ក្រចេះ៖ នារសៀលថ្ងៃទី២៥ ខែមេសា ឆ្នាំ២០១៦នេះ អធិការនគរបាលស្រុកព្រែកប្រសព្វ បានធ្វើការបញ្ជូនខ្លួនជនសង្ស័យជាឳពុកចិត្តតិរច្ឆានម្នាក់ ទៅស្ថាប័នអយ្យការអមសាលាដំបូងខេត្តក្រចេះ ដើម្បីចាត់ការបន្តតាមនីតិវិធីច្បាប់ បន្ទាប់ពីជនសង្ស័យរូបនោះ បានធ្វើសកម្មភាពរំលោភសេពសន្ថវៈចំនួន៥លើកទៅលើកូនស្រីខ្លួនឯងបង្កើត ដែលមានអាយុ១៥ឆ្នាំ ។
នគរបាលផ្នែកយុត្តិធម៌ស្រុកព្រែកប្រសព្វ បានឲ្យដឹងថា ជនសង្ស័យឈ្មោះ ងួន ម៉ៃ អាយុ ៤២ឆ្នាំ រស់នៅភូមិបឹងច្រែង ឃុំសោប ស្រុកព្រែកប្រសព្វ ខេត្តក្រចេះ។ បច្ចុប្បន្នស្នាក់នៅចំណុចភូមិស្រែពពេល ឃុំសោប ស្រុកព្រែកប្រសព្វ បានធ្វើសកម្មភាពចាប់រំលោភសេពសន្ថវៈលើកូនរបស់ខ្លួន បានសម្រេចចំនួនប្រាំដង។ លើកទី១ ជនសង្ស័យបានធ្វើសកម្មភាពចាប់រំលោភកាលពីឆ្នាំ២០១៥កន្លងទៅ នៅចំណុចរោងចាំចំការ ដែលមានចំងាយពីភូមិស្រែពពេលប្រមាណជា ៣គីឡូម៉ែត្រ និងធ្វើសកម្មភាពចាប់រំលោភ ៤ដងទៀត នៅលើផ្ទះជីតារបស់ក្មេងស្រីរងគ្រោះ និងត្រូវជាឳពុកក្មេកជនសង្ស័យរូបនោះផងដែរ។
អធិការរងទទួលផ្នែកយុត្តិធម៌ លោកអនុសេនីយ៍ឯក ទួត ណារ៉ា បានបន្តថា នៅថ្ងៃទី១១ ខែមេសា ឆ្នាំ២០១៦ វេលាម៉ោង២០ និង៣០នាទី ជនសង្ស័យឈ្មោះ ងួន ម៉ៃ បានឡើងទៅលើផ្ទះឳពុកក្មេកម្ដងទៀត ដែលក្មេងស្រីរងគ្រោះត្រូវជាកូនបង្កើតកំពុងដេកនៅលើផ្ទះនោះ ក្នុងគោលបំណង់ដើម្បីចាប់រំលោភ ក្នុងខណៈនោះជនរងគ្រោះឃើញឳពុកក៏មានការភ័យខ្លាច បានរត់ចុះដីទៅប្រាប់ម្ដាយអំពីដំណើររឿងដែលឪពុកចាប់រំលោភខ្លួនពេលកន្លងមក។
លោកអនុសេនីយ៍ឯក ទួត ណារ៉ា លុះមកដល់ថ្ងៃទី២៤ ខែមេសា ឆ្នាំ២០១៦នេះ ទើបជនរងគ្រោះ និងបងស្រីបង្កើត បានមកប្ដឹងរាយការណ៍ដល់ប៉ុស្ដិ៍នគរបាលរដ្ឋសោប។ ក្រោយពេលទទួលបានសេចក្ដីរាយការណ៍មកភ្លាម លោកក៏បានបញ្ជាឲ្យកម្លាំងរបស់លោក ធ្វើការឃាត់ខ្លួនជនសង្ស័យឈ្មោះ ងួន ម៉ៃនោះភ្លាមផងដែរ ដើម្បីយកមកធ្វើការសាកសួរអំពីដំណើររឿងហេតុនៅអធិការរដ្ឋានស្រុកព្រែកប្រសព្វ។
យោងតាមចម្លើយសារភាពរបស់ជនសង្ស័យរូបនោះ បានឆ្លើយសារភាពថា ខ្លួនពិតជាបានធ្វើសកម្មភាពរំលោភសេពសន្ថវៈលើកូនស្រីខ្លួនឯងបង្កើត ទើបតែអាយុ១៥ឆ្នាំបានសម្រេចមែន។
ក្រោយពេលដែលកម្លាំងអធិការស្រុកព្រែកប្រសព្វ ឃាត់ខ្លួនជនសង្ស័យ និងកសាងសំណុំរឿងរួចមក បានបញ្ជូនខ្លួនជនសង្ស័យរូបនោះមកកាន់ការិយាល័យជំនាញនៃស្នងការរដ្ឋាននគរបាលខេត្តក្រចេះ ដើម្បីបញ្ជូនខ្លួនជនសង្ស័យទៅស្ថាប័នអយ្យាការអមសាលាដំបូងខេត្ត ចាត់វិធានការបន្តតាមនីតិវិធីច្បាប់៕
ដោយ កិះ ខន