ក្រចេះ៖ រថយន្តយីឌុបដឹកដំឡូងមីស្ងួតមួយគ្រឿង ដែលផ្ទុកទម្ងន់ជិត៤០តោន បានក្រឡាប់ធ្លាក់ពីលើស្រឡាចូលទន្លេ តែសំណាងល្អអ្នកបើកបររថយន្ត បានរួចផុតពីគ្រោះថ្នាក់។
ហេតុការណ៍នេះ បានកើតឡើងកាលពីវេលាម៉ោង ១៣និង១៥នាទីរសៀលថ្ងៃទី០៤ ខែឧសភា ឆ្នាំ២០១៦នេះ នៅលើដ-ចម្លង (ឆ្លូង-កំពង់គរ) ឋិតនៅត្រើយខាងលិចនៃទន្លេមេគង្គ ក្នុងឃុំកំពង់គរ ស្រុកព្រែកប្រសព្វ ខេត្តក្រចេះ បង្កឲ្យមានការភ្ញាក់ផ្អើលដល់ប្រជាពលរដ្ឋ។
អ្នកបើកបររថយន្តឈ្មោះ សឹង ស៊ីថា ភេទប្រុស អាយុ៤២ឆ្នាំរស់នៅឃុំដីដុះ ស្រុកព្រែកប្រសព្វ បើកបររថយន្តពាក់ស្លាកលេខ កំពង់ចាម 3A-4344។ លោក បានប្រាប់BTV Newsថា នៅមុនពេលហេតុការនេះបានកើតឡើងរូបលោក ដែលជាអ្នកបើករថយន្តផ្ទាល់បានបើករថយន្តឡើងលើស្រឡាងដោយខាងក្បាល់ឡឡើងទៅមុនហើយមានកម្មករម្នាក់ឈរចាំស៊ីញ៉ូដៃពីមុខរថយន្ត អោយរថយន្តរបស់លោកឡើងលើស្រឡាងនោះ។
ប៉ុន្តែ រថយន្តឡើងមិនទាន់បានពាក់កណ្ដាល់ស្រឡាងផង ស្រាប់តែស្រឡាងនោះ ស្រាប់តែផ្អៀងទៅមួយចំហៀង បណ្ដាលអោយរថយន្តរបស់លោកក្រឡាប់ធ្លាក់ទឹកទន្លេតែម្ដង ចំណែករូបលោក ឃើញសភាពដូច្នេះ ក៏លោតចេញពីរថយន្តនោះភ្លាម។
លោក បានបន្តថា រថយន្តរបស់លោក ដឹកដំឡូងមីស្ងួត ផ្ទុកទម្ងន់មានចំនួនជិត៤០តោន ឆ្លងតាមស្រឡាងនេះ សឹងថារាល់ថ្ងៃ ទាំងថ្ងៃទាំងយប់ ដោយឆ្លងទៅមកម្ដង ម្ចាស់ដ-ចម្លងគេយកតម្លៃ២៣ម៉ឺនរៀល។
លោក សឹង ស៊ីថា បានបញ្ជាក់ថា មូលហេតុ ដែលបណ្ដាលអោយរថយន្តលោកក្រឡាប់បែបនេះ គឺបណ្ដាលមលពីការធ្វេសប្រហេសរបស់ម្ចាស់ដ និងអ្នកគ្រប់គ្រងនៅលើនោះ ទើបបណ្ដាលអោយមានរឿងយ៉ាងដូច្នេះ។
ចំណែកឯកម្មករដែលធ្វើការនៅលើស្រឡាងនោះវិញ បានឲ្យដឹងថា នៅពេលដែលឃើញរថយន្តដឹកដំឡូងមីនោះរៀបឡើងលើស្រឡាង រូបគេបានអោយប្រជាពលរដ្ឋដែលនៅលើស្រឡាងនោះអែបទៅម្ខាង ដោយដឹងថារថយន្តដឹកដំឡូងមីនោះធ្ងន់ ហើយក៏អោយរថយន្តនោះឡើងមកតិចៗ។ ស្រាប់តែរថយន្តឡើងមកយ៉ាងលឿន ហើយពេលនោះស្រឡាងក៏ផ្អៀង ពេលនោះរថយន្តនោះក៏ឈប់ស្ងៀត។ ក្រោយមកទៀត អ្នកបើកបររថយន្តនោះក៏បានបើកថយក្រោយធ្វើឲ្យស្រឡាងនោះផ្អៀងកាន់តែខ្លាំងបណ្ដាលឲ្យរថយន្តដឹកដំឡូងនោះក្រឡាប់ធ្លាក់ចូលទន្លេតែម្ដងទៅ នេះបើតាមការលើកឡើងរបស់កម្មករដែលធ្វើការនៅលើស្រឡាងនោះ។
ជាមួយគ្នានោះដែរ លោក ម៉ាត់ ហ៊ីម ដែលជាម្ចាស់ដ-ចម្លង បានចេញមុខមកធ្វើការអន្តរាគមន៍ ដោយស្រែកប្រាប់មហាជនថា ដ-ចម្លងរបស់លោក គឺជាអ្នកត្រូវ ចំណែកឯភាគីខាងរថយន្ត គឺជាអ្នកខុស ទើបរថយន្តធ្លាក់ចូលទន្លេបែបនេះ មិនមែនជាកំហុសរបស់ដ-ចម្លងរបស់លោកឡើយ ដូច្នេះហើយសូមអ្នកយកពត៌មានទាំងអស់មេត្តាជួយផ្សាយអោយបានត្រឹមត្រូវផង ព្រោះដ-របស់លោកមិនបានខុសទេ។
តែទោះជាយ៉ាងណាក្ដី ប្រភពពីប្រជាពលដ្ឋដែលរស់នៅឃុំកំពង់គរស្រុកព្រែកប្រសព្វ បានអោយBTV Newsថា ពួកគាត់ គឺមានការមិនពេញចិត្តជាខ្លាំងចំពោះឥរិយាបថរបស់លោក ម៉ាត់ ហ៊ីម ដែលជាម្ចាស់ដចម្លងខាងលើនេះ និងកូនចៅរបស់លោកនាពេលកន្លមក ដែលធ្វើអោយប្រជាពលដ្ឋកើតមានការថ្នាំងថ្នាក់ចិត្ត មានការព្រួយបារម្ភជាខ្លាំង ចំពោះសុវត្ថិភាពផ្ទាល់ខ្លួន និងទ្រព្យសម្បត្តិ៍នៅពេលឆ្លងម្ដងៗ។
ប្រភពដដែល បានធ្វើការរិះគន់យ៉ាងចាស់ដៃចំពោះលោក ម៉ាត់ ហ៊ីម ដែលជាម្ចាស់ដ-ចម្លង (ឆ្លូង-កំពង់គរ)ថា ករណីក្រឡាប់រថយន្តខាងលើនេះ មិនមែនជារឿងថ្មីនឹងទើបតែកើតឡើងនោះទេ ប៉ុន្តែផ្ទុយទៅវិញ វាបានកើតឡើងជាច្រើនលើកមកហើយ។ ក្នុងរយៈពេលប៉ុន្មានឆ្នាំកន្លងទៅនេះ គឺដោយសារតែការប្រមាថ និងការធ្វេសប្រហេសរបស់លោក ម៉ាត់ ហ៊ីម និងកម្មកររបស់លោក ធ្វើឲ្យទ្រព្យសម្បត្តិ៍ប្រជាពលរដ្ឋមួយចំនួនត្រូវខូចខាត និងបាត់បង់អាយុជីវិត។
ប្រភពពីប្រជាពលដ្ឋដដែល បានបន្តអោយដឹងទៀតថា ហើយករណីខាងលើនេះទៀតសោធ គឺបានកើតឡើងចំនួន ៣លើក ចំពោះរថយន្តដឹដំឡូងមី មានចំនួន ២លើក ក្រឡាប់រថយន្តដឹកដើមរាំងចំនួន ១លើក និងករណីមនុស្សវ័យចំណាស់ លោតពីលើស្រឡាងលង់ទឹកស្លាប់ម្នាក់ កាលពីឆ្នាំ២០១៥កន្លងទៅនោះ។
ទន្ទឹមនឹងនោះផងដែរ ប្រជាពលរដ្ឋ ក៏បានអំពាវនាវដល់អាជ្ញាធរខេត្ត និងមន្ទីរពាក់ព័ន្ធ សូមមេត្តាជួយចុះពិនិត្យមើល និងមានវិធានការទប់ស្កាត់ចំពោះកន្លែងធ្វើអាជីវកម្មកំពង់ចម្លង (ឆ្លូង-កំពង់គរ)មួយនេះផង ព្រោះថារថយន្តយីឌុបដែលឆ្លងទៅមកម្ដងៗ គឺសុតតែធំៗ ហើយដឹកធ្ងន់ ធ្វើឲ្យប្រជាពលរដ្ឋដែលធ្វើដំណើរឆ្លងតាមស្រឡាងនោះម្ដងៗ មានការព្រួយបារម្ភយ៉ាងខ្លាំង ៕ ដោយ កិះ ខន
