រតនគីរី៖ ជនសង្ស័យប្រុសស្រី ២នាក់ ម្នាក់ធ្លាប់ពន្ធនាគារ ត្រូវសមត្ថកិច្ចសង្ស័័យឃាត់ខ្លួនយកមកសាកសួរ បន្ទាប់ពីជនសង្ស័យបានសារភាព ស្អែកឡើងទៅឆែកឆេរដល់ផ្ទះ បានគ្រឿងញៀនជិតមួយគីឡូក្រាម។
នៅព្រឹកថ្ងៃទី២៧ ខែមិថុនា ឆ្នាំ២០១៨ កម្លាំងជំនាញការិយាល័យប្រឆាំងគ្រឿងញៀន នៃស្នងការនគរបាលខេត្តរតនគិរី ដឹកនាំសម្របសម្រួលដោយលោក រ៉ា បូរ៉ាន់ឌី ព្រះរាជអាជ្ញារងអមសាលាដំបូងខេត្តរតនគិរី ចុះឆែកឆេរ ផ្ទះជនសង្ស័យមួយកន្លែង ស្ថិតក្នុងភូមិថ្មី សង្កាត់ឡាបានសៀក ក្រុងបានលុង ខេត្តរតនគិរី រឹបអូសបានវត្ថុតាងគ្រឿងញៀនជិត១គីឡូក្រាម ព្រមទាំងឧប្បករណ៍គ្រឿងញៀនមួយចំនួនទៀត។
តាមការឲ្យដឹងពីលោកវរៈសេនីយ៍ទោ លាង អ៊ីម នាយការិយាល័យនគរបាលប្រឆាំងគ្រឿងញៀនស្នងការខេត្ត បានឲ្យដឹងថា នៅវេលាម៉ោង៦.៤០នាទី ព្រលប់ថ្ងៃទី២៦ ខែមិថុនា ឆ្នាំ២០១៨ កម្លាំងជំនាញបានធ្វើការឃាត់ខ្លួនជនង្ស័យ ២នាក់ នៅភូមិជ័យជំនះ សង្កាត់ឡាបានសៀក ក្រុងបានលុង គ្រាដែលសមត្ថកិច្ចជំនាញមានការសង្ស័យ ហើយជនទាំង២នាក់ ម្នាក់ជាមុខសញ្ញាចាស់ ធ្លាប់ជាប់ពន្ធនាគារ។
ជនសង្ស័យទាំង ២នាក់ ១.ឈ្មោះ លីម ស៊ីថា ភេទប្រុស អាយុ៣១ឆ្នាំ និងម្នាក់ទៀតមានឈ្មោះ គីម ហ័រ ភេទស្រី អាយុ២០ឆ្នាំ។ អ្នកទាំង២ ជួលផ្ទះនៅភូមិថ្មី សង្កាត់ឡាបានសៀក ក្រុងបានលុង ជាមួយគ្នា តែមិនមែនជាប្ដីប្រពន្ធទេ។ បន្ទាប់ពីសមត្ថកិច្ចជំនាញឃាត់ខ្លួនយកមកធ្វើតេសទឹកនោមឃើញវិជ្ជមាន ព្រមទាំងជនសង្ស័យបានសារភាពថាខ្លួនពិតជាធ្លាប់ចែកចាយ និងប្រើប្រាស់សារធាតុញៀនផងនោះ ទើបព្រឹកឡើងថ្ងៃទី២៧ សមត្ថកិច្ចជំនាញឈានដល់ការឆែកឆេរផ្ទះជនសង្ស័យជួលនៅ ភូមិសង្កាត់ខាងលើ។
លោកនាយការិយាល័យ បានបញ្ជាក់ទៀតថា បន្ទាប់ពីធ្វើការឆែកឆេរ សមត្ថកិច្ចបានរកឃើញភស្ដុតាងរួមមាន ម្សៅក្រាមពណ៌សចំនួន១៥ថង់ ក្នុងនោះមាន ១ថង់ធំ ៤ថង់ធំល្មម និង១០ថង់តូចៗ សរុបស្មើនិង ៧៣៩.៧៦ក្រាម ជញ្ជីងថ្លឹង២ កាំបិតស្នៀត១ ព្រមទាំងសម្ភារៈសម្រាប់សេពគ្រឿងញៀនមួយចំនួនទៀត។
បច្ចុប្បន្ន ជនសង្ស័យទាំង ២នាក់ រួមទាំងវត្ថុតាង ត្រូវបានឃាត់ខ្លួន និងរក្សាទុក នៅការិយាល័យប្រឆាំងគ្រឿងញៀន ស្នងការខេត្ត ដើម្បីកសាងសំណុំរឿង បញ្ជូនទៅអយ្យការអមសាលាដំបូងខេត្តរតនគិរី៕
ដោយ ៖ ចាប សំអាន