បន្ទាយមានជ័យ ៖ ប្រភពពីមន្ត្រីបម្រើការងារនៅច្រកតំបន់បឹងត្រកួន ស្រុកថ្មពួក ខេត្តបន្ទាយមានជ័យ បានឲ្យដឹងថាមានឈ្មួញដែលជាសមត្តកិច្ចជាច្រើននាំគ្នាបំផ្លាញព្រៃឈើតាមរយៈនាំធ្យូងទៅលក់ឲ្យសៀម។
ឈ្មួញដែលកំពុងធ្វើសកម្មភាពនាំចេញធ្យូងតាមច្រកតំបន់បឹងត្រកួន មានដូចជាទី១-លោកវរសេនីយ៍ឯក(ស័ក្ដិ៍៥) យឿង មោះ មានតួនាទីជានាយរងការិយាល័យទំនាក់ទំនងព្រំដែនកម្ពុជា-សៀម ក្នុងស្រុកថ្មពួក។
ទី២- ឈ្មោះ ជេត សោម មេស្នាក់ការសន្តិសុខ៨៨៨ ប្រចាំច្រកតំបន់បឹងត្រកួន និងទី៣-ឈ្មួញដែលពលរដ្ឋមិនទាន់ស្គាល់ឈ្មោះដោយគ្រាន់តែបង្ហើបឲ្យដឹងថាជាម្ចាស់ស្តង់ដំឡូងមី ហើយឈ្មួញម្នាក់នេះក៏កំពុងដឹកជញ្ជូនធ្យូងចេញទៅស្រុកសៀមដោយគ្មានសមត្ថកិច្ចណាប៉ះពាល់ឡើយ។
ការដែលឈ្មួញទាំងនោះអាចដឹកជញ្ជូនធ្យូងចេញទៅស្រុកសៀមតាមច្រកបឹងត្រកួនយ៉ាងគគ្រឹកគគ្រេង គឺមានការឃុបឃិតបើកដៃពីសំណាក់លោក ញឹក ប៊ុនលេខ ប្រធានស្នាក់ការគយច្រកបឹងត្រកួន ផងដែរទើបអ្វីៗអាចដំណើរការយ៉ាងរលូន។
ប្រភពបានឲ្យដឹងទៀតថា ធ្យូងដែលឈ្មួញដឹកជញ្ជូនតាមរថយន្តធំៗចំណុះរាប់សិបតោនចេញទៅស្រុកសៀម តាមច្រកបឹងត្រកួន គឺបានមកពីការកាប់ឈើមិនទាន់គ្រប់អាយុឬឈើទាំងតូចទាំងធំនៅក្នុងខេត្តបន្ទាយមានជ័យ និងខេត្តឧត្ដរមានជ័យដែលចង់ឬមិនចង់វានឹងធ្វើឲ្យព្រៃឈើដែលនៅសេសសល់ក្នុងខេត្តបន្ទាយមានជ័យ និងខេត្តឧត្ដរមានជ័យ ត្រូវវិនាសអន្តរាយរ។
ប្រភពពីមន្ត្រីអាជ្ញាធរស្រុកថ្មពួក ខេត្តបន្ទាយមានជ័យ បានឲ្យដឹងថា ថ្មីៗកន្លងទៅនេះមន្ត្រីបរិស្ថានស្រុកថ្មពួក បានឃាត់រថយន្តដឹកធ្យូង៤គ្រឿងរបស់ក្រុមឈ្មួញដែលបម្រុងដឹកធ្យូងចូលទៅស្រុកសៀមតាមច្រកតំបន់បឹងត្រកួន ឲ្យឈ្មួញទាំងនោះធ្វើកិច្ចសន្យាបញ្ឈប់សកម្មភាពនាំចេញធ្យូងទៅក្រៅប្រទេសផងដែរ។ ក៏ប៉ុន្តែវិធានការរបស់មន្ត្រីការិយាល័យបរិស្ថានស្រុកថ្មពួក គ្រាន់តែជារឿងលេងសើចប៉ុណ្ណោះព្រោះឥឡូវនេះក្រុមឈ្មួញទាំងនោះបង្កើនសកម្មភាពដឹកជញ្ជូនធ្យូងចេញទៅស្រុកសៀមតាមច្រកតំបន់បឹងត្រកួននិងច្រករបៀងជាច្រើនកន្លែងផ្សេងទៀតយ៉ាងរលូន។
ប្រភពពីមន្ត្រីអាជ្ញាធរស្រុកថ្មពួក បានឲ្យដឹងថា ឈ្មួញជាច្រើននាក់កំពុងសម្រុកដឹកជញ្ជូនធ្យូងចេញទៅស្រុកយួនតាមច្រកបឹងត្រកួន យ៉ាងគឃ្លើនតាមរថយន្តនិងតាមគោយន្តកែច្នៃជាច្រើនគ្រឿង ហើយគ្មានសមត្ថកិច្ចណាចាត់វិធានការទប់ស្កាត់ឡើយ។
មិនដឹងថាតើលោក សួន បវរ អភិបាលខេត្តបន្ទាយមានជ័យ និងសមត្ថកិច្ចពាក់ព័ន្ធក្នុងខេត្តបន្ទាយមានជ័យបានជ្រាបពីសកម្មភាពឈ្មួញដែលជាសមត្តកិច្ចដឹកជញ្ជូនធ្យូងចេញទៅស្រុកសៀមទាំងយប់ទាំងថ្ងៃកំពុងតែធ្វើឲ្យព្រៃឈើដែលនៅសេសសល់ក្នុងខេត្តបន្ទាយមានជ័យ និងខេត្តឧត្ដរមានជ័យ អាលាយហិនហោចអត់ហ្ន?៕
