កំពង់ឆ្នាំង ៖ សមត្ថកិច្ចចាប់បានរថយន្តដឹកឈើមួយគ្រឿង ដែលមានផ្ទុកឈើប្រណិតប្រភេទធ្នុងចំនួន៧៥ដុំ កាលពីថ្ងៃទី១៩ខែមិថុនា ឆ្នាំ២០១៨ នៅលើកំណាត់ផ្លូវជាតិលេខ៦A ក្នុងភូមិព្រែកជ្រៃ ឃុំព្រែកដំបង ស្រុកមុខកំពូល ខេត្តកណ្តាលដែលគេដឹងថាមន្ត្រីជលផលខេត្តកំបង់ឆ្នាំងម្នាក់ដឹកយកទៅលក់។
ក្រោយពីផ្ទុះរឿងនេះគេហទំព័ររបស់វិទ្យុក្នុងស្រុកមួយបានដកស្រង់សម្តី លោកសោម ភិរុណ ដែលជានាយខណ្ឌរដ្ឋបាលជលផលខេត្តកំពង់ឆ្នាំង មកបញ្ជាក់អោយដឹងនៅរសៀលថ្ងៃទី២០ ខែមិថុនា ឆ្នាំ២០១៨នេះថា លោកកង ច័ន្ទដារិនលែងជាមន្ត្រីជលផលទៀតហើយ ។
លោកកង ច័ន្ទដារិនបានផ្ទេរភារកិច្ច ទៅបម្រើការងារនៅមន្ទីរកសិកម្ម រុក្ខាប្រម៉ាញ់ និង នេសាទខេត្តកំពង់ឆ្នាំង មានរយៈពេលមួយឆ្នាំ
ហើយ។
ការបដិសេធន៍របស់លោកសោម ភិរុណ ធ្វើឡើងក្រោយពេលដែល ប្រភពខាងលើបានអោយដឹងថា អ្នកបើកបររថយន្តដឹកឈើខាងលើមានឈ្មោះនួន ហៀងនិងព្រូរថយន្តឈ្មោះស៊ូ សារិទ្ធនៅពេលឃាត់ខ្លួនបានឆ្លើយសារភាពប្រាប់សមត្ថកិច្ចថា រថនិងឈើដែលត្រូវសមត្ថកិច្ចបង្ក្រាបបាននេះ ជារបស់ឈ្មោះកង ច័ន្ទដារិន មន្ត្រីជលផលខេត្តកំពង់ឆ្នាំង។
សូមបញ្ជាក់ថា ឈើប្រណិតប្រភេទធ្នង់៧៥ដុំ ដែលលោកកង ច័ន្ទដារិនឈ្មួញជាមន្ត្រីជលផលម្នាក់នៅខេត្តកំពង់ឆ្នាំង ដឹកតាមរថយន្តបម្រុងយកមកលក់នៅភ្នំពេញ ត្រូវកម្លាំងនគរបាលប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តកណ្តាល បង្ក្រាបបាននៅថ្ងៃទី១៩ ខែមិថុនា ឆ្នាំ២០១៨ តាមបណ្តោយផ្លូវជាតិលេខ៦A ក្នុងភូមិព្រែកជ្រៃ ឃុំព្រែកដំបង ស្រុកមុខកំពូល ខេត្តកណ្តាល។
ប្រភពពីសមត្ថកិច្ចបានអោយដឹងថា រថយន្តមួយគ្រឿងម៉ាកតូយូតា១បាំងកន្លះ ពណ៌ទឹកប្រាក់ ពាក់ស្លាកលេខភព២ ច ២៣១៩ ដែលផ្ទុកឈើប្រណីត ប្រណិតប្រភេទធ្នង់៧៥ដុំ មាន អ្នកបើកបរឈ្មោះ នួន ហៀង ភេទប្រុស អាយុ២៥ឆ្នាំ ជាអ្នកស៊ីឈ្នួលបើករថយន្តដឹកឈើខាងលើ និងព្រូម្នាក់ឈ្មោះ ស៊ូ សារិទ្ធ ភេទប្រុស អាយុ៣៥ឆ្នាំ អ្នកទាំងពីររស់នៅក្នុងភូមិស្រះកែវ ឃុំមេលំ ស្រុកបរិបូរណ៍ ខេត្តកំពង់ឆ្នាំង។
តាមចម្លើយសារភាពរបស់អ្នកបើកបររថយន្តខាងលើ បានឲ្យដឹងថាលោក រូបគេទាំងពីរនាក់ជាអ្នកស៊ីឈ្នួលដឹកឲ្យម្ចាស់ឈើឈ្មោះ កង ចាន់ដារិន ជាអតីតមន្ត្រីអជលផលខេត្តកំពង់ឆ្នាំង ដោយដឹកមកដាក់នៅឃ្លាំងស្តុកឈើមួយកន្លែង ស្ថិតនៅចន្លោះស្ពានទី១១ និងទី១២ ក្នុងភូមិចំបក់មាស សង្កាត់បាក់ខែង ខណ្ឌជ្រោយចង្វា រាជធានីភ្នំពេញ ដែលមានឈ្មួញរកស៊ីឈើម្នាក់ឈ្មោះ ណាង ចាំប្រមូលទិញ និងមានឈ្មោះ ហេង ដែលជាមេការចាំទទួលវាស់វែងនៅទីនោះផងដែរ។
ប្រភពបានអោយដឹងទៀតថាលោក កង ច៍ន្ទដារិនមានទីលំនៅភូមិស្រះកែវជាអតីតមន្ត្រីជលផលមានឋានៈជានាយសង្កាក់ ដូចជាធ្លាប់ធ្វើជានាយសង្កាត់កំពង់ឆ្នាំង ក្រោយមកផ្លាស់ទៅកាន់ជានាយសង្កាត់បរិបូរណ៍ ដោយសារមានបញ្ហាការងារទើបថ្នាក់លើដកមកធ្វើការនៅមន្ទីរកសិកម្មខេត្តក្រោយមកឃើញធ្វើការនៅខ័ណ្ឌរដ្ឋបាលព្រៃឈើខេត្ត។
ក្នុងរយៈពេលថ្មីៗនេះគេសង្កេតឃើញលោកកង ច័ន្ទដារិនចុះធ្វើការជាមួយមន្ត្រីររបាលព្រៃឈើ ជាច្រើនករណីដូចជាករណីចុះចាប់ត្រាក់ទ័រ២គ្រឿងដែលលួចឈូសឆាយព្រៃរដ្ឋនៅចំណុចចន្ត្រក ឃុំក្រាំងស្គា ស្រុកទឹកផុសនិង ចុះត្រួតពិនិត្យការឈូសឆាយដីព្រៃនៅចំណុចត្រពាំងគី និងត្រពាំងក្រឡោមភូមិខ្លែងពណ៏ ឃំព្រៃមូល ស្រុករលាប្អៀរជាដើម។
ក្រោយពីបានធ្វើការវាស់វែងរួចរាល់ ទាំងរថយន្ត ទាំងអ្នកបើករថយន្តម្នាក់ រួមទាំងព្រូម្នាក់ទៀតផងនោះ និង ឈើប្រណិតប្រភេទធ្នង់ចំនួន៧៥ដុំ ស្មើនឹង៧៨៦kg ស្មើនឹង០.៦២៨ម៉ែត្រគូប ត្រូវបានប្រគល់ទៅសង្កាត់រដ្ឋបាលព្រៃឈើឫស្សីជ្រោយដើម្បីបន្តអនុវត្តន៍ទៅតាមនិតិវិធីច្បាប់៕
