បន្ទាយមានជ័យ ៖ បច្ចុប្បន្នគេឃើញមានគ្រឿងចក្រឈ្មួញចំនួន០៤ បាននិងកំពុងធ្វើសកម្មភាពជីកកកាយដឹកដីនៅលើភ្នំស្រេះ ដែលជាសម្បត្តិរដ្ឋ ស្ថិតនៅក្នុងស្រុកព្រះនេត្រព្រះ ខេត្តបន្ទាយមានជ័យ លក់ធ្វើមានបានយ៉ាងរំភើយ ។
សកម្មភាពឈ្មួញយកគ្រឿងចក្រជីកកកាយដីភ្នំ ដែលជាសម្បត្តិរដ្ឋលក់យកលុយចាយ ដែលគេជឿងថា គ្មានច្បាប់ត្រូវបានប្រជាពលរដ្ឋនិយាយថា ៖ បើខ្មោចស្រុកមិនអោយដៃ ក៍ខ្មោចព្រៃចង្រៃវា
មិនហ៊ានដែរ។
ពួកគាត់បន្តថា នៅពេលមានគម្រោងធ្វើផ្លូវម្តងៗ តែងតែឃើញក្រុមឈ្មួញឆ្លៀតឱកាសដឹកយកអាចម៌ដីលក់ ច្រើនជាងធ្វើផ្លូវទៅទៀត។ជារៀងរាល់ថ្ងៃក្រុមឡានទាំងនេះវារំខានដល់ការរស់នៅពួកគាត់ខ្លាំងណាស់ តែមិនដឹងប្តឹងទៅណាបើព្រះឥន្ទស៊ីមាន់ដែរនោះ។
ប្រភពព័ត៌មានពីប្រជាពលរដ្ឋបានអោយដឹងថា ម៉ៃខូ០៤គ្រឿងដែលកំពុងជីករំលើងលើភ្នំស្រេះយកដីលក់នេះ មានថៅកែផ្សេងៗគ្នា៖ ទី០១ឈ្មោះ សាំង គង់ ។ ទី០២ឈ្មោះ រ៉ា នៅព្រះនេត្រព្រះ ។ទី០៣ឈ្មោះលេង នៅមង្គលបូរី និងទី០៤ជារបស់មន្ទីរធនធានទឹក។
មន្ត្រី នៃមន្ទីររ៉ែថាមពលបានបញ្ជាក់ប្រាប់អ្នកព័ត៌មានថា លោកទើបតែបានចុះទៅមើលសកម្មភាព កកាយដីនៅភ្នំស្រេះមានគ្រឿងចក្រម៉ៃខូ ដល់ទៅចំនួន០៤គ្រឿងប្រាកដមែន លោកគ្រាន់តែបានធ្វើរបាយការណ៍ និងថតយកសកម្មភាពជាក់ស្តែង មកបង្ហាញប្រធានមន្ទីរ ត្រង់មេមានចំណាត់ការទៅលើក្រុមឈ្មួញទាំងនេះយ៉ាងណាស្រេចមេ។ លោកមិនទាន់ដឹងទេ ហើយខាងមន្ត្រីរ៉ែថាមពល មិនបានឃុបឃិត ប្រព្រឹត្តអំពើ
ពុករលួយ ជាមួយកក្រុមឈ្មួញទាំងនេះដែរ លោកថានឹងចាត់វិធានការតាមផ្លូវច្បាប់។
លោក ឃូ ពៅ អភិបាលស្រុកព្រះនេត្រព្រះដែលជាម្ចាស់ដែនដីបានបំភ្លឺតាមទូរស័ព្ទប្រាប់កាសែតថា លោកបានអនុញ្ញាតអោយគ្រឿងចក្រទាំងនោះ កកាយដីយកទៅធ្វើផ្លូវនៅឯឃុំរហាល តែមិនបានអោយ
យកអាចម៌ដីទៅលក់ទេ។ ហើយជីកកកាយលើភ្នំស្រេះនេះ បានសុំគោលការណ៍អភិបាលខេត្តរួចហើយដែរ។លោកចៅហ្វាយស្រុកបញ្ជាក់ថានេះប្រហែលជាត្រីងៀតឆ្លៀតពង?!។
បើតាមប្រជាពលរដ្ឋបានឲ្យដឹង៖លោក សាំង គង់ គឺជាមនុស្សដែលអ្នកបន្ទាយមានជ័យតែងតែ និយាយតៗគ្នាថា ជាជើងខ្លាំងខាងរបរម៉ៃខូ ជីស្រះ អូរស្ទឹង បឹងបួរ ព្រៃភ្នំ ដុះស្លែយូរហើយ ព្រោះពូកែលូនក្រាបជាមួយ អ្នកធំទៀតផង។
ឯកឧត្តម សួន បវរ អភិបាលខេត្តបន្ទាយមានជ័យ មិនអាចសុំការស្រាយបំភ្លឺ លើករណីឈ្មួញជីកបំផ្លាញភ្នំធ្វើអាជីវកម្មដូចការចោទប្រកាន់ខាងលើនេះបានទេដោយទូរស័ព្ទនៅក្រៅតំបន់សេវា។
គួរបញ្ជាក់ថា ប្រសិនបើ ខាងក្រសួងពាក់ព័ន្ធឬអាជ្ញាធរ មិនមានវិធានការអោយបានទាន់ពេលវេលាទេនោះ ភ្នំស្រេះដែលជាសម្បត្តិធម្មជាតិ មានតាំងពីជីដូនជីតាមក នឹងត្រូវរលាយជាផេះផង់ ក្រោមស្នាដៃក្រុមឈ្មួញខាងលើនេះជាមិនខានឡើយ។ដល់ពេលនោះតើបន្ទោសអ្នកណា?៕
