ភ្នំពេញៈ មនុស្សចំនួន៤០នាក់ ក្នុងនោះស្ត្រីពោះធំ៣៦នាក់ និងក្មេង២នាក់ រួមជាមួយជនជាតិចិន និងខ្មែរ២នាក់ផ្សេងទៀត ដែលជាប់សង្ស័យ ជាអ្នកស៊ីឈ្នួលពរពោះ ត្រូវបានម្លាំ រាជធានីភ្នំពេញ ឆ្មក់បង្ក្រាបឃាត់ខ្លួន នៅក្នុងវីឡាលេខ២ និងវីឡាលេខ៩អា ស្ថិតក្នុងបុរីវិមានភ្នំពេញ សង្កាត់ច្រាំងចំរេះទី១ ខណ្ឌឫស្សីកែវ នៅយប់ថ្ងៃទី២១ ខែមិថុនា ឆ្នាំ២០១៨។
ក្នុងប្រតិបត្តិការនេះនគរបាលរាជធានីភ្នំពេញ មានកិច្ចសហការពីអាជ្ញាធរ សមត្ថកិច្ច អាវុធហត្ថខណ្ឌឫស្សីកែវ និងខណ្ឌសែនសុខ ក្រោមការសម្របសម្រួលពីលោក គុជ គឹមឡុងព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ។
ជាលទ្ធផល ការបង្ក្រាបនេះសមត្ថកិច្ចឃាត់ខ្លូនបានជនសង្ស័យជនជាតិចិនម្នាក់ ឈ្មោះ លុយជៀង(LlU QlANG) ភេទប្រុស អាយុ៤៩ឆ្នាំ និងស្ត្រីពពោះចំនួន៣៧នាក់ មេការ២នាក់ និងដកហូតរថយន្ត២គ្រឿង រួមមាន រថយន្តឡិចស៊ីស 470 រថយន្តស៊ាំយ៉ុង និងម៉ូតូ១គ្រឿងផងដែរ។
ទោះបីយ៉ាងណា បន្ទាប់ពីឃាត់ខ្លួនជនជាតិចិន និងខ្មែរ២នាក់ ដែលជាប់សង្ស័យ និងក្មេង២នាក់ រួមជាមួយស្ត្រីពពោះ៣៦នាក់សមត្ថកិច្ចបញ្ជូនទៅកាន់ការិយាល័យប្រឆាំងការជួញដូរមនុស្ស និងការពារអនិតិជន នៃស្នងការនគរបាលរាជធានីភ្នំពេញ ដើម្បីបន្តនិតិវិធី៕