ក្រចេះ ៖ ឯកឧត្តម ធុន គ្រី ប្រធានគណៈកម្មាធិការសាខាកាកបាទក្រហមកម្ពុជាខេត្តក្រចេះ អញ្ជើញជាអធិបតីក្នុងកម្មវិធីប្រកាសទទួលស្គាល់ក្រុមកាកបាទក្រហម និងបើកវគ្គផ្សព្វ ផ្សាយគោលការគ្រឹះរបស់ចលនា និងគោលនយោបាយស្តីពីការស្ម័គ្រចិត្ត ដែលបានប្រព្រឹត្តឡើងនៅរសៀលថ្ងៃទី១៩ ខែមិថុនា ឆ្នាំ២០១៨ នៅសាលប្រជុំសាលាស្រុកស្នួល ។
អភិបាលរងស្រុកស្នួល លោកស្រី កុយ សំបូរ និងជាប្រធានអនុសាខាកាកបាទក្រហមស្រុកស្នួល បានឲ្យដឹងថា ដោយសារប្រទេសជាតិទទួលបាននូវសន្តិភាពពេញបរិបូណ៍ បានធ្វើអោយអនុសាខាកាកបាទក្រហមស្រុកស្នួល មានឱកាសបានរួមចំណែកជាមួយអាជ្ញាធរមូលដ្ឋានគ្រប់លំដាប់ថ្នាក់ក្នុងការកាត់បន្ថយភាពក្រីក្ររបស់ប្រជាពលរដ្ឋតាមរយៈនៃសកម្មភាពមនុស្សធម៌។
លោកស្រី បន្តថា កន្លងមកសកម្មភាពលើកកម្ពស់កម្លាំងមនុស្សធម៌ ត្រូវបានអនុវត្តជាបន្តបន្ទាប់ និងមានកិច្ចសហការជាមួយអាជ្ញាធរ ក្រុមយុវជន ក្រុមកាកបាទក្រហមឃុំ សប្បុរសជននានា ពិសេសដោយមានការគាំទ្រពីលោកអភិបាលស្រុកជាប្រធានកិត្តិយសអនុសាខាស្រុក ក្នុងការគៀងគររកថវិការដើម្បីទ្រទ្រង់ដល់សកម្មភាពរបស់អនុសាខា ដើម្បីជួយដល់ជនទីទ័លក្រ ទុរគត៌ជន ជនងាយរងគ្រោះ និងជនរងគ្រោះដោយគ្រោះធម្មជាតិ ឬឧបទ្ទវហេតុផ្សេង។
មានប្រសាសន៍ក្នុងពិធីប្រកាសទទួលស្គាល់សមាសភាពក្រុមកាកបាទក្រហមឃុំទាំង៦ក្នុងស្រុកស្នួលនារសៀលនោះដែរ ឯកឧត្តម ធុន គ្រី ប្រធានគណៈកម្មាធិការសាខាកាកបាទក្រហមកម្ពុជាខេត្ត បាននាំមកនូវបណ្តាំសួរសុខទុក្ខពីសំណាក់សម្តេចកិត្តិព្រិទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជាកាកបាទក្រហមកម្ពុជា ដែលជានិច្ចជាកាលតែងតែគិតគូពីសុខទុក្ខការលំបាករបស់ប្រជាពលរដ្ឋដែលរងគ្រោះ និងងាយរងគ្រោះដោយគ្រោះមហន្តរាយផ្សេងៗ គឺលោកតែងតែយកចិត្តទុកដាក់ជួយនូវរាល់ការលំបាក និងឆ្លើយតបបានទាន់ពេលវេលា ដោយមិនមានការរើសអើងពូជសាសន៍ ឬនិន្នាការនយោបាយអ្វីឡើយ ។
ឯកឧត្តម មានប្រសាសន៍បន្តថា ឆ្លើយតបទៅនឹងគ្រោះមហន្តរាយបានទាន់ពេលវេលា គឺគណៈកម្មាធិការសាខាកាកបាទក្រហមកម្ពុជាខេត្ត បានប្រកាសទទួលស្គាល់ក្រុមកាកបាទក្រហមឃុំ ដើម្បីទំនាក់ទំនង និងផ្តល់ព័ត៌មានបានឆាប់រហ័ស ស្របទៅនិងភាពរីកចម្រើននូវវិស័យគមនាគមន៍ និងប្រព័ន្ធបច្ចេកវិទ្យាអេឡិចត្រូនិច (ទូរស័ព្ទ) ដែលជាផ្នែកសំខាន់នៃការទំនាក់ទំនង និងផ្តល់ព័ត៌មានបានឆាប់រហ័ស តាមរយៈគណៈកម្មាធិការស្រុក ដែលមានយុវជនស្មគ្រ័ចិត្តរបស់កាកបាទក្រហមយើងនៅទីនោះ និងស្របទៅតាមការដឹកនាំដ៏ឈ្លាសវៃ និងប្រាកដនិយមរបស់រាជរដ្ឋាភិបាលកម្ពុជាសព្វថ្ងៃ ដែលមានសម្តេចតេជោ ហ៊ុន សែន ជានាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រិទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជាកាកបាទក្រហមកម្ពុជា បានចេញនូវបទបញ្ជារដ៏ម៉ឹងម្មាត់ ក្នុងនាមជាអាជា្ញធរគឺមិនត្រូវទុកឲប្រជាពលរដ្ឋណាម្នាក់ស្លាប់ដោយការអត់ជម្រក និង ស្លាប់ដោយការអត់បាយនោះឡើយ ត្រូវប្រញាប់ចុះដោះស្រាយនិងឆ្លើយតទៅនឹងបញ្ហានោះ ជូនដល់ពួកគាត់ឲ្យបានទាន់ពេលវេលា៕
ដោយ ម៉ែន បូរិទ្ធ
