ភ្នំពេញ ៖ ស្ត្រីមេតុងទីនម្នាក់ស៊ីដាច់លុយកូនៗជាងពីរលានដូល្លារអាមេរិកត្រូវបានចៅក្រមស៊ើបសួសម្រេចដោះលែងឲ្យនៅក្រៅឃុំធ្វើឲ្យកូនតុងទីនក្តៅក្រហាយ។ស្ត្រីជាមេតុងទីននេះឈ្មោះលីគីមហួរអាយុ៣៣ឆ្នាំត្រូវបាន លោកហ៊ឹងប៊ុនថនព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញចោទប្រកាន់ ពីបទ ”រំលោភលើទំនុកចិត្ត”ប្រព្រឹត្តនៅចំណុចរាជធានីភ្នំពេញ កាលពីថ្ងៃទី២០ ខែសីហា ឆ្នាំ២០១៧ តាមមាត្រា ៣៩១និងមាត្រា៣៩២នៃក្រមព្រហ្មទណ្ឌ ។
ជាបទល្មើសព្រហ្មទណ្ឌពាក់ព័ន្ធការស៊ីដាច់ប្រាក់កូនតុងទីនចំនួន១៧នាក់ សរុបទឹកប្រាក់ជាង២លានដុល្លារបញ្ជូនទៅឲ្យចៅក្រមស៊ើបសួរ ។ ប៉ុន្តែពេលចូលដល់ដៃលោក កូយ សៅដែលជា ចៅក្រមស៊ើបសួរបានអនុញ្ញាតឱ្យត្រឡប់ទៅវិញឆ្កុយដោយ លោក កូយ សៅយល់ថា នេះជារឿងរដ្ឋប្បវេណីគ្រាន់តែ ដាក់ឱ្យស្ថិតក្រោមការត្រួតពិនិត្យតាមផ្លូវតុលាការ រួចអនុញ្ញាតឱ្យត្រឡប់ទៅវិញ ។ ការសម្រេចដោះលែងនេះធ្វើឱ្យកូនតុងទីនទាំង១៧នាក់ កំពុងមានប្រតិកម្ម ។
យោងតាមសំណុំរឿងព្រហ្មទណ្ឌលេខ១៧៧៤ ចុះថ្ងៃទី២២ ខែមិថុនា ឆ្នាំ២០១៨ បង្ហាញថា កាលពីអំឡុងឆ្នាំ២០១៤ ឈ្មោះ លី គីមហួរ និង ម្តាយឈ្មោះ តាំង គីមហួង បានលួងលោមឱ្យឈ្មោះ ប៊ុន សុភាព សមាជិកដទៃទៀត លេងតុងទីនដោយឈ្មោះ លី គីមហួរ និង ម្តាយឈ្មោះ តាំង គីមហួង ធ្វើជាមេតុងទីនជាបន្តបន្ទាប់រហូតសរុប១៥លើក។
ក្នុងនោះមានក្បាល៥០០ដុល្លារ , ក្បាល៣០០ដុល្លារ , ក្បាល២០០ដុល្លារ , និង ក្បាល២០ដុល្លារ ជាច្រើនក្បាល ដោយចាប់តាំងពីលេងតុងទីនមក ឈ្មោះ ប៊ុន សុភាព បានបង់ប្រាក់ឱ្យទៅឈ្មោះ លី គីមហួរ និង ម្តាយឈ្មោះ តាំង គីមហួង ជាបន្តបន្ទាប់សរុប២លាន៦សែនដុល្លារ ។លុះមកដល់ពាក់កណ្ដាលខែមិថុនាឆ្នាំ២០១៧ ឈ្មោះ តាំងគីមហួងបានលួចចេញទៅក្រៅប្រទេសស្ងាត់ៗ ដោយមិនប្រាប់កូនតុងទីនបានដឹងឡើយ ហើយបានឱ្យឈ្មោះលី គីមហួរ ជាអ្នកដើរប្រមូលប្រាក់ជំនួស ។
ស្រាប់តែថ្ងៃទី២០ ខែសីហា ឆ្នាំ២០១៧ នៅពេលដែលឈ្មោះ ប៊ុន សុភាព និង កូនតុងទីនដទៃទៀត ដល់ថ្ងៃប្រមូលប្រាក់តុងទីនមកវិញ ហើយបាននាំគ្នាទៅទារប្រាក់ពីឈ្មោះ តាំង គីមហួង និង ឈ្មោះ លី គីមហួរ។ តែអ្នកទាំងពីរបានគេចវេសនិងរឹបយកប្រាក់ទាំងអស់ធ្វើជាប្រយោជន៍ផ្ទាល់ខ្លួន មិនព្រមប្រគល់ប្រាក់ឱ្យទៅឈ្មោះ ប៊ុន សុភាព កូនតុងទីនដទៃទៀត រហូតមកទល់បច្ចុប្បន្ន ។
ការសម្រេចរបស់លោក កូយ សៅដែលជា ចៅក្រមស៊ើបសួរ ដើមបណ្តឹងចំនួន១៧រូប កើតទុក្ខមិនសុខ ចិត្ត ទេ ។ព្រោះពួកគេយល់ឃើញថា ដើមបណ្តឹងមិនទាន់បានទទួល នូវ អ្វីហៅថា មានការស្រុះស្រួលគ្នានៅឡើយ ដែលនេះជាការធ្វើឱ្យប៉ះពាល់ដល់ផលប្រយោជន៍ ពួកគេធ្ងន់ធ្ងណាស់។ចឹងធើម៉េចទៅចុះ?ស្រុករំដួលយើងវាចឹងនោះ៕