ភ្នំពេញ ៖ ប្រភពច្បាស់ការណ៍មួយបានបង្ហើបអោយដឹងថា៖ កូនប្រុសលោក ប៉ុល លឹម រដ្ឋលេខាធិការក្រសួង មហាផ្ទៃ គឺលោក លឹម ចំណាន ដែលបានបាញ់បោះតាមដងផ្លូវ ប៉ុន្ដែមិនត្រូវសមត្ថកិច្ចចាត់ការតាមនីតិវិធីឡើយ គ្រាន់តែយកទៅអប់រំនោះ បានចូលកាន់តំណែងជាអនុការិយាល័យចរចរាណ៍ជើងគោកនៃស្នងការដ្ឋាននគរបាលខេត្ដកណ្ដាលឡើងវិញហើយ ។
គួររំលឹកថា កាលពីថ្ងៃទី១០ ខែមិថុនា ឆ្នាំ២០១៧ វេលាម៉ោង១ ៧និង៥៨នាទី នៅតាមបណ្តោយផ្លូវជាតិលេខ១ ជិត បុរី ប៉េងហួត បឹងស្នោរ មានឡានបាឡែនពណ៌ទឹកមាស ពាក់ស្លាកលេខ ភ្នំពេញ 2AM-2762 មួយគ្រឿង បើកបរដោយជនមិនស្គាល់មុខ ទិសដៅស្របគ្នា បានជិះមកវ៉ាខាងស្តាំដៃហើយបុកកញ្ចក់ឡានជនរងគ្រោះ។
ពេលនោះជនរងគ្រោះបានជិះឡានដេញតាមហើយស៊ីផ្លេឲ្យជនបង្កគាត់ឈប់ ដោះស្រាយ។ តែឡាននោះបែរជាបង្អង់ល្បឿន បើកកញ្ចក់ឡាន ហើយបាញ់មួយគ្រាប់បំរុងសម្លាប់តែម្តង សំណាងហើយដែលមិនត្រូវ ។បន្ទាប់មកម្ចាស់ឡាននោះដែលគេស្គាល់ថាលោក លឹម ចំណាន ក៏អែបស្តាំហើយអ្នកបើកបរចេញមកក្រៅកាន់កាំភ្លើងជាប់នឹងដៃ រងចាំឡានពួកខ្ញុំដែរ អែបស្តាំឈប់នៅក្រោយឡានរបស់ជនបង្កហេតុ ដោយសារតែភាពភ័យខ្លាចពេក ជនរងគ្រោះក៏បកឡានថយក្រោយ ដើម្បីរកទីតាំងសុវត្ថិភាព ។
កាលនោះលោក ប៉ុលលឹមបាននិយាយការពារកូនប្រុសរបស់លោកថា ការណ៍ដែលលោក លឹម ចំណានបាញ់នោះគឺ«ដើម្បីការពារខ្លួនប៉ុណ្ណោះ ហើយថាកូនរបស់លោកមិនមានកំហុសនោះទេ»។
ប្រាប់អ្នកព័ត៌មានក្នុងស្រុក លោកប៉ុល លឹម បានបញ្ជាក់ទៀតថា «នគរបាលនឹងមិនចាប់ខ្លួនកូនប្រុសខ្ញុំទេ ពីព្រោះគាត់មិនបានប្រព្រឹត្តបទល្មើសធ្ងន់ធ្ងរឡើយ» ។ លោកអះអាងទៀតថា «ចំណាន បានបាញ់គំរាមរថយន្តមួយគ្រឿងទៀត ព្រោះអ្នកបើកបររថយន្តនោះ បានបើកដេញតាមគាត់» ។បើតាមលោករដ្ឋលេខាធិការក្រសួងមហាផ្ទៃដដែល ករណីនេះ ភាគីម្ខាងទៀត មិនបានដាក់ពាក្យប្តឹងកូនប្រុសរបស់លោកនោះទេ ពីព្រោះ ពួកគេ(ម្ចាស់រថយន្តដែល លឹម ចំណាន បាញ់គំរាម) ក៍ទទួលស្គាល់ថា ខ្លួនមានកំហុសដែរ ។
ចំណែកស្នងការរងនគរបាលខេត្តកណ្តាលលោក ឯម រដ្ឋា បានត្រូវគេហទំព័ក្នុងស្រុកដដែលស្រង់សម្តីចុះផ្សាយនៅក្នុងអត្ថបទតែមួយដោយបញ្ជាក់ថា លោក លឹម ចំណាន នាយរងការិយាល័យនគរបាលចរាចរណ៍ខេត្តកណ្តាល បានបាញ់គំរាមរថយន្តមួយគ្រឿងទៀត ក្រោយពីគាត់(លឹម ចំណាន) បើកជែង និងប៉ះរថយន្តនោះតាមបណ្តោយផ្លូវជាតិលេខ១ ស្ថិតក្នុងខណ្ឌច្បារអំពៅកាលពីល្ងាចថ្ងៃទី១០ ខែមិថុនា ឆ្នាំ២០១៧ ។
លោកស្នងការរងបានស្រង់សម្តីសាក្សីបញ្ជាក់ទៀតថាលោក លឹម ចំណាន បានបាញ់គំរាមរថយន្តមួយគ្រឿងទៀត បន្ទាប់មកបានបើកគេច ក្រោយពីរថយន្តរបស់ លឹម ចំណាន បានបុករថយន្តផ្សេងទៀត ។
រីឯស្នងការនគរបាលខេត្តកណ្តាល លោក អ៊ាវ ចំរើន បាននិយាយថា លោកទទួលបានបទបញ្ជាពីថ្នាក់លើឲ្យធ្វើការផាកពិន័យ លឹម ចំណាន តែមិនបានបញ្ជាក់អំពីចំនួនទឹកប្រាក់ដែលត្រូវផាកពិន័យនោះទេ ។
គួរបញ្ជាក់ដែរថា ៖នៅចន្លោះពីខែ មេសា ដល់ខែ ឧសភា ឆ្នាំ ២០១៨ នេះ នាយទាហានថ្នាក់ឧត្ដមសេនីយ៍ និង នាយនគរបាលជាន់ខ្ពស់ថ្នាក់ ឧត្ដមសេនីយ៍ សរុបចំនួន ៣ នាក់និងលោកនាយទាហានរង (ង)៧០ ម្នាក់ដែរ បានជាប់ពន្ធនាគារដោយតែការបាញ់បោះសេរី ។
ក្នុងនោះមាន ៖
១- លោកឧត្ដមសេនីយ៍ ប៉ិច តុងហេង ម្ចាស់ខុនដូនៅបឹងកេងកង ៣ ខណ្ឌ ចំការមន ជាប់គុកព្រោះដកកាំភ្លើងបាញ់អ្នករើសអេដចាយ ។
២-លោកឧត្ដមសេនីយ៍ទោឧកញ៉ា ហូ ចំរើន ជាប់ពន្ធនាគារដោយសារតែបាញ់គំរាមឪពុកក្មេកត្រូវបានដក់គោរមងារឧកញ៉ានិងដេញចេញពីក្រមខណ្ឌ័យោធា ។
៣- លោកឧត្ដមសេនីយ៍ឯក ហ៊ុន ជា ជាប់ពន្ធនាគារព្រោះបាញ់បោះក្នុងផ្ទះដែរតែមិនទាន់ឮថាបកសក្តិផ្កាយបីនគរបាលទេ ។
៤-លោកនាយចំណង់ ធុន រាជ នាយទាហា នរងនៅ (ង)៧០(ជិះឡានជាមួយឈ្មោះម៉ៅឧត្តម) ជាប់ពន្ធនាគារព្រោះ បាញ់ បោះសេរី នៅនៅមុខក្លឹប កម្សាន្ត Epic ស្ថិតក្នុងសង្កាត់ ទន្លេ បាសាក់ ខណ្ឌចំការមន។ចុះហេតុអីថានៈត្រឹមនគរបាលពាក់សក្តិចេញត្រឹមប្រកាសរដ្ឋមន្ត្រីគ្មានទោសហើយបែរជាឡើងតួនាទីទៅវិញ? ៕