ក្រចេះ៖ ឯកឧត្តម ប៊ិន ឈិន ឧបនាយករដ្ឋមន្ត្រីប្រចាំការ និងជាប្រធានអាជ្ញាធរជាតិដោះស្រាយទំនាស់ដីធ្លី នាព្រឹកថ្ងៃទី២១ ខែមេសា ឆ្នាំ២០១៦ បានអញ្ចើញជាគណៈអធិបតីភាពដ៏ខ្ពង់ខ្ពស់បើកកិច្ចប្រជុំ ស្ដីពីការត្រួតពិនិត្យ ការទប់ស្កាត់ និងដោះស្រាយបញ្ហាទំនាស់ដីធ្លី នៅសាលាខេត្តក្រចេះ។
ដោយមានការអញ្ចើញចូលរួមពីសំណាក់ឯកឧត្តម សរ ចំរុង អភិបាលខេត្ត ឯកឧត្តម នូ ភឿង ប្រធានក្រុមប្រឹក្សាខេត្ត និងវត្តមានចូលរួមពីលោក លោកស្រី អភិបាលរងខេត្ត អភិបាលស្រុក ក្រុង អស់លោក លោកស្រី ប្រធាន អនុប្រធានមន្ទីរជុំវិញខេត្ត ព្រមទាំងមេបញ្ជាការ មេបញ្ជាការរងកងកម្លាំងប្រដាប់អាវុធទាំងបីប្រភេទ។
មានប្រសាសន៍លើកឡើងនៅក្នុងកិច្ចប្រជុំនាព្រឹកនោះ ឯកឧត្តម សរ ចំរុង អភិបាលខេត្តក្រចេះ បានថ្លែងឲ្យដឹងថា ក្នុងការអនុវត្តតាមបទបញ្ជាលេខ០១ បបរបស់រាជរដ្ឋាភិបាល គោលនយោបាយចាស់ សកម្មភាពថ្មីលើវិស័យដីធ្លី ក្នុងខេត្តក្រចេះ មានផែនការវាស់វែងលើផ្ទៃដីពាក់ព័ន្ធនៅក្នុងស្រុក៥ ឃុំ៣៦ ប៉ះពាល់ប្រជាពលរដ្ឋ ៤៣.២២៣គ្រួសារ លើផ្ទៃដីទំហំ ១២៨.៥៣៩ ហត។ ដោយឡែកសម្រេចបាន ប្រកាសតំបន់វិនិច្ឆ័យចំនួន ១៩ឃុំ វាស់បាន៤២.២៨៧ក្បាលដី ទំហំ១០១.៨២៩,៨២ ហត ក្នុងនោះចែកប័ណ្ណកម្មសិទ្ធជូនប្រជាពលរដ្ឋរួច មានចំនួន ២៤.៨៩៣គ្រួសារ ស្មើនឹង៣៩.០៨២ប័ណ្ណ ស្មើនឹងផ្ទៃដីទំហំ១០០.៨២៨.៤៤ ហត ស្ថិតក្នុងដីសម្បទានសេដ្ឋកិច្ចចំនួន១៩ ក្រុមហ៊ុន លើផ្ទៃដី៨៩.៦២៨,៥៦ ហត ដីព្រៃសម្បទានទំហំ ២២.០២៧ ហត ដីដិការដកហូត ៦.៤៤០ ហត ដីគម្របព្រៃឈើឆ្នាំ២០០២ ១០.៣៨១,១៣ ហត និងដីសម្បទានសង្គមកិច្ចទំហំ ៥.៧៦៥ ហត ដែលកាត់បន្ថយបញ្ហាទំនាស់ដីធ្លីបានប្រមាណ៨០ភាគរយ។
ទន្ទឹមនឹងនោះ ឯកឧត្តម អភិបាលខេត្ត មានប្រសាសន៍បន្តថា នៅចុងឆ្នាំ២០១៤ ផ្ទៃដីមានបាតុភាពពាក់ព័ន្ធប្រជាពលរដ្ឋ ដែលទីតាំងនីមួយៗមានទំហំធំ មានចំនួន ៦៨ករណី ហើយជាលទ្ធផលរហូតមកដល់ពេលនេះ ក្រុមការងារបានចុះសម្របសម្រួលដោះស្រាយរួច បាន ១៥ករណី កំពុងស្ថិតក្នុងនីតិវិធី ១៨ករណី និងសុំគោលការណ៍ថ្នាក់ជាតិ ៤ករណី។ ចំពោះករណីដែលនៅសល់ភាគច្រើនមានសភាពស្ងប់ស្ងាត់ ពីព្រោះផ្ទៃដីទាំងនោះភាគីខាងប្រជាពលរដ្ឋកំពុងរស់នៅ និងអាស្រ័យផលជាប់ជាប្រចាំ គ្រាន់តែពួកគាត់ស្នើរឲ្យអាជ្ញាធរធ្វើនិយ័តកម្មដីស្របច្បាប់ជូនពួកគាត់។
ឯកឧត្តម សរ ចំរុង អភិបាលខេត្តក្រចេះ បានបញ្ជាក់ថា ទោះបីជាយ៉ាងនោះក្ដីការងារដីធ្លី និងការងារដីព្រៃឈើ នៅតែកើតមានបញ្ហាប្រឈមជាបន្តបន្ទាប់ ដូចជា ការបន្តការកាប់ទន្ទ្រាន់ដីព្រៃ និងដីឯកជនរបស់រដ្ឋ ក្រោយបទបញ្ជាលេខ០១ បបចុះថ្ងៃទី៧ ឧសភា ឆ្នាំ២០១២ រួមទាមទារធ្វើកម្មសិទ្ធ, ការតវ៉ាទាមទារដីឯកជនរបស់រដ្ឋដែលមានប័ណ្ណកម្មសិទ្ធ និងស្ថិតក្នុងបញ្ជីសារពើភ័ណ្ឌទ្រព្យសម្បតិ៍រដ្ឋ, ប្រជាពលរដ្ឋមួយចំនួនជឿតាមការញុះញុងពីជនខិលខូច និងអង្គការមិនមែនរដ្ឋាភិបាល បង្កបង្កើតរឿងទោះបីករណីខ្លះបានដោះស្រាយរួចហើយក្ដី, ភាគីជំលោះមួយចំនួនមិនព្រមធ្វើអត្តសញ្ញាណកម្មគ្រួសារជាមួយក្រុមការងារ, ភាគីមួយចំនួនសំអាងលើការប្រមូលផ្ដុំតវ៉ា ហែរដាក់ញត្តិ មិនព្រមទទួលយកលទ្ធផលដោះស្រាយនៅនឹងកន្លែង, នៅមានជនលិខខូចរំលោភទន្ទ្រាន់យកឡូតិ៍ដីរបស់មុខសញ្ញាអ្នកទទួលដីសម្បទានសង្គមកិច្ចស្របច្បាប់, ក្រុមការងារដោះស្រាយជំលោះដីធ្លីខ្វះមន្ត្រីជំនាញ ខ្វះមធ្យោបាយបំពេញបេសកកម្ម និងការចុះស្រាវជ្រាវ សម្របសម្រួល កសាងសំណុំរឿងករណីនីមួយៗតែងអូសបន្លាយពេលយូរ គណៈកម្មការសុរិយោដីថ្នាក់ក្រុង ស្រុក មិនសូវយកចិត្តទុកដាក់ជំំរុញការសម្របសម្រួលដោះស្រាយ បញ្ហាទាំងអស់នេះហើយ ដែលធ្វើឲ្យការដោះស្រាយជំនាស់ដីធ្លីមានភាពយឺតយាវ។
មានប្រសាសន៍បិទអង្គប្រជុំនាព្រឹកនោះដែរ ឯកឧត្តម ប៊ិន ឈិន ឧបនាយករដ្ឋមន្ត្រីប្រចាំការ និងជាប្រធានអាជ្ញាធរជាតិដោះស្រាយទំនាស់ដីធ្លី បានធ្វើការកោតសរសើនូវរាល់សមិទ្ធផលនានាដែលជាស្នាដៃខេត្តសម្រេចបានគូជាទីមោទនៈ ដោយមានអាជ្ញាធរខេត្ត ព្រមទាំងស្ថាប័ន មន្ទីរជំនាញ និងអង្គភាពពាក់ព័ន្ធជុំវិញខេត្ត ដែលបានសហការគ្នាខិតខំប្រឹងប្រែងអស់ពីកម្លាំងកាយចិត្ត ក្នុងការបំបេញភារកិច្ច អនុវត្តតាមបទបញ្ជាលេខ ០១បប របស់រាជរដ្ឋាភិបាល ក្រោមការដឹកនាំប្រកបដោយគតិបណ្ឌិត និងឈ្លាសវៃរបស់សម្ដេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី ក្នុងការចុះវាស់វែងដីធ្លី និងជួយដោះស្រាយបញ្ហាជំលោះដីធ្លីជូនប្រជាពលរដ្ឋនាពេលកន្លងមក។
ឯកឧត្តម ក៏បានជំរុញដល់អាជ្ញាធរខេត្ត មន្ទីរជំនាញ ត្រូវពង្រឹងកិច្ចសហការឲ្យកាន់តែស្អិតរមួតជាមួយបណ្ដាស្ថាប័ន និងមន្ទីរពាក់ព័ន្ធនានា ដើម្បីពន្លឿងការងារសម្របសម្រួលចុះដោះស្រាយបញ្ហាទំនាស់ដីធ្លីឲ្យកាន់តែមនប្រសិទ្ធភាព និងឆាប់រហ័សជូនប្រជាពលរដ្ឋ៕
ដោយ កិះ ខន
