ក្រចេះ៖ ឧបករណ៍នេសាទត្រីខុសច្បាប់ (ឆក់) មិនត្រឹមតែជះឥទ្ធិពលប៉ះពាល់ដល់មច្ឆាជាតិ និងធនធានធម្មជាតិនៅក្នុងទឹកប៉ុណ្ណោះទេ វាថែទាំងអាចឆក់យកជីវិតមនុស្សយើងបានថែមទៀតផង។ គួរំលឹកថាមនុស្សជាច្រើននាក់ ដែលជាមុខសញ្ញា និងជាអ្នកសកម្មក្នុងការប្រព្រឹត្តបទល្មើសនេសាទឆក់ត្រី មួយចំនួនត្រូវបានបាត់បង់ជីវិត និងមួយចំនួនទៀតត្រូវពិការក៏មាន ដោយសារតែប្រភេទឧបកណ៍ឆក់មួយនេះ ប៉ុន្តែទោះជាយ៉ាងណាក្តី គេនៅតែសង្កេតឃើញថា មានប្រជាពលរដ្ឋមួយចំនួននៅតែបន្តសកម្មភាពប្រព្រឹត្តបទល្មើសទាំងនោះ ដោយមិនមានការខ្លាចរអាសមត្ថកិច្ច អាជ្ញាធរដែនដី និងសុវត្ថិភាពខ្លួនឯងឡើយ ទោះបីជាមានការហាមឃាត់យ៉ាងម៉ឺងម៉ាត់ដោយច្បាប់ ស្តីពី ជលផល ក៏ដោយ។
ជាក់ស្ដែង កាលពីវេលាម៉ោង១៨h.០០ថ្ងៃទី២៣ មិថុនា ២០១៨ មានបុរសម្នាក់ឈ្មោះ ស្រី ខ្នឿន អាយុ៤០ឆ្នាំ បានធ្វើសកម្មភាពឆក់ត្រីដូចសព្វមួយដង ប៉ុន្តែជាអកុសល ត្រូវបានដុំឆក់ ឆ្លងចរន្តអគ្គីសនីឆក់ខ្លួនឯងស្លាប់នៅនឹងកន្លែង។
ហេតុការនេះ គឺកើតឡើងនៅចំណុចស្រែប៉ាវ៉ា ចម្ងាយពីភូមិចង្ហប ឃុំក្បាលដំរី ៦គ.ម ស្ថិតនៅក្នុងស្រុកសំបូរ ខេត្តក្រចេះ។
បើយោងតាមសម្តីរបស់ប្រពន្ធជនរងគ្រោះ បានបំភ្លឺថា មុនពេលកើតហេតុ ប្តីរបស់គាត់បានចេញពីខ្ទមស្រែទៅឆក់ត្រីនៅអូរមួយឈ្មោះ អូរប៉ាវ៉ា នៅក្បែរជាប់នឹងស្រែរបស់គាត់ ស្រាប់តែពេលនោះ គាត់ក៏បានឃើញប្តីដួលគាត់ក៏រត់ទៅមើលឃើញប្តីត្រូវឆក់ស្លាប់ ដោយឧបករណ៍ឆក់ត្រីរបស់ខ្លួនឯង។
ក្រោយទទួលបានពតិមានកម្លាំងប៉ុស្តិ៍ក្បាលដំរី បានចុះទៅពិនិត្យសាកសពឃើញថា ជាករណីឆក់ពិតប្រាកដ ក៏បានប្រគល់សពជូនក្រុមគ្រួសារធ្វើបុណ្យតាមប្រពៃណី៕ដោយ ម៉ែន បូរិទ្ធ