ប្រទេសថៃ ៖ កម្មករខ្មែរម្នាក់ ធ្វើការនៅក្នុងខេត្តឈុនបុរីប្រទេសថៃ បានស្លាប់ភ្លាមៗក្រោយពីបញ្ជូនទៅកាន់មន្ទីរពេទ្យដោយសារមានជនជាតិខ្មែរដូចគ្នា លបវាយនឹងដំបងឈើជ្រុងចំក្បាលពីក្រោយពេលអង្គុយលេង។ករណីនេះបានកើតឡើងកា កាលពីថ្ងៃទី០៤ ខែមិថុនា ឆ្នាំ២០១៨ វេលាម៉ោង១២និង០០នាទីថ្ងៃត្រង់ នៅត្រង់ចំណុច ទីតាំងកន្លែងបាញ់ថ្នាំរថយន្ត មួយកន្លែង ផ្លូវលេខ១៩/១ ស្ថិតក្នុងភូមិ១ ឃុំណងរី ស្រុកមឿង ខេត្តឈុនបុរី ប្រទេសថៃឯជនបង្កបានរត់គេចខ្លួនបាត់ស្រមោល ។
តម្រួតថៃបានឲ្យដឹងថា ជនរងគ្រោះមានឈ្មោះ វ៉ា គឹមសេង ភេទប្រុស អាយុ៣៧ឆ្នាំ ប៉ុន្តែមិនទាន់ដឹងថា ជនរងគ្រោះរស់នៅក្នុងខេត្តណា នៃប្រទេសកម្ពុជានោះទេ។សាក្សីឈ្មោះ ស៊ុំ សក្តិ ភេទប្រុស អាយុ៤៧ឆ្នាំ ជាជនជាតិថៃ ធ្វើការនៅកន្លែងជាមួយគ្នា បាននិយាយថា នៅមុនពេលកើតហេតុ ជនរងគ្រោះ កំពុងអង្គុយធ្វើការជាធម្មតា ភ្លាមនោះក៏ស្រាប់តែឮដូចជាសម្លេងគេវ៉ៃមនុស្ស លុះពេលក្រលេកមើលទៅម្តងទៀត ឃើញជនរងគ្រោះ ដួលដេកទៅលើដី ពោរពេញទៅដោយឈាម ដោយនៅពីក្រោយខ្នង ឃើញឈ្មោះ ផេក លៀប ភេទប្រុស អាយុ២៧ឆ្នាំ ត្រូវជាក្មួយ កំពុងឈរកាន់ដំបងឈើជ្រុងវាយបន្ថែមទៀត។ ខ្លួនបានលោតទៅស្រែឃាត់ ដែរតែជនសង្ស័យក៏បានរត់គេចខ្លួនបាត់តែម្តង។
អ្នកស្រី ថុនឌី សកល អាយុ៣៧ឆ្នាំជាជាតិថៃ ដែលជាថៅកែបានលើកឡើង ថា ជនសង្ស័យខាងលើ គេគឺជាមនុស្សរាបសារណាស់ ដោយមិនដែលចេះកោងកាចដាក់អ្នកណាម្នាក់ឡើយ ដោយគ្រាន់តែកន្លងមក គេធ្លាប់មានរោគសសៃប្រសាទហើយសង្ស័យថា អាចខានលេបថ្នាំយូរពេក ទើបរោគសញ្ញានេះរើឡើងវិញ។
ប្រភពបានរាយការណ៍មកថា ក្រោយពេលកើតហេតុ ក្រុមតម្រួតបានបញ្ជូនជនរងគ្រោះទៅកាន់មន្ទីរពេទ្យខេត្តឈុនបុរី ព្រមទាំងបានជួយធ្វើចលនាបេះដូងផង ប៉ុន្តែជនរងគ្រោះបានស្លាប់តាមផ្លូវទៅហើយ ចំណែកជនសង្ស័យ ត្រូវបានសមត្ថកិច្ចថៃa តាមចាប់ខ្លួន បាននៅត្រង់ចំណុច ឃុំបាងប្លាសយក្នុងស្រុកមឿង ដើម្បីយកមកផ្តន្ទាទោសតាមផ្លូវច្បាប់៕
