្រមស៊ើបសួរដើម្បីចាត់ការបន្តតាមច្បាប់។
លោក រស់ ពិសិដ្ឋ ចៅក្រមស៊ើបសួរនៃសាលាដំបូងរាជធានីភ្នំពេញ កាលពីរសៀលថ្ងៃទី២៨ ខែមេសា ឆ្នាំ២០១៨កន្លងទៅ បានចេញដីកាសម្រេចឲ្យឃុំខ្លួន លោកឧត្តមសេនីយ៍ត្រី ប៉ិច តុងហេង ជាថៅកែខុនដូ ភី ធី អេស រ៉េស៊ីដេន ដែលកាំភ្លើងវាយកម្មករឃ្លាំងអេដចាយបែកក្បាល នៅពន្ធនាគាររាជធានីភ្នំពេញ (PJ) ជាបណ្តោះអាសន្នសិនរងចាំ បន្តនីតិវិធីនាពេលក្រោយ។អាឡូវត្រូវបានដោះលែងឲ្យនៅក្រៅឃុំបាត់។
សមត្ថកិច្ច បានឲ្យដឹងថា សំណុំរឿង លោកឧត្តមសេនីយ៍ត្រី ប៉ិច តុងហេង នេះសមត្ថកិច្ច បញ្ជូនខ្លួន និងសំណុំរឿងទៅតុលាការ ចំណែកអាវុធខ្លីដែលលោកឧត្តមសេនីយ៍ត្រី ប៉ិច តុងហេង ប្រើដើម្បីប្រព្រឹត្តបទល្មើសវាយក្បាលកម្មករអេដចាយនោះ គឺសមត្ថកិច្ច មិនបានដកហូត និងបញ្ជូនទៅតុលាការនោះទេ។
ជនរងគ្រោះដែលត្រូវឧត្តមសេនីយ៍ត្រី ប៉ិច តុងហេងយកកាំភ្លើងវាយ ក្បាលមានឈ្មោះ សាំង តុលា អាយុ ២១ ឆ្នាំ កម្មករឃ្លាំងអេដចាយ ដោយគ្រាន់ ព្រោះខឹងជនរងគ្រោះ មើលមុខរបស់ខ្លួន។
នៅមុនពេលកើតហេតុ គេឃើញជនត្រូវចោទ បានជិះរថយន្តស្ព័រ Chevrolet Camaro ពាក់ស្លាកលេខ ភ្នំពេញ 2AP-8989 ដោយរោទ៍សម្លេងខ្លាំងៗ ទើបជនរងគ្រោះមើលមុខជនសង្ស័យដែលនៅក្នុងរថយន្ត។ ពេលឃើញកម្មករ មើលមុខ បែបនោះ ជនសងស្ស័យ បានបើករថយន្ត ត្រលប់មកវិញហើយ ក៏ចុះពីលើរថយន្តដោយមានកាន់កាំភ្លើងខ្លី ទំនើបមួយដើម ទៅវាយកម្មករនោះបែកក្បាលជាច្រើនថ្នេរតែម្តង។
ប្រភពពីសមត្ថកិច្ចឲ្យដឹងថា៖ សំណុំរឿងនេះ លោកឧត្តមសេនីយ៍ត្រី ប៉ិច តុងហេង បានសងសំណងទៅជនរងគ្រោះចំនួន ៤០០០ដុល្លារ ដើម្បីឲ្យជនរងគ្រោះព្រមដកពាក្យបណ្តឹង ដើម្បីបើកផ្លូវឲ្យតុលាការមានហេតុផលសមរម្យមួយក្នុងការដោះលែង នៅក្រៅគុក ៕
