ភ្នំពេញៈ ស្ថានទូតខ្មែរប្រចាំ នៅប្រទេសថៃនៅថ្ងៃទី៨ ខែមិថុនា ឆ្នាំ២០១៨ បានអំពាវនាវតាមហ្វេសប៊ុកឲ្យប្រជាពលរដ្ឋនិងពលករខ្មែរ ដែលស្នាក់នៅ និងធ្វើការនៅថៃ ប្រមាណជាង១លាននាក់ឲ្យទៅចូលរួមបោះឆ្នោត នៅថ្ងៃទី២៩ ខែកក្កដា ឆ្នាំ២០១៨ នៅស្រុកខ្មែរវិញ ឲ្យបានគ្រប់ៗគ្នា ។
“សូមបងប្អូនប្រជាពលរដ្ឋខ្មែរ ដែលកំពុងស្នាក់នៅ និងធ្វើការក្នុងប្រទេសថៃទាំងអស់ ពិសេសក្នុងបណ្តាខេត្តជាប់ព្រំដែនកម្ពុជា-ថៃ ដែលបានចុះឈ្មោះបោះឆ្នោត និងមានឈ្មោះក្នុងបញ្ជីឈ្មោះបោះឆ្នោត ព្រមទាំងលិខិតបញ្ជាក់អត្តសញ្ញាណ សម្រាប់ប្រើប្រាស់ក្នុងការបោះឆ្នោត (ដូចមានបញ្ជាក់ ក្នុងខិតប័ណ្ណភ្ជាប់មកជាមួយនេះ) អញ្ជើញទៅចូលរួមបោះឆ្នោត ជ្រើសតាំងតំណាងរាស្ត្រនីតិកាលទី៦ នៅថ្ងៃអាទិត្យទ២៩ ខែកក្កដា ឆ្នាំ២០១៨”។
ព្រះមហាក្សត្រខ្មែរនាពេលពេលថ្មីៗនេះ ក៏បានចេញព្រះរាជសារអំពាវនាវឲ្យពលរដ្ឋ ទៅបោះឆ្នោតថ្នាក់ ជ្រើសរើសតំណាងរាស្ដ្រ អាណត្តិទី៦ នាថ្ងៃទី ២៩ កក្កដា ខាងមុខនេះដែរ។សម្តេចហ៊ុនសែននាយករដ្ឋមន្ត្រីបានហៅសេចក្តីអពាវនាវរបស់ព្រះមហាក្សត្រ័ថាជាការទះកំភ្លៀង(លោកសមរង្ស៊ី)។លោក សម រង្ស៊ី អតីតប្រធានគណបក្សសង្គ្រាះជាតិ តែងតែអំពាវនាវជារឿយៗ កុំឲ្យប្រជាពលរដ្ឋខ្មែរទៅបោះឆ្នោតដោយដាក់ចេញនូវពាក្យស្លោកដេកផ្ទះឈ្នះស្អាត!។
សូមរំលឹកថា ការបោះឆ្នោត នាថ្ងៃទី២៩ កក្ដដា គជបបានបោះពុម្ពសន្លឹកឆ្នោតឆ្នោតជាង ១០លានសន្លឹក។សន្លឹកឆ្នោតមួយសន្លឹកចំណាយថវិកាប្រមាណ ៩៩០រៀល ដូច្នេះសន្លឹក ចំណាយថវិកាសរុបជា ១០ពាន់លានរៀល (១០,៤២០,៣៩៣,៥០០រៀល) ស្មើនឹងជាង ២.៦លានដុល្លារអាមេរិក។រដ្ឋាភិបាលក៏ បានត្រៀមកងកម្លាំងប្រមាណ ៨ម៉ឺននាក់ ដើម្បីចូលរួមការពារសន្តិសុខ និងសណ្តាប់ ធ្នាប់ នៅក្នុងអំឡុងពេលបោះឆ្នោតជាតិ នាថ្ងៃទី ២៩ កក្កដា ខាងមុខនេះដែរ៕
