ក្រចេះ៖ ក្រូចថ្លុងកោះទ្រង ជាផលិតផលតែមួយគត់ នៅលើដីកោះ ក្នុងសង្កាត់កោះទ្រង ក្រុងក្រចេះ ដែលធ្លាប់មានកេរ្តិ៍ឈ្មោះល្បីល្បាញ់នៅលើទីផ្សាជាតិ និងមានរស់ជាតិផ្អែមឆ្ងាញ់ មានការទាក់ទាញដល់ភ្ញៀវទេសចរអន្តរជាតិ នាពេលកន្លងមក។ ឥឡូវក្រូចថ្លុងកោះទ្រង ត្រូវបានក្រសួងពាណិជ្ជកម្ម ដែលមាននាយកដ្ឋានកម្មសិទ្ធិបញ្ញា ជាសេនាធិការ បានដាក់ឲ្យប្រើប្រាស់នូវម៉ាកសម្គាល់ភូមិសាស្ត្រទំនិញទទួលស្គាល់ជាផ្លូវការ ដើម្បីជៀសវៀងការខ្លែងបន្លំ។
ការដាក់ឲ្យប្រើប្រាស់នូវម៉ាកសម្គាល់ភូមិសាស្ត្រទំនិញនេះ គឺត្រវបានធ្វើឡើងនាព្រឹកថ្ងៃទី២៥ ខែមិថុនា ឆ្នាំ២០១៨ ក្រោមអធិបតីភាពឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងឯកឧត្តម វ៉ា ថន អភិបាលនៃគណៈអភិបាលខេត្តក្រចេះ និងមានវត្តមានចូលរួមពីតំណាងអង្គការកម្មសិទ្ធិបញ្ញាពិភពលោកផងដែរ។
មានប្រសាសន៍ស្វាគមន៍នាពេលនោះ ឯកឧត្តម វ៉ា ថន អភិបាលខេត្តក្រចេះ បានឲ្យដឹងថា សង្កាត់កោះទ្រង គឺជាសង្កាត់មួយក្នុងសៗចំណោមសង្កាត់ទាំង៥ ក្នុងក្រុងក្រចេះ ដែលមានទីតាំងស្ថិតនៅកណ្តាលដងទន្លេមេគង្គ ទល់មុខទីប្រជុំជនក្រុងក្រចេះ មានប្រជាពលរដ្ឋសរុប ៣៩៥គ្រួសារ និងមានផ្ទៃដីសរុបប្រមាណជា ២២៣ហិកតា។ ដោយសារស្ថានភាពទីតាំងដីនៅលើកោះមានការអំណោយទាំងវិស័យទេសចរ និងវិស័យកសិកម្ម ប្រជាពលរដ្ឋប្រមាណជា៨០%នៃចំនួនប្រជាពលរដ្ឋសរុប ប្រកបរបរកសិកម្ម ជាពិសេស ការដាំដុះក្រូចថ្លុងនេះតែម្តង ដែលបានផ្តល់នូវប្រាក់ចំនូលខ្ពស់ជួយសេដ្ឋកិច្ចគ្រួសារ។
រដ្ឋមន្ត្រីក្រសួងពាណិជ្ជកម្ម ឯកឧត្តម ប៉ាន សូរស័ក្តិ បានមានចំណាប់អារម្មណ៍ថា នៅលើកោះទ្រង ក្រៅពីមានទេសភាពស្រស់ត្រកាលគ្មានពីរកណ្តាលដងទន្លេមេគង្គ ក៏នៅមានផ្លែក្រូចថ្លុងកោះទ្រង ជាប្រភេទផ្លែឈើហូបផ្លែតែមួយគត់ដែលប្រជាពលរដ្ឋប្រមាណជាង៨០%នៃប្រជាពលរដ្ឋរស់នៅលើកោះសរុបបានដាំដុះ។ ចំពោះការដាំដុះមានលក្ខណៈធម្មជាតិ១០០% ដោយសារទឹកដីកោះទ្រង ជាប្រភេទដីល្បាយខ្សាច់ ដែលមានជីវជាតិ និងអំណោយផលដល់កសិកម្ម ក្រូចថ្លុង ធ្វើឲ្យមានរស់ជាតិផ្អែមឆ្ងាញ់ ខុសពីក្រូចថ្លុងចេញពីតំបន់ភូមិសាស្ត្រផ្សេងៗទៀត។
ការដាក់ឲ្យប្រើប្រាស់នូវម៉ាកសម្គាល់ភូមិសាស្ត្រទំនិញក្រូចថ្លុងកោះទ្រងថ្ងៃនេះ គឺដើម្បីជួយការពារអត្តសញ្ញាណ ផលិតផលប្រពៃណី បង្កើតឱកាសការងារ និងបង្កើនប្រាក់ចំនូលកាន់តែច្រើនសម្រាប់ប្រជាពលរដ្ឋក្នុងមូលដ្ឋាន ព្រមទាំងចូលរួមចំណែកកាត់បន្ថយភាពក្រីក្រ និងការធ្វើចំណាក់ស្រុក។ ជាងនេះទៅទៀត ម៉ាកសម្គាល់ភូមិសាស្ត្រទំនិញក្រូចថ្លុងកោះទ្រង នឹងចូលរួមលើកស្ទួយវិស័យទេសចរជាតិ និងគោលនយោបាយភូមិមួយផលិតផលមួយរបស់រាជរដ្ឋាភិបាល ព្រមទាំងផ្តល់លទ្ធភាពគ្រប់គ្រាន់ជូនប្រជាកសិករ ដើម្បីធ្វើការនាំចេញក្រូចថ្លុងទៅកាន់ទីផ្សាជាតិ និងអន្តរជាតិ សំដៅនាំមកនូវប្រាក់ចំនូល ដើម្បីកំនើនសេដ្ឋកិច្ចជាតិ។
ឯកឧត្តម បញ្ជាក់ថា ការជម្រុញម៉ាកសម្គាល់ភូមិសាស្ត្រទំនិញ គឺជាឧបករណ៍ទីផ្សារដែលមានសក្តានុពលនិងប្រសិទ្ធិភាពខ្ពស់។ ជាក់ស្ដែង ចាប់តាំងពីក្រសួងពាណិជ្ជកម្ម បានជម្រុញនិងអភិវឌ្ឍន៍ម៉ាកសម្គាល់ភូមិសាស្ត្រទំនិញក្រូចថ្លុងនេះ គឺបានធ្វើឲ្យតម្លៃទីផ្សារក្រូចថ្លុងមានការកលនឡើងពី៥ពាន់រៀល ដល់១២០០០រៀលក្នុងមួយផ្លែ និងបន្តកើនថែមទៀតនៅពេលអនាគត។
បច្ចុប្បន្ន ប្រជាកសិករដាំក្រូចថ្លុង ទទួលបានទិន្និផលប្រចាំឆ្នាំយ៉ាងតិច១០០ផ្លែក្នុងមួយដើម ក្នុងចំណោម២៤៧៤ដើម។ ឯកឧត្តម បានអំពាវនាវដល់បងប្អូនប្រជាពលរដ្ឋឲ្យរុះរាន់ចុះឈ្មោះចូលជាសមាជិកសមាគមដាំក្រូចថ្លុងកោះទ្រង ហើយត្រូវបន្តកិច្ចសហប្រតិបត្តិការគោរពនិងអនុវត្តទៅតាមសៀវភៅបន្ទុករបស់សមាគម ដើម្បីទទួលបានសិទ្ធិប្រើប្រាស់ម៉ាកសម្គាល់ភូមិសាស្ត្រទំនិញលើផលិតផលក្រូចថ្លុងកោះទ្រងរបស់ខ្លួន សំដៅធានាបានការបញ្ញាក់ប្រភព គុណភាពជូនអ្នកបរិភោគ និងដើម្បីងាយស្រួលក្នុងការទប់ស្កាត់ការខ្លែងបន្លំដែលមានជាយថាហេតុ៕
ដោយ ម៉ែន បូរិទ្ធ
