ឈើអារប្រភេទជន្លងម្រេចជាច្រើនរយដើម ត្រូវបានកម្លាំងសមត្ថកិច្ចចម្រុះ រួមមាន មន្ត្រីជំនាញសង្កាត់រដ្ឋបាលព្រៃឈើកន្ទួត ដោយមានការសម្របសម្រួលពីលោក ហាក់ ហ៊ន់ ព្រះរាជអាជ្ញារងអមសាលាដំបូងខេត្ត ដឹកនាំដោយលោក កែវ ចំណាន់ នាយសង្កាត់រដ្ឋបាលព្រៃឈើកន្ទួត និងកម្លាំងសមត្ថកិច្ចទាំងបីប្រភេទ បានចុះធ្វើការបង្ក្រាប និងរឹបអូស ។
ដោយការករណីចុះបង្ក្រាបខាងលើនោះ គឺត្រូវបានកម្លាំងសមត្ថកិច្ចចម្រុះ ធ្វើឡើងកាលពីវេលាម៉ោង ១១និង៣០នាទី ថ្ងៃទី២២ ខែមេសា ឆ្នាំ២០១៦ នៅទីតាំងផ្ទះប្រជាពលរដ្ឋមួយកន្លែង នៅចំណុចកែងបត់វាលអណ្ដាស ក្នុងភូមិខ្សារ ឃុំដារ ស្រុកចិត្របុរី ខេត្តក្រចេះ ដែលឈើអារទាំងនោះ ត្រូវបានគេយកទៅលាក់ទុកនៅក្នុងព្រៃក្រោយផ្ទះ ដើម្បីបំភន់ភ្នែកសមត្ថកិច្ច ។
សមត្ថកិច្ចចម្រុះ បានឲ្យដឹងថា ក្នុងការចុះបង្ក្រាបល្មើសនោះដែរ សមត្ថកិច្ច ធ្វើការរឹបអូសឈើអារ ប្រភេទឈើជន្លងម្រេច បានប្រមាណជាង ៦រយដើម យកទៅរក្សាទុកបណ្ដោះអាសន្ននៅសង្កាត់រដ្ឋបាលព្រៃឈើកន្ទួត។
នាយសង្កាត់រដ្ឋបាលព្រៃឈើកន្ទួត លោក កែវ ចំណាន់ បានឲ្យដឹងនៅវេលាម៉ោង៣រសៀលថ្ងៃដដែលនេះថា បច្ចុប្បន្នកម្លាំងសមត្ថកិច្ចចម្រុះ រួមនឹងមន្ត្រីជំនាញរបស់លោក កំពុងអនុវត្តតាមនីតិវិធីច្បាប់ ដោយប្រមូលយកវត្ថុតាំងបទល្មើសទាំងនោះយកទៅរក្សាទុកនៅសង្កាត់រដ្ឋបាលព្រៃឈើកន្ទួត ដើម្បីកសាងបំពេញបែបបទសំណុំរឿងឲ្យម្ចាស់បទល្មើសចូលខ្លួនមកបង់ផាក់ពិន័យទៅតាមច្បាប់។
លោក បានបន្តថា ក្នុងករណីដែលម្ចាស់បទល្មើសទាំងនោះ មិនមកចូលខ្លួនបង់ប្រាក់ផាក់ពិន័យទេនោះ មន្ត្រីជំនាញនឹងកសាងសំណុំរឿងបញ្ជូនទៅសាលាដំបូងខេត្ត ដើម្បីចាត់វិធានការបន្ទាប់ទៅតាមច្បាប់ ស្ដីពី ព្រៃឈើ ៕
ដោយ កិះ ខន
