ភ្នំពេញ ៖ អតីតឧត្តមសេនីយ៍នៅកងអង្គរក្ស័និជាឧកញ៉ាឈ្មោះហូ ចំរើនដែលកំពុងជាប់ឃុំរឿងបាញ់បោះសេរី ត្រុវបានថៅកែចិន២នាក់និងកូរ៉េម្នាក់ប្តឹងចូលតុលាការពីបទ ស៊ីដាច់លុយវិនិយោគ ជាង២០០ លានដុល្លារ អាមេរិក ។
លោក សៀង សុខ ព្រះរាជអាជ្ញារងអមសាលាដំបូង រាជធានី ភ្នំពេញ បានចេញដីកាកោះ អញ្ជើញដើមបណ្តឹងម្នាក់ ឱ្យចូលបំភ្លឺ នៅថ្ងៃទី២៥ ខែមិថុនា ខាងមុខនេះ ការប្តឹងរឿងស៊ីដាច់ លុយ នេះ គឺ តាមរូបភាពអភិវឌ្ឍន៍មន្ទីរពេទ្យទំនើប នៅ ទីក្រុង តាខ្មៅ និង គម្រោងអភិវឌ្ឍន៍ មួយចំនួនទៀត ។
លោក ហូ ចំរើន អាយុ៣៨ឆ្នាំ ជាមន្ត្រីយោធាក្រសួងការពារជាតិថ្នាក់ឧត្តមសេនីយ៍ឯកត្រូវបានព្រះមហាក្សត្រតែងតាំងជាឧកញ៉ានៅថ្ងៃទី១២ ខែមេសា ឆ្នាំ២០១៨និងមានមុខងារជាទីប្រឹក្សាថ្នាក់ដឹកនាំកំពូល។ ប៉ុន្តែក្រោយពេលជាប់ឃុំនៅពន្ធនាគារព្រះមហាក្សត្របានចេញព្រះរាជក្រឹត្យបញ្ចប់មុខតំណែងទាំងអស់រាប់ទាំងមុខងារជាឧកញ៉ាផង។លោកហូចំរើនត្រូវបានចាប់ខ្លួនបញ្ជូនមកសាលាដំបូងរាជធានីភ្នំពេញកាលពីរសៀលថ្ងៃទី១៦ខែឧសភាឆ្នាំ២០១៨ដើម្បីសាកសួរករណីបាញ់បោះគំរាមកំហែងឪពុកម្ដាយក្មេកកាលពីថ្ងៃទី២១ ខែមេសា ឆ្នាំ២០១៨កន្លងទៅនៅភូមិគ្រឹះស្ថិតនៅភូមិព្រៃស សង្កាត់ព្រៃស ខណ្ឌដង្កោ។
ដោយឡែក ថៅកែបីនាក់ដាក់ ពាក្យបណ្តឹងរឿងស៊ីដាច់ នេះ បានកើតឡើង ក្រោយពេលដែល អតីតឧកញ៉ា រូបនេះ ត្រូវបានចៅក្រមសាលាដំបូងរាជធានីភ្នំពេញ សម្រេច ឃុំខ្លួនដាក់ពន្ធនាគារ ពីបទ គំរាមកំហែងថានឹងសម្លាប់ និង បទប្រើប្រាស់អាវុធខុសច្បាប់ ។ ក្រោយកើតហេតុលោកយិន គារ អាយុ៥៦ឆ្នាំជាឧត្តមសេនីយ៍នគរបាលជាតិដែរនិងត្រូវ ជាឪពុកក្មេក លោកស្រី ផន ទៀង ជាម្ដាយក្មេក និងឈ្មោះ គារ សុខគាងអាយុ១៩ឆ្នាំ ជាភរិយាលោក ហូរ ចំរើន ដែលជាឧកញ៉ាដែរបានទៅដាក់ពាក្យប្ដឹងអោយសមត្ថកិច្ចធ្វើអន្តរាគមន៍តាមផ្លូវច្បាប់ ៕