ខេត្តមណ្ឌលគិរី៖ មានសេចក្តរាយការណ៍ថាជាង១ខែមកហើយមានកើតមានសកម្មភាពជនជាតិវៀតណាមចូលមកកាប់ឈើក្នុងទឹកដីខ្មែរ នៅតំបន់អូររលៀ ស្ថិតក្នុងភូមិពូហ្យាម ឃុំសែនមនោរម្យ ស្រុកអូររាំង ខេត្តមណ្ឌលគិរី ទីតាំងដែលឈ្មោះ ផល ពេញមេនគរបាលប៉ុស្តិ បាញ់សម្លាប់មន្ត្រីកងរាជអាវុធហត្ថ និងមន្ត្រីបរិស្ថាន៣នាក់កាលពីប៉ុន្មានខែមុននេះដែលមកដល់ពេលនេះគេមិនទាន់ឃើញមានចំណាត់ការអ្វីចំពោះឃាតកនោះឡើយ ។
លោកផ្កាយ២ឃិនម៉េងស្រេងត្រូវបានដកចេញពីតួនាទីមេបញ្ជាការយោធាខេត្តមណ្ឌលគិរីក្រោយពីផ្ទុះរឿងខុបឃិតគ្នាឲ្យយួនលួចចូលកាប់ឈើនៅតំប់អូហ៊ុច។តែអ្វីដែលគួឲ្យភ្ញាក់ផ្អើលលោកឃិនម៉េងស្រេងមិនបានបញ្ឈរជើងឬចោទប្រកាន់អ្វីទេតែបែជាឡើងមកកាន់ជានាយរងការិយាល័យ ទី២កងទ័ពជើងគោក ហើយមានតួនាទីទទួលទិសមណ្ឌលភូមិភាគទី១គ្របគ្រងខេត្តនៅភូមិភាគឥសាន្តទៅវិញ ។
លោកផ្កាយ២ឃិន ម៉េងស្រេងមានកូនប្រុសម្នាក់ឈ្មោះ ឃិន បញ្ញាមានតួនាទីជា មេយោធាសឹករងស្រុកអូររាំង ដែលត្រូវបានគេសង្ស័យថា ជាមេខ្លោងអនុញ្ញាតឲ្យជនជាតិវៀតណាមចូលមកកាប់ឈើក្នុងទឹកដីខ្មែរនៅតំបន់ខាងលើ និងជាអ្នកយកប្រាក់ពីឈ្មួញវៀតណាម មកបែងចែកដល់អាជ្ញាធរ សមត្ថកិច្ច ជំនាញជាច្រើនស្ថាប័ន ដើម្បីជាប្រយោជន៍លាក់បាំងចំពោះសកម្មភាពវៀតណាមកាប់ឈើ និងប្រមូលដឹកជញ្ជូនទៅវៀតណាមវិញ ។
សូមបញ្ជាក់ថា ការកាប់បំផ្លាញឈើនិងដឹកជញ្ជូនឈើ នៅតំបន់អូររលៀ មានសកម្មភាពលក្ខណៈទ្រង់ទ្រាយធំ បើទោះជាគេមិនអាចប្រើរថយន្តកែច្នៃ ត្រាក់ទ័រ ឡានបាកុង ដឹកជញ្ជូនឆ្លងទៅវៀតណាម តាមច្រកអូររលៀនេះក៏ដោយ ជាទម្លាប់ ក្រុមវៀតណាមបានប្រើប្រាស់ក្បូន ដែលមានទទឹងប្រមាណ៣០ម៉ែត្រ និងបណ្តោយ៤០ម៉ែត្រ សម្រាប់ដឹកឈើចេញពីអូររលៀ ឆ្ពោះទៅចំណុចច្រកអូរហុច ដើម្បីឆ្លងទៅវៀតណាម នៅចំណុចសុងបៀរ ដែលមានដីចម្ងាយ ប្រមាណជា២០គីឡូម៉ែត្រ ក្នុងនោះ វៀតណាមបានកាប់ឈើនិងប្រមូលក្នុងរយៈពេល៤ទៅ៥ថ្ងៃ ទើបដឹកឈើចេញពីតំបន់អូររលៀ ឆ្លងទៅវៀតណាម ដែលក្បូននីមួយៗត្រូវផ្ទុកឈើបានមិនតិចជាង៤០ម៉ែត្រគូប ។
ប្រភពពីសមត្តកិច្ចបាន បង្ហើបថាលោកផ្កាយ២ ឃិន ម៉េងស្រេង និងកូនប្រុសរបស់គាត់លោកឈ្មោះឃិន បញ្ញា ជាអ្នកយកកញ្ចប់ពីឈ្មួញវៀតណាម ដើម្បីចាត់ចែង ឲ្យសមត្ថកិច្ចអាជ្ញាធរ ជំនាញគ្រប់ស្ថាប័ន តែចុងក្រោយអ្វីដែល ឃិន ម៉េងស្រេង និងកូន ពិបាកជាងគេបំផុតនោះ គឺឈ្មោះ ឡេង សោភ័ណ មេបញ្ជាការ នគរបាលវរៈការពារព្រំដែនលេខ៦២១ ព្យាយាមគេចវេះ មិនយកកញ្ចប់ថវិកានេះ ដោយសារខ្លួន បានជាប់ពាក់ព័ន្ធទៅនឹងសកម្មភាពកាប់បំផ្លាញព្រៃឈើនៅតំបន់អូរហុច ហើយកំពុងមានសំណុំរឿងដោះស្រាយមិនទាន់ចប់នៅសាលាដំបូងរាជធានីភ្នំពេញនោះ ។
ទោះជាលោកឡេង សោភ័ណ មិនទទួលកញ្ចប់ ក៏លោកផ្កាយ២ ឃិន ម៉េងស្រេង ព្យាយាមគ្រប់មធ្យោបាយដើម្បីជួប និងទទួលកញ្ចប់ពីគាត់រួចជាស្រេច ទើបលោកឃិន ម៉េងស្រេង ឲ្យវៀតណាមកាប់បំផ្លាញព្រៃឈើនៅតំបន់អូររលៀបានជោគជ័យយ៉ាងរលូនមកទល់នឹងពេលនេះ មានរយៈពេលជាង១ខែមកហើយ ។
គួររំលឹកថា លោកផ្កាយ២ ឃិន ម៉េងស្រេង ក៏បានពាក់ព័ន្ធទៅនឹងសកម្មភាពកាប់បំផ្លាញព្រៃឈើនៅតំបន់អូរហុច ហើយត្រូវបានបង្ក្រាបដោយកម្លាំងកងរាជអាវុធហត្ថលើផ្ទៃប្រទេស ក្នុងនោះគាត់ត្រូវបានស្ថិតក្នុងបញ្ជីខ្មៅនៃបទល្មើសនេះ ហើយសំណុំរឿងត្រូវបានសាលាដំបូងរាជធានីភ្នំពេញកំពុងដំណើរការនីតិវិធីនៅឡើយ ។
សេចក្តីរាយការណ៍បានចោទប្រកាន់លោកឃិន ម៉េងស្រេង នាយរងការិយាល័យទី២កងទ័ពជើងគោក ទទួលទិសមណ្ឌលភូមិទី១ លោកឃិន ម៉េងស្រេង មិនត្រឹមតែឲ្យវៀតណាមចូលមកបំផ្លាញឈើ និងប្រមូលដឹកជញ្ជូនទៅវៀតណាមវិញ តាមតំបន់អូររលៀ ប៉ុណ្ណោះទេ គឺគាត់បានយកមន្ត្រីយោធារបស់គាត់ពីការិយាល័យទី២នៃកងទ័ពជើងគោក និងយោធា ដឺបេ មកធ្វើសកម្មភាពដាក់ឡានតាមបណ្តោយផ្លូវដែលមានបទល្មើសឈើឆ្លងកាត់ ជាការបន្លាច ដើម្បីឲ្យឈ្មួញឈើទាំងនោះចូលមកចរចាបង់ប្រាក់ប្រចាំខែ និងក្បាលឡានជាដើម ។
គេបានទម្លាយថា កន្លងទៅ ខាង ដឺបេ ក៏ដូចជាខាង ទាហានទទួលទិសមណ្ឌលភូមិភាគទី១ បានទទួលកញ្ចប់ពីឈ្មួញ និងក្រុមហ៊ុនក្នុងមួយខែត្រឹមតែ២០០ដុល្លារ ឬ៣០០ដុល្លារ ខ្លះទៀត៥០០ដុល្លារក្នុងមួយខែ ប៉ុន្តែដល់លោកឃិន ម៉េងស្រេង មានសេចក្តីសម្រេច និងលិខិតបេសកកម្ម គឺកូនប្រុសរបស់លោក គឺលោកឃិន បញ្ញា មេយោធាសឹករងស្រុកអូររាំង ចេញមុខជាអ្នកប្រមូលកញ្ចប់ពីឈ្មួញឈើ និងក្រុមហ៊ុន ដោយឡែកចំពោះឈ្មួញធំៗ ឬក្រុមហ៊ុនត្រូវតែមកជួបផ្ទាល់ជាមួយលោកឃិន ម៉េងស្រេង តាមរយៈប្រើប្រាស់កម្លាំងយោធា ដាក់តាមដងផ្លូវ និងមានឡានជាមធ្យោបាយជាដើម ដើម្បីឲ្យឈ្មួញ និងក្រុមហ៊ុនខ្លះភ័យខ្លាចបង្ខំចិត្តចូលមកចរចា ចាត់ចែងកញ្ចប់ជូន ។
ពាក់ព័ន្ធនឹងសកម្មភាពខាងលើនេះ អង្គភាពយើងមិនអាចទាក់ទង លោក ឃិន ម៉េងស្រេង នាយរងការិយាល័យទី២ កងទ័ពជើងគោកទទួលទិសមណ្ឌលភូមិភាគទី១ សុំការន្យល់បានទេ ។ ដូចគ្នាដែរ លោក ឃិន បញ្ញា ក៏មិនអាចទាក់ទងសុំការបំភ្លឺបានដោយគ្មានលេខទូរស័ព្ទបានដែរ ។
ពាក់ព័ន្ធទៅនឹងសកម្មភាពវៀតណាមលួចចូលមកកាប់ឈើក្នុងទឹកដីខ្មែរនៅតំបន់អូររលៀ លោកកែវ សុភ័ក្រ ប្រធានមន្ទីរបរិស្ថានខេត្តមណ្ឌលគិរីបានទទួលស្គាល់ក្នុងករណីនេះ តាមទូរស័ព្ទ លោកបានបញ្ជាក់យ៉ាងដូច្នេះថា តាមពិតនៅតំបន់នោះ ខ្ញុំបានឲ្យមន្ត្រីជំនាញចុះទៅដើម្បីវិធានការបង្ក្រាប ប៉ុន្តែពួកយើងខ្វះមធ្យោបាយ និងពិបាកធ្វើដំណើរ និយាយរួមទៅមធ្យោបាយខាងសមត្ថកិច្ចយើងវាមិនឈ្នះមធ្យោបាយក្រុមឈ្មួញបំផ្លាញព្រៃឈើ ដូច្នេះពេលទៅម្តងៗ បានត្រឹមតែឃើញដាននៃការដឹកឈើចេញតែប៉ុណ្ណោះ ។ លោកប្រធានមន្ទីរបន្តថា បើទោះជាលំបាកយ៉ាងណាក៏ដោយ ខ្ញុំនៅតែមានផែនការដើម្បីឲ្យមន្ត្រីចុះទៅកាន់ទីនោះឲ្យបានជាប់លាប់ ។
លោកអ៊ុំ វណ្ណសុភៈ នាយខណ្ឌរដ្ឋបាលព្រៃឈើខេត្តមណ្ឌលគិរី មិនអាចសុំការបំភ្លឺក្នុងករណីនេះបានទេ ដោយទូរស័ព្ទចូលគាត់ចុចបិទ ក្រោយមកក៏បិទទូរស័ព្ទតែម្តង ។ លោកឡោ សុខា ស្នងការនគរបាលខេត្តមណ្ឌលគិរី បានប្រាប់កាសែតនគរវត្តថា ខ្ញុំមិនទាន់បានទទួលព័ត៌មាននេះនៅឡើយទេ ប៉ុន្តែខ្ញុំសូមជម្រាបថា គ្រប់បណ្តាច្រកទាំងអស់ ទីណាក៏ដោយនៅក្នុងខេត្តមណ្ឌលគិរី ខ្ញុំបានចេញបទបញ្ជាឲ្យបិទទាំងអស់ មិនឲ្យមានទេ ការដឹកជញ្ជូនឈើ គឺធ្វើឲ្យស្ងាត់តែម្តង តែបើលេចឮព័ត៌មានបែបនេះ ខ្ញុំនឹងហៅលោក ឡេង សោភ័ណ មេបញ្ជាការនគរបាលវរៈការពារព្រំដែនលេខ៦២១ គ្រប់គ្រងនៅតំបន់នោះមកសួរនាំឲ្យបានច្បាស់ ព្រោះនេះជាបទល្មើស ដែលខ្ញុំត្រូវទទួលខុសត្រូវ និងចាត់វិធានការ បើសិនជាមាន ។
សូមបញ្ជាក់ផងដែរថា ប៉ុន្មានថ្ងៃមុននេះ មានកម្លាំងកងរាជអាវុធហត្ថលើផ្ទៃប្រទេសសហការជាមួយក្រសួងរ៉ែ និងថាមពលសមត្ថកិច្ចអាជ្ញាធរខេត្តមណ្ឌលគិរីចុះបង្ក្រាបទីតាំងរ៉ែមាសចំនួន៤កន្លែងនៅចំណុចចុងផ្លាស សកម្មភាពកាប់ឈើនៅតំបន់អូររលៀ ដែលមានទីតាំងមិនឆ្ងាយពីទីតាំងកាប់បំផ្លាញព្រៃឈើនោះ។តែអ្វីៗត្រូវបាន គេបិទបាំងយ៉ាងស្ងាត់ ក្នុងនោះសូម្បីតែសកម្មភាព របស់ដៃជើងរបស់លោកឃិន ម៉េងស្រេង ដឹកជញ្ជូនឈើចេញពីតំបន់ព្រំប្រទល់ខេត្តមណ្ឌលគិរី និងខេត្តក្រចេះរវាងស្រុកកែវសីមា និងស្រុកស្នួល ឆ្លងទៅវៀតណាមតាមច្រកង៉ាំដី ដែលដឹកឆ្លងកាត់ចំពីខាងក្រោយផ្ទះលោក ឃិន ម៉េងស្រេង គីឡូម៉ែត្រលេខ៣៦ ក៏មិនបានបែកការណ៍ដូចគ្នា ខណៈអ្នកយកកញ្ចប់ថវិកាទាំងអស់ ទាំងអាជ្ញាធរ សមត្ថកិច្ច និងជំនាញ បានផ្តល់ដំណឹងនេះ ទៅកាន់ពួកគេគ្រប់គ្នា ដើម្បីលាក់បាំង ។
គេសង្ឃឹមថា ពតិមាននេះអាចជាតម្រុយសម្រាប់ស្រាវជ្រាវការប្រព្រឹត្តបទល្មើសព្រៃឈើដែលបង្កឡើងដោយពួកជនបរទេសមានការឃុបឃឹតពីមន្ត្រីខ្មែរជាំមិនខាន!៕