ខេត្តរតនគិរី ៖ សេចក្តីរាយការណ៍ពីប្រជាពលរដ្ឋ បាឲ្យដឹងថា ក្រុមមន្ត្រីយោធាកងវិស្វ័កម្មដែលបើកការដ្ឋានស្ថាបនាផ្លូវលេខ៧១៥ តាមក្រវាត់ព្រំដែន (កម្ពុជា-វៀតណាម) បានឆ្លៀតឱកាសឈូសផ្លូវបើកច្រករបៀងជាច្រើនកន្លែង ស្ថិតក្នុងស្រុកអណ្តូងមាស ខេត្តរតនគិរី នៅចំណុចបង្គោលព្រំដែនលេខ ២៦/១(១) កម្ពុជា-វៀតណាមរហូតដល់ការដ្ឋានកងស្ថាបនាផ្លូវស្ពានលេខ៧១៥តែម្តងដើម្បីបង្កភាពងាយស្រួលដល់ការ
ដឹកជញ្ជូនបទល្មើសព្រៃឈើឆ្លងដែនទៅលក់នៅប្រទេសវៀតយ៉ាងអនាធិបតេយ្យ ។ សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទែលើកឡើងក្នុងកិច្ចប្រជុំ ណែនាំស្តីពីការពង្រឹងស្ថិរភាព សន្តិសុខ សណ្តាប់ធ្នាប់ នៅតាមបណ្តោយព្រំដែន កាលពីថ្ងៃទី៥ ខែមិថុនា ឆ្នាំ២០១៨បញ្ជាក់ថា «ការលុបបំបាត់ច្រករបៀងគឺដើម្បីទប់ស្កាត់ការចេញចូលខុសច្បាប់ ក៏ដូចជាទប់ស្កាត់បទល្មើសផ្សេងៗទៀតនៅតាមព្រំដែន» ដែលមាន័យថា៖គ្រប់ច្រករបៀងទាំងអស់ត្រូវបានបិទ។
តែផ្ទុយទៅវិញ តាមប្រភពព័ត៌មានខាងលើបញ្ជាក់ «ក្រុម មន្ត្រីយោធាដែលកំពុងបំពេញភារកិច្ចស្ថាបនាផ្លូវ នៅតាមក្រវាត់ព្រំដែន (កម្ពុជា-វៀតណាម) ខេត្តរតនគិរី ក្បត់ជាតិក៏ថាបានព្រោះឆ្កៀតឱកាសឈូសឆាយធ្វើផ្លូវលួចបើកច្រករបៀង ផ្ទុយពីច្បាប់ដែលបានដាក់ឲ្យអនុវត្ត ប្រយោជន៍អនុញ្ញាតឲ្យរថយន្តកែច្នៃគ្រប់ប្រភេទ និងម៉ូតូដឹកជញ្ជូនឈើប្រណីតខុសច្បាប់នាំទៅលក់នៅប្រទេសវៀតណាម ។
ប្រជាពលរដ្ឋបានលើកឡើងថា ក្រុមមន្ត្រីយោធាកង ស្ថាបនាផ្លូវស្ពានលេខ៧១៥មានភារកិច្ចកសាងផ្លូវ តាមក្រវាត់ព្រំដែន ឬហៅថាផ្លូវយុទ្ធសាស្ត្រ ប៉ុន្តែបែជាឃុបឃិតជា មួយក្រុមឈ្មួញរកស៊ីបទល្មើសព្រៃឈើឆ្លងដែនខុសច្បាប់យកគ្រឿងចក្រឈូសធ្វើផ្លូវបើក ច្រករបៀងខុសច្បាប់ដើម្បីនាំឈើចេញពីកម្ពុជាទៅលក់ឲ្យឈ្មួញវៀតណាមទៅវិញ។
តាមប្រជាពលរដ្ឋនិយាយថាសកម្មភាព នៃការដឹកជញ្ជូនបទល្មើសព្រៃឈើ តាមគោយន្តច្នៃ រថយន្តបង្កុង និងម៉ូតូរាប់រយគ្រឿង ក្នុង មួយថ្ងៃៗ ១០០គ្រឿងដឹកចេញពីព្រៃរួចចូលទឹកដីវៀតណាម តាមផ្លូវដែលក្រុមការដ្ឋានកង ស្ថាបនាផ្លូវ និងស្ពានឈូសឆាយរួចជាស្រេច ។
គោយន្តច្នៃ និងម៉ូតូដឹកឈើឆ្លងដែនទៅវៀតណាមបាននិង កំពុងធ្វើសកម្មភាពដឹកជញ្ជូនឈើយ៉ាងគំហុកតាមចំណុចភូមិចង ឃុំញ៉ាង ត្រង់បង្គោលព្រំដែន លេខ១៩ ប៉ុស្តិ៍ភូមិតាង៉ា និងប៉ុស្តិ៍នគបាលការពារព្រំដែនលេខ ៥០៧ (អូរសាថី) ចំណុះវរសេនាតូចនគរបាលការពារព្រំដែនគោកលេខ៦២៣។
ពាក់ព័ន្ធករណីក្រុមការដ្ឋានកងស្ថាបនាផ្លូវលេខ៧១៥ ឈូសឆាយផ្លូវបើកច្រករបៀងខុសច្បាប់ជាច្រើនកន្លែងសម្រាប់សម្រួលឲ្យក្រុមឈ្មួញដឹកជញ្ជូនឈើឆ្លងដែនខុសច្បាប់ខាងលើនេះ មិនអាចទំនាក់ទំនងសុំបំភ្លឺពីមេបញ្ជាការកងស្ថានផ្លូវបានឡើយតែសង្ឃឹមថាអាជ្ញាធរខេតរតនៈគិរីក្រោមបញ្ជាររបស់លោកថងសាវុនដែលទើបតែងតាំងជាចៅហ្វាយខេត្តសាជាថ្មី នឹងបកស្រាយពន្យល់ពីសេចក្តីរាយការណ៍ខាងលើនេះ ព្រោះលោក សៅ សូត្រ មេប៉ុស្តិភូមិតាង៉ាខ័ណ្ណៈ និងប៉ុស្តិនគបាលការពារព្រំដែនលេខ៥០៧អូរសាថីចំណុះអោយវរសេនាតូចនគបាលការពារព្រំដែនគោកលេខ៦២៣បានដឹងច្បាស់អំពីករណីនេះ ៕
